114
याहवेहए उँइँर थरथरले त्हारद्
1 याहवेहजी इस्राएलीमैं मिश्र ह्युलउँइँले पखइ,
आक्होबै क्युइ पोंबै म्हिमैंए म्हाँजोउँइँले याकूबए परवारमैं त्होंखइ।
2 च त्हेरि यहूदा ह्युल याहवेहए पबित्र क्ल्ह्यो तयाइ,
धै इस्राएल खीए ग्याल्स तइ।
3 याहवेहजी चु के लब् म्रोंसि मा ङ्युँइ भौदियाइ;
यर्दन स्यों उल्टोले प्रबर होंइ।
4 कोंमैं ङ्हिंसि क्यु साँडेमैं धोंले
धै डाँडामैं क्यु झज धोंले उफार्दिबर होंइ।
5 ओ मा ङ्युँइ, क्हिलाइ तो तइ? तले भौदियाइ।
ओ यर्दन, क्हि तले लिउँइन एह्याल?
6 ओ कोंमै, क्यु साँडेमैं धोंले क्हेमैं तले उफार्दिल,
ओ डाँडामैं, क्यु झज धोंले क्हेमैं तले उफार्दिल?
7 ओ पृथ्बी, याहवेहए उँइँर,
याकूबए परमेश्वरए उँइँर थरथरले त्हारद्;
8 खीजी पारालाइ क्युए ङ्ह्योखोमैं लमिंइ,
धै प्रोलाइ क्युए मुल लमिंइ।