8
परमेश्वर बेल्ले थेब मुँ, दिलेया खीजी थेबै हग म्हिलाइ पिंइमुँ।
क्वे प्रिंब्मैंए चिबए ल्हागिर “गित्तित” बिबै भाका धोंले प्रिंबै दाऊदए भजन।
1 ओ याहवेह, ङिए क्ल्हे,
ह्युल तिगोंन् क्हिए मिं बेल्ले थेब मुँ!
क्हिए मिंर क्वे प्रिंब मु भन्दा क्होवाइ थेनेम्।
2 कोलोमैं नेरो ङ्हे थुँबै कोलो ओंलाँमैंए सुँउँइँले या
क्हिजी ह्रोंसए मिंर क्वे प्रिंल् पिंइमुँ।
क्हिए शत्तुरमैं नेरो बिरोधीमैंए सुँ म्रुबै ल्हागिर
क्हिजी छ लब् ग।
3 क्हिजी बनेबै मु,
क्हिजी मुर थेंमिंबै लयाँ नेरो मुसारमैं ङइ ङ्ह्योमा,
4 म्हि तो जा? क्हिजी तले चए वास्ता लब?
म्हिए च्ह तो जा? क्हिजी तले चए न्हुँ लब?
5 क्हिजी म्हिए च्हलाइ स्वर्गदूतमैं भन्दा च्युगुदे न्होंवाँइ थेंमिंइ,
धै लिउँइ खीलाइ थेबै मानए मुकुट कुमिंइ।
6 क्हिजी खीलाइ क्हिए योइ बनेबै सैमैं फिर्बै क्ल्हे तल् पिंइ;
धै क्हिजी तोन्दोंरि सै खीए प्हले न्होंर थेंमिंइ।
7 र-क्युमैं क्ल्यामैं मेमैं,
क्ह्योंर्बै ताँन् खेदोमैं,
8 मुर प्हुरबै नमेंमैं,
मा ङ्युँइर्बै ताँगामैं,
नेरो मा ङ्युँइ न्होंर मुँबै ताँन् सो प्ह्याबै सैमैं या
म्हिए च्हए न्होंर्न थेंमिंइ।
9 ओ याहवेह, ङिए क्ल्हे,
ह्युल तिगोंन् क्हिए मिं बेल्ले थेब मुँ!