53
आमादुमैंइ “परमेश्वर आरे” बिम्।
क्वे प्रिंब्मैंए चिबए ल्हागिर दाऊदए मस्किल घ्रि। माहालत बिबै भाकार प्रिंल् त्हुम्।
1 आमादुमैंइ ह्रोंसए सैंर “परमेश्वर आरे!” बिमुँ।
चमैंइ आछ्याँबै केमैं लमुँ, चमैं छेरन् ङ्हाँन् तब्मैं मुँ;
छ्याँबै के लब्मैं खाबै आरे।
2 ताँ क्होब्मैं नेरो परमेश्वर म्हैब्मैं
खाबै मुँ उ बिसि
परमेश्वरजी स्वर्गउँइँले म्हिमैंलाइ ङ्ह्योम्।
3 चमैं ताँन् आछ्याँबै घ्याउँइँ प्रयाइ,
धै चमैं ताँन् छेरन् ङ्हाँन् तयाइमुँ।
खाबज्यै छ्याँबै के आल,
छ्याँबै के लब्मैं घ्रि या आरे।
4 चु आछ्याँबै के लब्मैंइ तोइ आसे वा?
ह्योइ लुडिब् धोंले चुमैंइ ङए म्हिमैं लुडिसि ह्रोंसए फो न्हम्,
चुमैंइ परमेश्वरए मिं खोंयोंइ आकिं।
5 ङ्हिंलन् आत्हुबै क्ल्ह्योरै या
चमैं ङ्हिंसि त्हारब्मुँ,
क्हेमैंए बिरोधर राब्मैंलाइ परमेश्वरजी चमैंए ह्रुबि या सग्याँ-प्हुग्याँ लवाब्मुँ।
तलेबिस्याँ परमेश्वरजी चमैं आखो; छतसि क्हेमैंइन चमैंलाइ फापिल् लल् खाँम्।
6 इस्राएलए मुक्ति पिंबै म्हि सियोनउँइँले युस्याँ कति छ्याँब् तमल!
धै परमेश्वरजी ह्रोंसए म्हिमैंलाइ धबै सुख पिंमा
याकूब निस्योरिगे, इस्राएल सैं तोंरिगे!