17
छ्याब् आरेबै म्हिए प्राथना!
दाऊदइ लबै प्राथना!
1 ओ याहवेह! ल्होमिंन् बिसि ङइ ग्वार ह्रिमा क्हिजी थेमिंन्!
छ्याँबै खोंउँइँले लबै ङए प्राथनार क्हिए न्ह तोमिंन्!
2 ङने तोइ छ्याब् आरे िबबै निसाफ क्हिउँइँलेन् खरिगे!
क्हिजी ङ ङाँइ ङ्ह्योमा ङ ठिक के लब् म्रोंरिगे!
3 क्हिजी ङए खोंर तोइ आछ्याँबै सै मुँ उ? बिसि म्हैलै या धै म्हुँइँसरै या ङए जाँच ललेया या
ङए खों न्होंर क्हिजी आछ्याँबै सै तोइ योंरिब् आरे।
ङए सुँइ पोंबै ताँइ खाबलाज्यै या सैं नल् लरिब् आरे
बिसि ङइ मैंइमुँ।
4 म्हिमैंए केए ल्हागिर बिब् ग बिस्याँ,
क्हिए सुँर्बै ताँउँइँलेन्
न्होह्रों लबै केउँइँले ङइ ह्रोंसलाइ जोगेसि थेंइमुँ।
5 क्हिजी प्रद् बिबै घ्याँर ङए प्हलेइ भोंन्ले म्हैमुँ,
धै ङए प्हले आप्लेइमुँ।
6 ओ परमेश्वर, ङ क्हिनेन् प्राथना लम्,
तलेबिस्याँ क्हिजी ङइ ह्रिबै सै पिंम्,
क्हिए न्ह ङ ङाँइ तोमिंनु, धै ङइ बिबै ताँ थेमिंन्।
7 ओ प्रभु, ह्रोंसए शत्तुरमैंउँइँले जोगेबै ल्हागिर
क्हिने ग्वार ह्रिखब्मैंलाइ क्हिजी ह्रोंसए क्योलो योइ जोगेमिंसि,
क्हिए खोंयोंइ आनुबै म्हाँयाजी लबै प्लेटोयान् तबै केमैं उँइँमिंन्।
8 क्हिए मिफुँ धोंले ङ जोगेसि थेंमिंन्।
9 ङलाइ लुडिबै दुष्टमैंउँइँले
नेरो ङए न्होह्रों लबर ङए कारग्यु तखबै शत्तुरमैंउँइँले जोगेबर
क्हिए प्ह्यागोंए न्होंर ङलाइ लोथेंन्।
10 चमैंए सैंर दयाम्हाँया तोइ आरे,
दिलेया चमैं बेल्ले थेब् प्हैंसि पोंम्।
11 चमैंइ ल्हासि-ल्हाइ ङलाइ स्याइमुँ,
तारे चमैं ङए कारग्यु तब्मुँ,
धै ङलाइ सर क्हुरवाबै ल्हागिर चमैंइ दाउ ङ्ह्योम्।
12 फो ख्रेंसि चबै सै म्हैप्रबै सिंह धोंन् चमैं तइमुँ,
थेबै सिंह धोंले चमैं क्ह्वेइ टिइमुँ।
13 ओ याहवेह, रेत्ति, चमैंने नेसि ट्होमिंन्।
क्हिए सेलाँइ च दुष्टमैंउँइँले ङ जोगेमिंन्।
14 ओ याहवेह, च म्हिमैंइ चु ह्युलर्बै सै मत्त्रे म्हैम्,
क्हिए योजी च म्हिमैं ङाँइँले ङ जोगेमिंन्।
क्हिजी खोबै म्हिमैंलाइ बिस्याँ, क्हिजी चल् पिंम्,
चमैंए च्ह-च्हमिमैंए ल्हागिरै या तोन्दोंरि योल्ले-ख्युल्ले पिंमुँ,
धै खेंमैंए प्हसेमैंए ल्हागिर चमैंइ ल्हें सै न्होर साँथेंइमुँ।
15 ङ ठिक के लसि क्हिए लि ङ्ह्योब्मुँ,
धै छोरमा ङ क्हिलाइ म्रोंसि सैं तोंब्मुँ।