2
याहवेहजी त्हाँसि छ्युगु फोबै म्रुँ
1 अरू ह्रेंमैंइ तले जाल रोमुँ?
धै म्हिमैंइ तोन् तोर्बै ताँमैं तले मैंम्?
2 याहवेह नेरो खीजी छ्युगु फोसि त्हाँबै म्रुँए बिरोधर
ह्युलर्बै म्रुँमैं राम्,
धै चर्बै चिब्मैं खागु तसि खेंमैंए न्होंर मदो लसि
3 “चमैंइ फैबै सँउँलिमैं ङ्योइ टोंवाले
धै चमैंइ फैबै छोमैं प्लवाले,” बिसि चमैंइ बिम्।
4 चमैं म्रोंसि स्वर्गर्बै राजगद्दिर टिबै याहवेह निस्योम्;
खीजी चमैंलाइ प्ह्रम्।
5 झाइले याहवेह ह्रिस खसि चमैंलाइ हौदिब्मुँ,
धै ह्रोंसए थेबै ह्रिसर खीजी चमैंलाइ ङ्हिंन् लब्मुँ।
6 “सियोन बिबै ङए पबित्र कोंर
ङइ ह्रोंसए म्रुँ थेंइमुँ,” बिसि खीजी बिम्।
7 “याहवेहजी बिद् बिबै ताँ ङइ बिब्मुँ:
खीजी ङने बिइ, ‘क्हि ङए च्ह ग;
तिंयाँ ङ क्हिए आबा तइमुँ।
8 ङने बालु ह्रिद्, धै ङइ ताँन् ह्रेंमैंए फिर क्हिलाइ क्ल्हे लमिंब्मुँ,
झाइले पृथ्बीर्बै ताँन् साँदर टिबै ह्रेंमैंए फिर क्हिलाइ क्ल्हे लमिंब्मुँ।
9 पैए प्हरे छेसि क्हि चमैंए म्रुँ तब्मुँ,
सए भाँडो तिब् धोंले क्हिइ चमैं त्हुल भुँ लवाब्मुँ।’ ”
10 छतसि ओ म्रुँमैं! बुद्धि मुँब् तद्;
ओ ह्युलर्बै क्रथे मिंथेमैं, न्हक्रों मिक्रों तद्।
11 ङ्हिंसि त्हारदै याहवेहए सेवा लद्,
धै सैं तोंन्।
12 च्हलाइ मान लसि फ्योद्,
छ आलस्याँ खी ह्रिस खब्मुँ,
धै क्हेमैं घ्याँर्न सिब्मुँ,
तलेबिस्याँ खी युनन् ह्रिस खम्।
खीए प्हलेर ग्वार ह्रिबर ह्याब्मैंइ आशिक योंब्मुँ।