29
नाँ खैं तमा याहवेह ओरम
दाऊदए भजन घ्रि।
1 ओ थेबै शक्ति मुँबै परमेश्वरए दूतमैं, याहवेहए मिं क्वेद्!
खी बेल्ले थेब मुँ बिसि खीए भोंए बयन लद्।
2 याहवेहए मिं क्वेसि खीलाइ लल् त्हुबै मान लद्,
खी धोंलेन् पबित्र तसि खीए मिं क्वेद्।
3 याहवेहए कै मा ङ्युँइ फिर थेल् खाँम्,
मान पिंल् त्हुबै परमेश्वर बेल्ले ओरम्,
याहवेह थेबै कैले मा ङ्युँइए फि-फि ओरम्।
4 याहवेहजी पोंबै ताँर शक्ति मुँ,
याहवेहए कै बेल्ले भोंब मुँ।
5 याहवेहए कैजी थे-थेबै देबदारुए धुँमैं या चोवाम्;
लेबनानए कोंर्बै देबदारुए धुँमैं याहवेहजी कुदु-कुदु लवाम्।
6 खीजी लेबनानर्बै कोंमैं मे झज धोंलेन् उफर्दिमिंम्,
धै सिरिओन बिबै कों क्ह्योंर्बै साँडे धोंले उफर्दिमिंम्।
7 काम्लि-तिम्लिने युबै चड्कनेइ धोंलेन् याहवेहए कैजी ल्हिम्।
8 याहवेहए कैजी क्यु आयोंबै क्ल्ह्यो लाम्,
याहवेहजी कादेश बिबै क्यु आयोंबै क्ल्ह्यो लाम्।
9 याहवेहए कैइ चाँफए धुँमैं ख्योदे लवाम्,
क्ह्यों तोइ आचैन् लवाम्,
छतसि “परमेश्वर बेल्ले थेब मुँ!” बिदै खीए मन्दिरर ताँन् म्हिमैं ओरम्।
10 याहवेह नाँ बाढिए फिर टिम्,
याहवेह खोंयोंन् बिलै म्रुँ धोंले राजगद्दिर टिम्।
11 तोंन् तलेया याहवेहजी ह्रोंसए म्हिमैंए सैं ढुक्का लमिंम्।
तलेबिस्याँ याहवेहजी ह्रोंसए म्हिमैंलाइ भों पिंम्।