118
खीए खोंयोंइ आनुबै म्हाँया खोंयोंन् बिलै तरिम्
1 याहवेहलाइ धन्यबाद पिंन्, तलेबिस्याँ खी स्वाब मुँ,
धै खीए खोंयोंइ आनुबै म्हाँया खोंयोंन् बिलै तरिम्।
2 “खीए खोंयोंइ आनुबै म्हाँया खोंयोंन् बिलै तरिम्” बिसि
इस्राएलीमैंइ बिरिगे।
3 “खीए खोंयोंइ आनुबै म्हाँया खोंयोंन् बिलै तरिम्,” बिसि
हारूनए प्हसेमैंइ बिरिगे।
4 “खीए खोंयोंइ आनुबै म्हाँया खोंयोंन् बिलै तरिम्,” बिसि
याहवेहलाइ मान लब्मैंइ बिरिगे।
5 बेल्ले दु:ख तमा ङइ याहवेहने ग्वार ह्रिइ,
खीजी ङने ज्वाफ पिंइ, धै ङए दुःखउँइँले फ्रेमिंइ।
6 याहवेह ङने बालुन् मुँ, छतसि ङ तो सैने या ङ्हिंरिब् आरे,
म्हिमैंइ ङलाइ तोइ लल् आखाँ।
7 याहवेह ङने बालुन् मुँ, खीजी ङ ल्होमिंमुँ।
छतसि शत्तुरमैंलाइ ङइ ट्होवाब म्रोंब्मुँ।
8 म्हिमैंए फिर भर थेंब् भन्दा
याहवेहए प्हलेर्न ग्वार योंब छ्याँब तम्।
9 क्रथे मिंथेब्मैंए फिर भर थेंब् भन्दा
याहवेहए प्हलेर्न ग्वार योंब छ्याँब तम्।
10 ताँन् ह्रेंमैं ङए कारग्यु तखइ,
दिलेया याहवेहए शक्तिउँइँले ङइ चमैं सैवाइ!
11 चमैंइ ङ खन्तदोंइले कारग्यु लखइ,
दिलेया याहवेहए शक्तिउँइँले ङइ चमैं सैवाइ!
12 चमैंइ क्वेमैंइ धोंले ङ म्होरखइ,
दिलेया पुजुए झ्याँगर लुँब् धोंले चमैं तिस्यार्न सियाइ।
याहवेहए शक्तिउँइँले ङइ चमैं सैवाइ!
13 शत्तुरमैंइ भोंन्ले लिग्याँइ ङलाइ कैवामा ङ क्हुरयाबि छेल,
दिलेया याहवेहजी ङ ल्होमिंइ।
14 याहवेहजी ङलाइ शक्ति पिंमा ङइ खीए मिंर क्वें प्रिंम्,
तलेबिस्याँ खीजी ङ जोगेमिंइमुँ।
15 “याहवेहए क्योलो योजी शक्तिए के लइमुँ,”
बिसि ठिक के लब्मैंइ तम्बुर
सैं तोंबै कै नेरो ट्होब कै तेम्।
16 “याहवेहए क्योलो यो कैंडो क्वेइमुँ,
याहवेहए क्योलो योजी शक्तिए के लइमुँ!”
17 ङ सिरिब् आरे, सोगोंन् तरिब्मुँ,
धै याहवेहजी लबै केमैं ङ बिप्रब्मुँ।
18 याहवेहजी ङ थेबै दण्ड पिंइमुँ,
दिलेया खीजी ङ सिल् आपिंइमुँ।
19 ठिक के लब्मैं मन्दिरर्बै तगरमैंउँइँले होंम्। च तगरमैं ङए ल्हागिर थोंमिंन्।
च न्होंर होंसि ङइ याहवेहलाइ धन्यबाद पिंब्मुँ।
20 चु तगर याहवेहल् ग,
च न्होंर ठिक के लब्मैं मत्त्रे होंल् योंब्मुँ।
21 क्हिजी ङए प्राथनाए ज्वाफ पिंबै ल्हागिर नेरो ङलाइ जोगेमिंबै ल्हागिर
ङ क्हिलाइ धन्यबाद पिंम्।
22 धिं लब्मैंइ केर आफे बिसि भ्योंवाबै युँमान्
तेंर्बै क्र युँमा तइ।
23 चु के याहवेहउँइँले तब् ग,
ङ्योइ मैंरिमा चु आच्म्मबै के मुँ।
24 तिंयाँबै त्हिंइ याहवेहजी बनेब् ग।
छतसि चु त्हिंइर ङ्यो आनन्दले सैं तोंले।
25 “ओ याहवेह, ङि जोगेमिंन्” बिसि ङ क्हिने यो छ्युँ लम्!
ओ याहवेह, ङ क्हिने यो छ्युँ लमुँ, ङिए सैंर मैंब् धों लमिंन्।
26 याहवेहए मिंर युबै म्रुँइ आशिक योंम्।
धै ङिइ क्हेमैं ताँनलाइ याहवेहए धिंउँइँले आशिक पिंम्।
27 याहवेहन् परमेश्वर ग,
खीजी ङ्योलाइ चारबै ह्वे पिंइमुँ।
छतसि सिं धुँए हाँगमैं छेसि चाड म्हाँदिब्मैंने बालु
सैं तोंदै ख्रो पिंबै क्ल्ह्यो समा क्रेयाद्।
28 क्हि ङए परमेश्वर ग, छतसि ङ क्हिलाइन धन्यबाद पिंब्मुँ,
क्हि ङए परमेश्वर ग, ङ क्हिलाइन थेब् लब्मुँ।
29 याहवेहलाइ धन्यबाद पिंन्, तलेबिस्याँ खी स्वाब मुँ।
खीए खोंयोंइ आनुबै म्हाँया खोंयोंन् बिलै तरिम्।