135
याहवेहजी लबै थेब्-थेबै केमैं
1 याहवेहए मिं क्वेद्!
याहवेहए मिं थेब् लद्,
ओ याहवेहए सेवा लब्मैं खीए मिं थेब् लद्!
2 याहवेहए धिंर
ङ्योए परमेश्वरए धिंर्बै ह्युमैंर राब्मैं खीए मिं क्वेद्।
3 याहवेह बेल्ले स्वाब मुँ,
छतसि खीए मिं थेब लद्;
खीजी म्हिमैंए फिर ल्हयो खम्, छतसि खीए मिंर क्वे प्रिंन्।
4 तलेबिस्याँ याहवेहजी याकूबलाइ ह्रोंसल् लबर,
धै इस्राएलीमैंलाइ ह्रोंसए म्हिमैं तबर त्हाँइमुँ।
5 याहवेह बेल्ले थेब मुँ,
छतसि ङ्योए प्रभु ताँन् देवतामैं भन्दा थेब मुँ बिसि ङइ सेइमुँ।
6 स्वर्गर, पृथ्बीर,
नेरो मा ङ्युँइमैंए गैरु क्ल्ह्योमैंरै या,
याहवेहजी ह्रोंसए सैंर मैंब् धोंले लम्।
7 खीजी पृथ्बीए च्होउँइँले न्हाँम्स्यो रेमिंम्,
खीजी नाँने बालु काम्लि-तिम्लि कुल्मिंम्
धै खीए भण्डरउँइँले खैं तेमिंम्।
8 स्योंम खीजी मिश्रीमैंए ओंसों फिबै च्हमैं,
नेरो ओंसों फिबै खेदोमैं सैवाइ।
9 ओ मिश्र ह्युल, क्हिए ह्युलए म्हाँजोर्न
फारो नेरो चए ताँन् के लब्मैंए उँइँर
खीजी औदिबै चिनु नेरो प्लेटोयाबै केमैं लइ।
10 खीजी ल्हें ह्रें-ह्रेंमैं सैवाइ,
भों-भोंबै म्रुँमैं या सैवाइ:
11 एमोरीमैंए म्रुँ सिहोन,
नेरो बाशानर्बै म्रुँ ओगलाज्यै या सैवाइ,
धै कनान ह्युलर्बै ताँन् ग्याल्समैं खीजी नास लवाइ।
12 झाइले चमैंए क्ल्ह्यो-न्हेए फिर
खीए म्हिमैं इस्राएलीमैंलाइ क्ल्हे तल् पिंइ।
13 ओ याहवेह, क्हिए मिं खोंयोंन् बिलै तरिम्,
ओ याहवेह, पुस्ता-पुस्ता समा म्हिमैंइ क्हि मैंरिब्मुँ।
14 तलेबिस्याँ याहवेहजी ह्रोंसए म्हिमैंए ठिक निसाफ लब्मुँ,
धै ह्रोंसए सेवा लब्मैंए फिर ल्हयो खब्मुँ।
15 अरू ह्रेंमैंए कुमैं मारा नेरो चाँदिउँइँले
म्हिमैंए योइन बनेब् ग।
16 चमैंल सुँ मुँ, दिलेया पोंल् आखाँ;
मि मुँ, दिलेया म्रोंल् आखाँ;
17 न्ह मुँ, दिलेया थेल् आखाँ,
चमैंइ सो आसें।
18 छाबै सैमैं बनेब्मैं या छाबन् तब्मुँ,
धै कुमैंए फिर भर थेंब्मैं या कुमैं धोंन् तब्मुँ।
19 ओ इस्राएलए सन्तानमैं, याहवेहए मिं थेब् लद्!
ओ हारूनए सन्तानमैं, याहवेहए मिं थेब् लद्!
20 ओ लेबीए सन्तानमैं, याहवेहए मिं थेब् लद्!
ओ याहवेहलाइ मान लब्मैं, याहवेहए मिं थेब् लद्!
21 सियोनर टिब्मैं याहवेहए मिं थेब् लद्,
यरूशलेमर टिबै याहवेहए मिं थेब् लद्।
याहवेहए मिं क्वेद्!