5
बिश्वासीमैं न्होंरि ललन् त्हुबै के
1 खेब् माँब्मैंलाइ आहौदिद्, चमैंने आबा आमाने धोंलेन् ब्यबर लद्। धै फ्रेंसिमैंने ह्रोंसए अलिमैं धोंन् ङ्हाँन्।
2 धै छमिंमैंने छ्याँबै सैंउँइँले ह्रोंसए रिंने धोंले ब्यबर लद्।
3 ङ्ह्योबै म्हि खाबै आरेबै म्हरेस्योमैं म्हाँया लद्।
4 म्हरेस्योमैंल च्ह, च्हमि, क्वें, क्वेंमिं मुँस्याँ, चमैंइ ह्रोंसए बाज्यु भुज्यूलाइ मान लसि छेनाले सुसार लरिगे, छले चमैंइ ह्रोंसए आबा, आमा नेरो बाज्यू भुज्यूए भारा फोरिगे, तलेबिस्याँ छाबै केमैं म्रोंसि परमेश्वर बेल्ले सैं तोंम्।
5 दिलेया खाबै आरेबै म्हरेस्योमैंइ परमेश्वरर मत्त्रे आशा थेंम्, धै खीलाइ ल्होमिंन् बिसि त्हिंयाँ म्हुँइँस परमेश्वरने प्राथना लरिम्।
6 दिलेया म्हरेस्यो तसेया च खै तदा ङ्हाँमुँ छान् तप्रस्याँ सोगोंन् तलेया सियाब् धोंन् तब् ग।
7 चमैं तोइ छ्याब् आरेब तरिगे बिसि चु ताँमैं बिद्।
8 खाबज्यै या ह्रोंसए म्हिमैं नेरो बिलन् त्हुमा ह्रोंसए परवालाइ छेनाले आङ्ह्यो बिस्याँ, चइ लबै बिश्वास स्योलिबै ग। च बिश्वास आलब्मैं भन्दा आछ्याँबै के लबै म्हि तम्।
9 तिब्ले मत्त्रे ब्ह्या तबै टुच्यु बर्ष कैडोबै म्हरेस्योमैंए मिंमैं मत्त्रे सेवा लमिंबर थेंन्।
10 छाबै म्हरेस्योमैं छ्याँबै के लसि छ्याँबै मिं चल्दिब धै ह्रोंसए च्ह-चमिमैं छेनाले फारब, प्ह्रेंमैंलाज्यै या चब् थुँबर मान लब, थेब् आप्हैंनले बिश्वासीमैंए सेवा लब, दुःख तब्मैंलाइ ल्होब, छाबै छ्याँबै केमैंर सैं पिंब्मैं तल् त्हुम्।
11 दिलेया ट्च्यु बर्ष न्होंर्बै म्हरेस्योमैंए मिं सेवा लमिंबर आप्ह्रिद्, तलेबिस्याँ चमैं ब्ह्या लदा ङ्हाँसि ख्रीष्टउँइँले ह्रेंगो तयाम्, धै ब्ह्या लबै सैं लम्।
12 छ लइबिस्याँ चमैंइ “ङम् तारे पिरु बिश्वासीमैंए सेवा लम्” बिबै ताँ म्लेवासि चमैंइ दण्ड योंम्।
13 च्हौ मत्त्रे आङिं चमैं धिं-धिंर स्युरसि प्ल्हेउ तम्, चमैं तब-आतबै ताँमैं पोंब, आगु स्यारब, तोनतोंर्न आगुए केर यो झोंब्मैं तम्।
14 छतसि बिरोधीमैंइ ङ्योए ताँ लल् आयोंरिगे बिसि टुच्यु बर्ष न्होंर्बै ब्ह्या लदा ङ्हाँबै म्हरेस्योमैंइ ब्ह्या लरिगे, च्ह-चमि फिसि छेनाले धिं नाँ चुसि टिरिगे बिब ङए सैं मुँ।
15 तलेबिस्याँ को-कोइ म्हरेस्योमैं प्रभु पिसि दुष्टए लिलि प्रयाइमुँ।
16 बिश्वासीमैंए फिर खाग आतरिगे बिसि परमेश्वरए फिर बिश्वास लबै च्हमिरिल ह्रोंसए न्होंरि खाब् मुँले म्हरेस्योमैं मुँस्याँ, चइ च म्हरेस्योमैं ल्होल् त्हुम्। खाबै आरेबै म्हरेस्योमैंलाइ बिस्याँ बिश्वासीमैंइ ल्होल् त्हुम्।
17 बिश्वासीमैं छेनाले ल्होमिंबै एल्डरमैं, खासगरि परमेश्वरए ताँ बिमिंसि लोमिंबर भों लब्मैंइ दुःख सैदि डबल योंल् त्हुम्।
18 तलेबिस्याँ परमेश्वरए पबित्र छ्वेर बिइमुँ
“दाँइ झोंबै क्ल्याए सुँर म्हुँलु आझोंन्।”
तलेबिस्याँ
“के लबै म्हिइ नों सै योंल् त्हुम्।”
19 एल्डरए बिरोधर तोइ छ्याब् ल्हैदिस्याँ म्हि ङ्हिंदे सोंदेए ताँ आक्ह्रिन् समा आक्वेंन्, दिलेया म्हि ङ्हिंदे, सोंदेए ग्वाइ क्ह्रिस्याँ मत्त्रे क्वेंन्।
20 खोंयोंइ बिलै पाप के लरिब्मैंलाइ ताँन् म्हिमैंए उँइँर हौदिद्। छ लस्याँ अरूमैं या ङ्हिंब्मुँ।
21 परमेश्वर आबा, प्रभु येशू ख्रीष्ट नेरो स्वर्गदूतमैंए उँइँर ङइ क्हिने बिमुँ, क्हिइ खाबलाज्यै आफेलल्ले छेनाले चु केमैं लद्।
22 अरूमैंइ लबै आछ्याँबै केमैंर क्हि सामेल् आतद्। छ्याब आयोंरिगे बिसि प्रभुए के लबै ल्हागिर म्हिमैं त्हाँल् त्हुमा आतुर आतद्। ह्रोंसलाइ पबित्र थेंन्।
23 खों-खोंयों क्हिए फो नब्रें लमुँ, छतसि क्यु मत्त्रे आङिं, फो नमा मैए ल्हागिर प्हा या दे-दे थुँन्।
24 को-कोइ म्हिमैंइमि छर्लङ्गन् म्रोंबै पाप केमैं लमुँ धै नियाधिश ङाँर फेनेम्, दिलेया को-कोइइ लबै पाप केमैं लिउँइ मत्त्रे म्रोंम्।
25 छलेन छ्याँबै केमैं या छर्लङ्गन् म्रोंम्, छर्लङ्गन् म्रोंल् आखाँबै सै तोइ मुँलेया च खोंयोंन् बिलै लोइ टिल् आखाँ, तिंगें च खैलसे या त्होंयाम् धै ताँनइ म्रोंम्।