19
परमेश्वरजी बनेबै मुर्बै सैमैंइ खीए मिं थेब् लब।
क्वे प्रिंब्मैंए चिबए ल्हागिर दाऊदए भजन घ्रि।
1 परमेश्वरए छ्याँबै बयन मुइ लमुँ,
खीजी बनेबै मुसारामैंइ खीए केमैं उँइँमिंम्।
2 त्हिंइ ह्रोंसे चमैंइ ताँ सेम्;
धै म्हुँइँस ह्रोंसे चमैंइ ज्ञानए ताँमैं उँइँमिंम्।
3 चमैंने ताँफुँमैं आरे, चमैंल क्युइ या आरे,
चमैंए कै या आथे।
4 दिलेया चमैंए कै ह्युल तिगोंन् कोनिइमुँ,
चमैंइ पोंबै ताँमैं ताँन् ह्युलर फेनेइमुँ,
खीजी त्हिंयाँ टिबै ल्हागिर मुर क्ल्ह्यो घ्रि लथेंइमुँ।
5 च त्हिंयाँ ब्ह्याए जग्यउँइँले पैरेसि त्होंइ खबै प्ह्रेंरो धों तब् मुँ,
ट्होइ खबै म्हि सैं तोंब् धोंलेन् ह्रोंसए के लबर च सैं तोंम्।
6 मुए छेउ घ्रिर च त्होंमुँ,
धै स्युरदै अर्को छेउ समा फेनेम्।
चए राबउँइँले तो सै या लोल् आखाँ।
7 याहवेहए ठिम खोट आरेब मुँ,
च ठिमइ सैं सिब्मैंलाइ भों पिंम्।
खीजी बिबै ताँमैं भर लल् खाँब मुँ,
आह्र आसेब्मैंलाइ च ताँइ बुद्धि पिंम्।
8 याहवेहए ठिममैं ठिक मुँ,
खीजी ल्हैदिबै के लइ बिस्याँ सैं तोंल् योंम्।
याहवेहजी बिबै ताँमैं ठिक मुँ,
च ताँमैंइ ङ्योए न्ह मि थोंमिंम्।
9 खीलाइ मान लद् बिबै ताँ छ्याँब मुँ,
धै खोंयोंन् बिलै तरिब्मुँ।
याहवेहए ठिमर्बै ताँमैं क्ह्रोंसेंन्बै मुँ,
चु ताँमैं ठिक मुँ।
10 मारा भन्दा याहवेहए ताँमैं म्हैल् त्हुब मुँ,
छ्याँबै मारा भन्दा झन ल्हें खीए ताँ म्हैल् त्हुम्;
खीए ताँ क्वे खुदु भन्दा खुदुब् मुँ,
धै न्हाँज्युउँइँले तेयुबै खुदु भन्दा च बेल्ले लिंब तम्।
11 चु ताँमैंउँइँलेन् क्हिए केब्छैंइ तो लल् त्हुम् बिसि सेमुँ,
चु ताँमैंइ बिब् धों लस्याँ थेबै इनाम योंम्।
12 ह्रोंसइ लबै गल्तिमैं खाबइ सेल् खाँम् रो? खाबज्यै सेल् आखाँ।
छतसि ङइ था आसेल्ले लबै गल्तिमैं क्षमा लमिंन्।
13 क्हिए केब्छैंइ ह्रना-ह्रन् पाप केमैं लल् आपिंन्?
च सैमैंइ ङलाइ पापर च्होवाल् आखाँरिगे,
छ लस्याँ ङ क्हिए उँइँर छ्याब् आरेब तब्मुँ,
धै थेबै अपराधउँइँले जोगेसि ङ दोष आरेब् तब्मुँ।
14 ओ याहवेह, ङ लोबै पारा नेरो ङलाइ खामिंबै परमेश्वर,
ङए सुँउँइँले त्होंबै ताँ फुँमैं नेरो ङए सैंर मैंबै ताँमैं क्हिए उँइँर छ्याँब तरिगे।