13
दुःखर्बै प्राथना
क्वे प्रिंब्मैंए चिबए ल्हागिर दाऊदए भजन घ्रि।
1 ओ याहवेह, खोंयों समा क्हिजी ङ म्लेमुँ? क्हिजी खोंयोंइन म्लेवाम्मा?
क्हिजी ह्रोंसए लि ङने खोंयों समा लोरिम्?
2 खोंयों समा ङइ सैं न्होंरि दुःख सैदिल् त्हुब् जा?
धै त्हिंइ ह्रोंसे ङइ कति न्हुँ लब?
खोंयों समा ङए शत्तुरमैं ङए फिर ट्होगों तरिम्?
3 ओ याहवेह ङए परमेश्वर, ङए फिर मि ङ्ह्योमिंन्, धै ङने ज्वाफ पिंन्,
ङलाइ धबै भों पिंन्, आस्याँ ङ क्रोंर फेब्मुँ।
4 आस्याँ ङए शत्तुरइ, “ङइ च ट्होवाइ,” बिब्मुँ,
धै ङ क्हुरियामा ङए शत्तुरमैं सैं तोंब्मुँ।
5 दिलेया क्हिए खोंयोंइ आनुबै म्हाँयार ङइ सैं केंइमुँ,
क्हिजी ङ जोगेमिंबइले ङए सैं तोंब्मुँ।
6 ङ याहवेहए क्वे प्रिंब्मुँ,
तलेबिस्याँ खीजी ङए फिर ल्हयो खम्।