120
ओ याहवेह, ङ जोगेमिंन्
कैंडो क्रेबै त्हेर्बै क्वे
1 ङए दुःखर ङ याहवेहने ग्वार ह्रिमा
खीजी ङने ज्वाफ पिंम्।
2 स्योर तेबै म्हदे मुँबै म्हिमैंउँइँले,
नेरो छलु म्हिलु लबै म्हिए लेउँइँले,
ओ याहवेह, ङ जोगेमिंन्।
3 ओ स्योर तेबै ले,
खीजी क्हिए फिर कति थेबै दण्ड पिंलै?
क्हिने झन् खै लब्मुँ?
4 खीजी क्हिए फिर सिपाइमैंइ छेबै म्ह्रुछु तबै मेमैंइ दण्ड पिंब्मुँ,
धै झ्याडिर लुँरिबै मिए राबइ ख्रोंवाब्मुँ।
5 धिक्कार ङ, तलेबिस्याँ मेशेकर्बै ल्हयो आखब्मैं टिब् धोंले
धै केदारर्बै तम्बुमैंए म्हाँजोर स्याँ म्हि टिब् धोंले
ङ क्हेमैंए म्हाँजोर टिइमुँ।
6 शान्तिलाइ आखोब्मैंए म्हाँजोर
ङ टिब ल्हें तइ।
7 ङ शान्ति म्हैबै म्हि ग,
दिलेया ङ छले पोंमा चमैं नेबर तयार तम्।