76
क्हिए उँइँर खाब् राल् खाँमुँ?
क्वे प्रिंब्मैंए चिबलाइ बीणा-सारङ्गीं ह्रादै प्रिंबै आसापए भजन घ्रि, क्वे घ्रि।
1 यहूदा ह्युलर्बै म्हिमैंइ परमेश्वर ङो सेइमुँ;
इस्राएलर खीए मिं बेल्ले थेब मुँ।
2 यरूशलेमर खीए तम्बु मुँ,
खी टिबै क्ल्ह्यो सियोन बिबै कोंर मुँ।
3 चर शत्तुरमैंए लुँरिबै मेमैं, ढालमैं, सेलाँ
नेरो ल्हडें लमा छेबै हतियारमैं खीजी चोवाइ।
तिस्याँदे मैंन्
4 क्हि बेल्ले चारबै ह्वे ग,
ह्रोंसए शत्तुरमैं ट्होवासि कोंउँइँले क्युरु युमा क्हि बेल्ले ङ्हो ल्होंब्मुँ।
5 भोंबै सैं मुँबै सिपाइमैंए ताँन् सैमैं लुडिवाइमुँ,
झाइले चमैं सिसि थेबै न्हरु च्हुइरिइमुँ।
धै च नेल् खाँब्मैंए भों नुयासि यो क्वेल् आखाँइमुँ।
6 ओ याकूबए परमेश्वर, क्हिजी हौदिमा
घोडा नेरो चर क्रेब्मैं ङ्हिंन-ङ्हिंन् ओलेल् आखाँब् तयाइ।
7 दिलेया ओ याहवेह, क्हिने मत्त्रे ङ्हिल् त्हुब मुँ!
क्हि ह्रिस खमा
क्हिए उँइँर खाब् राल् खाँमुँ?
8 ओ परमेश्वर, क्हिजी स्वर्गउँइँले निसाफ लइमुँ;
9 पृथ्बीर्बै आगुए न्होंर मुँब्मैं ताँन् जोगेबै ल्हागिर
क्हि निसाफ लबर रेमा
पृथ्बीर्बै म्हिमैं ङ्हिंसि आपोंल्ले टिइ।
तिस्याँदे मैंन्
10 क्ह्रोंसेंन् म्हिमैंने क्हिए ह्रिस खमा क्हिए मिंन् थेब् लब्मुँ;
झाइले क्हिए ह्रिसउँइँले सोब्मैंइ आछ्याँबै के लब पिवाब्मुँ।
11 याहवेह क्हेमैंए परमेश्वरने लबै भकलमैं पूरा लद्;
खीए खागु मुँबै ह्रेंमैंइ खीलाइ बालि फोरिगे।
खीजी ताँनलाइ ङ्हिंबर ल्हैदिब्मुँ।
12 थेब् प्हैंबै क्रथे मिंथेमैं खीजी कुरवाम्;
पृथ्बीर्बै म्रुँमैं खीने ङ्हिंम्।