37
याहवेहजी खीए म्हिमैं पिरिब् आरे
दाऊदए भजन घ्रि।
1 दुष्ट म्हिमैं प्लब् म्रोंसि सैं च्योंब् आलद्;
दुष्ट म्हिमैंइ तो ललैया चमैंए फिर ह्रिस आलद्।
2 तलेबिस्याँ चमैं छि धोंले युनन् करायाम्,
धै नो धोंले ङ्योंलोंयाब्मुँ।
3 छतसि याहवेहए फिर भर थेंनु, धै छ्याँबै केमैं लद्;
क्हेमैं ह्युलर टिमा योब ख्युब तब्मुँ।
4 याहवेहनेन् सैं तोंन्,
धै खीजी क्हिए सैंर मैंबै ताँमैं योमिंब्मुँ।
5 ह्रोंसइ लल् म्हैबै तोन्दोंरि के याहवेहए योर्न थेंवाँन्, खीए फिर्न भर थेंन्,
धै क्हिए ल्हागिर तो लल् त्हुमुँ खीजीन् लमिंब्मुँ।
6 न्हागर्बै चारब ह्वे धोंले क्हिइ लबै ठिक के खीजी उँइँमिंब्मुँ,
धै त्हिंयाँ आधार्बै त्हिंयाँ धोंले क्हिए ठिक निसाफ लमिंब्मुँ।
7 याहवेहए उँइँर च्याँले टिदु, धै आअदेल्ले खीलाइ पैंरिद्;
आछ्याँबै के लबै म्हि प्लब् तमा,
धै चइ आछ्याँबै चाँजोमैं लमा सैं च्योंब् आलद्।
8 ह्रिस आलद्, ह्रिस लब पिवाद्।
सैं च्योंब् आलद्, छाबै बानि ब्योरइ आछ्याँबै घ्याँउँइ ल्हैदिवाम्।
9 तलेबिस्याँ आछ्याँबै के लब्मैं नास तयाब्मुँ,
याहवेहए फिर भर थेंब्मैं बिस्याँ ह्युलए फिर क्ल्हे तल् योंब्मुँ।
10 तारेबै दे त्हेर्न दुष्ट म्हिमैं नास तयाब्मुँ;
क्हिइ म्हैले या चमैं योंरिब् आरे।
11 दिलेया थेब् आप्हैंब्मैंइ ह्युलर क्ल्हे लब्मुँ,
धै चमैं छिं ङ्हाँसि सैं तोंल् योंब्मुँ।
12 दुष्ट म्हिइ ठिक के लबै म्हिए बिरोधर आछ्याँबै चाँजोमैं लम्,
धै च म्रोंसि स ह्राम्,
13 दिलेया चलाइ प्ह्रसि प्रभु निस्योम्,
तलेबिस्याँ च नास तयाब्मुँ बिब खीजी सेइमुँ।
14 दुःख योंब्मैं नेरो आयों आख्युब्मैंलाइ सैबै ल्हागिर,
धै क्ह्रोंसेंन्बै घ्याँर प्रब्मैंलाइ नास लबै ल्हागिर,
दुष्टमैंइ सेलाँ छेम् धै त्हँले या कुरम्।
15 दिलेया चमैंइ छेबै सेलाँइ चमैंए तिंन् म्लेवाब्मुँ,
धै चमैंए त्हँले चोयाब्मुँ।
16 दुष्टमैंने मुँबै ल्हें सै न्होर भन्दा
ठिक के लब्मैंने मुँबै च्युगुदे सै छ्याँब ग।
17 तलेबिस्याँ दुष्ट म्हिमैंए भों याहवेहजी नास लवाब्मुँ,
दिलेया ठिक के लब्मैंलाइ खीजी जोगेसि थेंब्मुँ।
18 याहवेहजी दोष आरेबै म्हिमैंए वास्ता लमुँ,
धै चमैंइ योंल् त्हुबै सैमैंए हग चमैंने खोंयोंन् बिले तरिब्मुँ;
19 दुःख तबै त्हेरै या चमैं फापिल् त्हुरिब् आरे;
अँङ्गलै त्हेरै या चमैं योब-ख्युब तब्मुँ।
20 दिलेया दुष्ट म्हिमैं बिस्याँ नास तयाब्मुँ;
याहवेहए शत्तुरमैं चउरर्बै छि धोंन् तम्;
चमैं युनन् नास तयाब्मुँ, मिखु धोंलेन् चमैं म्हयाब्मुँ।
21 दुष्ट म्हिमैंइ छे किंमुँ, धै चमैंइ छे आफो,
दिलेया ठिक के लबै म्हिंमैंइ बिस्याँ थेबै सैंले पिंम्।
22 याहवेहउँइँले आशिक योंब्मैंइ ह्युलए फिर क्ल्हे लब्मुँ,
दिलेया खीउँइँले सराब योंब्मैं बिस्याँ नास तयाब्मुँ।
23 म्हिइ लबै केमैं याहवेहजी खोइ बिस्याँ
च प्रल् त्हुबै घ्याँर खीजीन् चलाइ डोरेम्।
24 च थुरलैया क्हुररिब् आरे
तलेबिस्याँ याहवेहजी ह्रोंसए योइन चए यो क्हासि क्हुरल् पिंरिब् आरे।
25 ङ फ्रेसि मुँब् ओंनोंबै तिंयाँ खेब तन् समै या,
याहवेहजी ठिक के लबै म्हिलाइ पिवाब
नेरो चए प्हसेमैं ह्रिसि चब ङइ खोंयोंइ आम्रोंइमुँ।
26 चइ खाँचो तब्मैंलाइ यो प्ल्हसि पिंमुँ,
धै चए प्हसेमैंइ आशिक योंब्मुँ।
27 आछ्याँबै केमैं लब् पिसि छ्याँबै केमैं लप्रद्;
छलस्याँ खोंयोंन् बिलै क्हिइ ह्युलर क्ल्हे लल् योंब्मुँ।
28 तलेबिस्याँ ठिक निसाफ लबै म्हिमैंलाइ याहवेहजी खोम्;
खीए म्हिमैं खीजी पिरिब् आरे।
चमैंलाइ खोंयोंन् बिलै खीजी जोगेसि थेंमुँ,
दिलेया दुष्ट म्हिमैंए सन्तान बिस्याँ नास लवाब्मुँ।
29 ठिक के लबै म्हिमैंइ ह्युलर क्ल्हे तल् योंब्मुँ
धै चर खोंयोंन् बिलै टिब्मुँ।
30 ठिक के लबै म्हिइ ज्ञान बुद्धिए ताँमैं पोंम्,
धै चए लेइ ठिक ताँ पोंम्।
31 चइ म्हाँदिबै परमेश्वरए ठिम चए खोंर तम्;
छतसि चए प्हले प्लेरिब् आरे।
32 ठिक के लबै म्हिमैंलाइ खैले सैल् योंब् ङ्हे बिसि
दुष्ट म्हिमैं च्ह्याइ टिम्।
33 दिलेया ठिक के लबै म्हिमैंलाइ याहवेहजी दुष्ट म्हिमैंए योर पिरिब् आरे,
धै निसाफ तमै या खीजी चमैंलाइ छ्याब् आरेबन् ठर्दिमिंब्मुँ।
34 याहवेहए घ्यार्न प्ररिद्, खीलाइन पैंरिद्।
धै खीजी क्हेमैंलाइ चु ह्युलर्बै क्ल्हे तल् पिंब्मुँ;
धै दुष्टमैं नास तब क्हिए मिइन म्रोंब्मुँ।
35 आगुए न्होह्रों लबै दुष्ट म्हि घ्रि ङइ म्रोंइमुँ,
च बेल्ले सपर्दिबै च्हसिंए धुँ धों तब् मुँल।
36 दिलेया दे लिउँइन ङ ह्यामा च आरेल,
ङइ म्हैलेया चने त्होल् आयोंल।
37 छ्याब् आरेबै म्हिमैंलाइ मैंन्, सोजो म्हिमैंलाइ ङ्ह्योद्;
तलेबिस्याँ छाबै म्हिमैंल सन्तानमैं तब्मुँ।
38 दिलेया आछ्याँबै के लब्मैं बिस्याँ नास तयाब्मुँ;
धै दुष्ट म्हिमैंए सन्तानमैंल मिं क्ह्रन् म्हयाब्मुँ।
39 ठिक के लब्मैंलाइ याहवेहजी जोगेमिंम्;
दुःख तबै त्हेर चमैंए लोबै क्ल्ह्यो खीन् ग।
40 याहवेहजी चमैंलाइ ल्होमिंसि जोगेमिंम्;
खीजी दुष्टमैंउँइँले चमैं फ्रेमिंम् धै चमैंलाइ रक्षा लम्,
तलेबिस्याँ चमैंइ खीए प्हलेर्न चमैंइ ग्वार योंम्।