88
ङइ त्हिंयाँ म्हुँइँस क्हिने ग्वार ह्रिइमुँ
कोराए च्हमैंए भजन घ्रि, क्वे घ्रि, क्वे प्रिंब्मैंए चिबलाइ, “महलत-लिन्नोत” बिबै भाका धोंलेन् प्रिंल् त्हुम्। हेमान एज्रिए मस्किल घ्रि।
1 ओ याहवेह, ङलाइ जोगेमिंबै परमेश्वर;
ङइ त्हिंयाँ म्हुँइँस क्हिने ग्वार ह्रिइमुँ;
2 क्हिए उँइँर ङए प्राथना फेनेरिगे;
ङइ ग्वार ह्रिमा क्हिए न्ह तोमिंन्!
3 तलेबिस्याँ ङए सैंर ल्हें दुःख तइमुँ,
छतसि युनन् ङ क्रोंर फेनेबि छेइमुँ।
4 क्रोंर फेनेबै म्हि धोंन् ङ तइमुँ;
भों आरेबै म्हि धोंन् ङ तइमुँ।
5 सिनुमैंने बालु ङलाइ थेंमिंइमुँ,
छगोंर रोबै सैवाबै म्हिमैं धोंले ङ तइमुँ।
क्हिजी खोंयोंइ चमैंलाइ आमैं,
क्हिजी चमैंलाइ वास्ता आलल्ले पिवाइमुँ।
6 क्हिजी ङलाइ क्रोंर्बै ताँन् भन्दा गैरु
मिछु खैब क्ल्ह्योर थेंइमुँ।
7 क्हिए ह्रिसइ ङलाइ प्लेथेंइमुँ,
धै क्हिजी ह्रोंसए ह्रिसइ ङलाइ दु:ख पिंइमुँ।
तिस्याँदे मैंन्
8 ङए खोबै थुमैंने क्हिजी ङ ह्रेंगो लमिंइमुँ;
चमैंए उँइँर क्हिजी ङ आखोब् लमिंइमुँ।
ङ च्युथेंइमुँ, छतसि ङ बैरु त्होल् आखाँ।
9 शोकइ लमा ङए मिइ छेनाले म्रोंल् आखाँ।
ओ याहवेह, त्हिंइ ह्रोंसे ङ क्हिनेन् ग्वार ह्रिइमुँ;
ङए यो क्हि ङाँइन स्योंइमुँ।
10 सिनुमैंने क्हिजी ह्रोंसए औदिबै केमैं उँइँम्मा?
च सिनुमैं सोगों तसि क्हिए मिं थेब् लम् रो वा?
तिस्याँदे मैंन्
11 क्हिजी लबै खोंयोंइ आनुबै म्हाँयाए बारेर छगोंर बयन लम्मा?
धै नास तबै क्ल्ह्योर क्हि भर लल् खाँब मुँ बिसि खाबज्यै बिल् खाँम्मा?
12 क्हिजी लबै औदिबै केमैं मिछु खैबै क्ल्ह्योर म्रोंल् खाँम्मा?
धै क्हिजी लबै ठिक केमैं मैंल् खाँबै शक्ति नुयाबै त्हेरै म्रोंल् खाँम् रो वा?
13 दिलेया ओ याहवेह, ङम् क्हिनेन् ग्वार ह्रिमुँ;
धै न्हाँकर्न ङइ लबै प्राथना क्हिए उँइँर खम्।
14 ओ याहवेह, क्हिजी ङलाइ तले पिवाल?
ङउँइँले ह्रोंसए लि तले लोल?
15 कोलो ओंनोंन् ङए फिर दुःख तइमुँ, धै सिबि छेइमुँ,
क्हिजी हौदिबइले ङ बेल्ले ङ्हिंइमुँ, छतसि ङए सैं च्योंब तइमुँ।
16 क्हिए ह्रिस ङए फिर खइमुँ;
क्हिजी हौदिमा ङ नास तइमुँ।
17 त्हिंइ ह्रोंसे क्हिजी क्युइ धोंले ङलाइ घेर्दिसि हुइमुँ;
खन्तदोंउँइँले क्हिजी ङलाइ घेर्दिइमुँ।
18 ङए थुमैं नेरो ङए फिर म्हाँया लब्मैंलाइ क्हिजी ङउँइँले ह्रेंगो लवाइ;
छतसि मिछु खैबै क्ल्ह्यो ङने क्ह्रिबै थु तइमुँ।