59
ङए शत्तुरमैंउँइँले ङ फ्रेमिंन्
क्वे प्रिंब्मैंए चिबए ल्हागिर, “नास आलद्” बिबै भाकार प्रिंन्। शाऊलइ दाऊद सैबर म्हिमैं चए धिं ङ्ह्योबर कुल्मिंमा दाऊदइ चु मिक्ताम प्ह्रिइ।
1 ओ ङए परमेश्वर, ङए शत्तुरमैंउँइँले ङ फ्रेमिंन्;
ङए बिरोधर राब्मैंउँइँले ङ रक्षा लमिंन्;
2 आछ्याँबै के लबै दुष्टमैंउँइँले ङ फ्रेमिंन्,
ङलाइ सैल् म्हैबै म्हिमैंउँइँले ङ जोगेमिंन्।
3 ङ्ह्योद्! ङलाइ सैबर चमैं ह्रेसि टिइमुँ;
चमैं ङए बिरोधर रासि “खैले चलाइ सैल् योंब् ङ्हे?” बिसि ङलाइ च्ह्याइ टिइमुँ।
दिलेया ओ याहवेह, ङइ तोइ अपराध, तोइ पाप आलइमुँ,
4 ङइ आछ्याँबै के तोइ आललै या चमैं तोन्-तोर्न ङने नेबर खम्।
ङए दुःख ङ्ह्योमिंन्, रेसि ङलाइ ल्होमिंन्!
5 ओ ताँन् भन्दा थेबै याहवेह परमेश्वर, इस्राएलए परमेश्वर,
क्हिलाइ आम्हाँदिबै ह्रेंमैंए फिर दण्ड पिंबर रेद्;
धोक पिंबै दुष्ट म्हिमैंए फिर तिफुँइ ल्हयो आखद्।
तिस्याँदे मैंन्
6 ङ्हुर-ङ्हुरले ङ्हेदै नगि स्युरब् धोंले
ङेस ह्रोंसे खागु तसि
चमैं सहरजरे स्युरम्।
7 ङ्ह्योद्, चमैंए सुँउँइँले तो त्होंमुँ?
चमैंए ले सेलाँ धों तब् मुँ;
चमैंए सैंर “ङिइ छ बिब खाबज्यै आथेइमुँ!” ङ्हाँम्।
8 दिलेया ओ याहवेह, च शत्तुरमैंलाइ क्हिजी प्ह्रब्मुँ;
ताँन् अरू ह्रेंमैं म्रोंसि क्हि निस्योब्मुँ।
9 ओ ङए भों, ङ क्हिलाइन ङ्ह्योब्मुँ,
तलेबिस्याँ, ओ परमेश्वर क्हि ङए किल्ला ग।
10 परमेश्वरए खोंयोंइ आनुबै म्हाँया ङए फिर थेब मुँ।
खी ङए ओं-ओंसों ह्याब्मुँ,
धै ङए बिरोधर राब्मैंलाइ ङइन ट्होल् पिंब्मुँ।
11 दिलेया ओ याहवेह, ङिए ढाल,
चमैं आसैमिंन्,
आस्याँ ङए म्हिमैंइ चमैंलाइ म्लिवाब्मुँ;
बरु क्हिए थेबै भोंइ चमैंलाइ सग्याँ-प्हुँग्याँ लवासि ट्होवाद्!
12 चमैंए सुँर्बै पाप नेरो म्हदेर्बै ताँफुँमैंइ लमा
चमैं थेब् प्हैंबइले ङोर फेरिगे।
चमैंइ प्ह्रबै ताँमैं नेरो स्योलिबै ताँमैं लमा
13 क्हिए ह्रिसइ चमैं नास लवामिंन्,
चमैं तोइ आचैल्ले नास लवामिंन्!
छलेन परमेश्वरजी इस्राएलए फिर ग्याल्स लमिंम् बिब
पृथ्बीर्बै ताँन् साँदर टिबै ह्रेंमैंइ सेरिगे।
तिस्याँदे मैंन्
14 ङ्हुर्-ङ्हुरले नगि स्युरब् धोंले
ङेस ह्रोंसे खागु तसि
चमैं सहरजरे स्युरम्।
15 चब सैमैं म्हैबर चमैं स्युर प्रम्
धै म्रेंन्ले चल् आयोंमा चमैं ओरम्।
16 दिलेया ङ बिस्याँ क्हिए शक्तिए क्वे प्रिंब्मुँ;
ङए फिर क्हिजी लबै खोंयोंइ आनुबै म्हाँयाए बारेर ङ न्हाँगर्न क्वे प्रिंब्मुँ,
तलेबिस्याँ क्हि ङए किल्ला
नेरो ङए फिर दुःख तमा ङइ ग्वार योंबै क्ल्ह्यो तइमुँ।
17 ओ ङए भों, क्हिए बयन लदै ङ क्वे प्रिंब्मुँ,
ओ परमेश्वर, क्हि ङए किल्ला,
नेरो ङलाइ खोंयोंइ आनुबै म्हाँया लबै परमेश्वर ग।