4
ल्होमिंन् बिसि परमेश्वरने लबै प्राथना
क्वे प्रिंब्मैंए चिबए ल्हागिर बीणा-सारङ्गींमैं ह्रादै दाऊदइ भजन घ्रि प्रिंब।
1 ओ ङलाइ ठिक ठर्दिमिंबै परमेश्वर,
ङइ ग्वार ह्रिमा ङलाइ ज्वाफ पिंन्।
ङए फिर दुःख तमा क्हिजी ल्होमिंइ।
ङए फिर दयाम्हाँया लमिंसि ङए प्राथना थेमिंन्!
2 ओ म्हिमैं, खोंयों समा क्हेमैंइ ङए थेबै मिं वासि ङ फाफिन् लरिम्?
खोंयों समा क्हेमैं केर आफेबै सैंमैं खोरिम्
धै स्योलिबै देवतामैंए लिलि प्ररिम्?
तिस्याँदे मैंन्
3 दिलेया याहवेहजी खीजी बिब् ङिंब्मैंलाइ ह्रोंसए ल्हागिर स्यो लथेंइमुँ बिब क्हेमैंइ सेद्;
ङइ ग्वार ह्रिमा याहवेहजी थेब्मुँ।
4 ङ्हिंसि त्हारद् धै पाप आलद्;
क्ल्ह्योर रोमा ह्रों-ह्रोंसए खोंर चु ताँ मैंन्, धै च्याँ तद्।
तिस्याँदे मैंन्
5 याहवेहजी खोबै ख्रो पिंन्,
धै खीए फिर्न भर थेंन्।
6 “ङिलाइ छ्याँबै सैमैं खाबइ उँइँल् खाँमुँ?” बिसि ल्हें म्हिइ ङ्योएरिइमुँ।
ओ याहवेह, ङइ ग्वार ह्रिमा क्हिए लिर्बै ह्वे ङिए फिर चारमिंसि आशिक पिंन्।
7 ल्हें रा-रोमैं नेरो अँगुरए लिंबै प्हा योंसि चमैं सैं तोंब् भन्दा
क्हिजी ङए सैं ल्हें तोंन् लमिंइमुँ।
8 ङ रोमा तोइ न्हुँ आलल्ले न्हरु च्हुइब्मुँ;
तलेबिस्याँ ओ याहवेह, क्हिजी मत्त्रे ङ जोगेमिंब्मुँ।