Yeisu ina tonumisayao
Baloma Kimaasabaina siibabane tetelina
2
(Guinuwa 2:1-47)
Pentikosi tetelina
1 Tutayana Pentikosi ana maliyalina bogina ima, Yeisu ina tonumisayao liliudi taudiva situgúguna vada tayamo goi sikaaiyaka.
2 Sikaaiyaka go, yábana goi butukáwana tayamo ima yágira yailúwasa butukáona nakae. Tuwo madabokiidi vadayana goi sikaaiyaka sinove.
3 Sinove go, máena sisowóduwo adi kaigigita yeu nakae go, sitasapasapa sina tomota tamo tamo dabadi goi sitowotowo.
4 Sitowotowo go, madabokidi Baloma Kimaasabaina ivakayaodeidi, tuwo sivatowo ta kaníyana be ta kaníyana goi sibobóbwara nakonakae Balomayana ikitogagedi.
5 Ego Diyuu kaasalaidi Yaubada yaina dadava liliuna poyapoya ame goi bogina sima Yerusalema goi sikaaiyaka.
6 E butukawanayana sinove, tuwo sideli sima; latuwodi siyagoi kaga butukáona. Sima, tamo tamo toinidi niyadi sinovedi, tauna nuwodi siwówana.
7 E madi kainaopa gagaina sidigo kadi,
‘Iyaa! Amo kaga? Amo tobobwarayadi liliudikova da Galili, tauna niyada geya siyagoidita
8 go, manakae tanovedi kita tamo tamo toinida niyada goi sibobóbwara?
9 Kita da Paritiya, da Mediya, da Elam, da Mesopotémia, da Yudiya, da Kapadosiya, da Pontosi, da Esiya,
10 da Parugiya, da Pampíliya, da Itipita, da Libiya asainao Sairini ana dadava goi be nakae da Roma,
11 e nakae da Kiriti be da Arábiya. Ego maniyeda Diyuu go, maniyeda tosaidámana. Madabokidi niyada tayamo tayamo ta kaníyana be ta kaníyana goi sibobóbwara taanovedi Yaubada ina guinuwa toogagaidi sitalavaaitedi.’
12 E nava sikaiinaopa be nakae nuwodi siwowówana taudiva sibobóbwara kadi,
‘Ame kaga ana yagoina nakona?’
13 Ego maniyena tomota sivaponupoonuyedi kadi,
‘Oine vau sinim ginagina, e siyaluwo!’
14 Go kina Pita itaoya kidi vamoleyanayao yawou tayamo taiyao go, niyana gagaina goi boda ilatuwokoidi idigo kana,
‘Segowo da Yudiya be nakae madabokimi Yerusalema ana tokaiyakoyao, guna livala ame konovedokōidi bei koyagoi ame kaga ana yagoina.
15 Ame korotoyadi be yau koogitema manuma konuwonúwana kami, “Komi koyaluwo.” Ago ame nava nobuyana go! Nobuyana goi oine geya tanimnim, tauna komi kotainasi; kai geya kayaluwoita geya!
16 Go sem ame dogoiyana kogitegite moe kaga nakae boi Yaubada ina tokabivalavala Iyoeli italavaite Baloma Kimaasabaina manuna; idigo kana,
17 “Yaubada idigo kana,
‘Nava bei tuta ana kaba lukavava goi Balomaigu asiwoi
isou ina tomota liliudi yaidi goi ikaaiyaka.
Tuwo natumiyao koroto be vevina
guna livala bei sikabivalevale.
Imi tubuwauyao bei sikalayáusa go,
imi tomoyamoyayao bei sikanamimi.
18 Moe tutayana Balomaigu bei asiwoi isou ina
kidi guna pakonayao liliudi
koroto be vevina yaidi nakae,
e bei guna nuwonúwana sikabivalevale.
19-20 Aba kainaopa yábana osasaina goi bei amadagidi.
Aba kainaopayadi moe níyala bei ikamamaníwana
be nakae tukówana matana ivakayakaya ikaika nakae.
Aiyuwoina aba kinana poyapoya goi bei amadagidi.
Aba kinanayadi moe ikaika, yeu sabeninimina
be aubowo gagaina.
Moe dogoiyadi sikavava,
namliyeta baige Yauwe ina Maliyalina gagaina
nakae dedevina bei isowóduwo.
21 Go avatauwa neta Yauwe yaina goi
siduduwo adi vaita manuna,
bei adi yava sibabane.’ ” ’
Iyoeli 2:28-32
22 Pita nava ibobóbwara idigo kana,
‘Komi Isileli tubunao, guna livala ame konovēdi: Yeisu guma Nasareta goi Yaubada guinuwa toogagaidi be aba kinana kainaaopaidi iguinuwedi yaimi. Aba kinanayadi goi ivatulukoimi bego Yeisu bogina ikinave. Moe bogina koyagoi.
23 Ame Yeisuyana ana tonuwotulu iwo inuwotuluye komi nimami goi go, moe Yaubada ina nuwonúwana boi bogina igimilosinapu be igimilovina. E inuwotuluye ikavava, komi imi lovina goi Tauyana sinave kidi Yaubada ina Katukeda ana tokapipilovayao nimadi goi siyato. Tuwo siyoisi, kerose goi situpatuko, e sikaumate.
24 Ame Yeisuyana komi imi lovina goi sikaumate go, ámasa geya itoboineyeta iyoisikavate, tauna ámasa ana yówana goi Yaubada italigei, ikaitaoemnei.
25 Ámasa geya itoboineyeta Yeisu iyoisikavate. Moe ana kamoitamo Devida ina gínina goi tababane. Tauyana italavaite idigo kana,
“Yauwe kakataigu goi ituwanuwo,
e bei geya atameyeta.
Moe pasina tuta liliuna Tauyana agitegite
yaigu goi ikaaiyaka.
26-27 Tauna ategu iuyáwana be sopagu iyapali gagaina.
Aiyuwoina Yaubada,
tokámasa idi dadava goi bei geya kwalaveguta.
Nakae bei geya kutagoneta
yau im koroto kimaasabaigu umam
wowogu valiwoga goi idáura.
Tauna yau tomota tauna go,
ayagoidoko wowoguyana bei geya idaureta.
28 Yáwana dedevina ina kenao bogina kuvatulukoigu.
Im kaiyaka yaigu pasina uyáwana goi kuvakayaodeigu.”
Same 16:8-11
Moe pasina tauna ámasa geya itoboineyeta Yeisu iyoisikavate.
29 Segowo, alatuwokodokoimi bego ame livalayadi geya tubuda Devida manuna geya. Boi Devidayana ikámasa, wowona sikabi sivaliwoge, e ame tuta ina valiwoga tukubu nava ikaaiyaka, nakae itoboineda tagite.
30 Tauna Devida geya toinina manuna ibobóbwara geya. Tauyana Yaubada ina tokabivalavala tayamo, tuwo bogina iyagoi Yaubada ikatótula bego tubuna tayamo nava bei ikinave ietokalibúbuna go, atotulayana bei iguinuwe.
31 Ame Devidayana bogina igimiyagoi, tauna Guyau ina taoyamna ámasa goi manuna ibobóbwara bego Yaubada Guyauyana tokámasa idi dadava goi geya ikalaveyeta, nakae bei geya itagoneta Tauyana wowona idáura. Moe pasina ame livalayadi geya Devida manuna geya, go sem livalayadi moe kina Guyau ina taoyamna manuna.
32 Ame Yeisuyana boi ikámasa go, Yaubada bogina ámasa goi ikaitáoe, e kai madabokima matama goi bogina kagite, e ame kataalavaite yaimi.
33 E tauna Yaubada ámasa goi ikaitáoe ikavava, ikailagasi wowoina basekoina kakataina goi itusobu be nakae Baloma Kimaasabaina boi Tamana bogina ikaatotule ibabane. Tauna kaga ame kogitegite be nakae konovenove moe Balomayana kina Yeisu iisiwoi yaima ina guinuwa.
34 Moitamo Yeisu ituko ina yábana. Devida toinina idigo kana,
“Yauwe ibóbwara guna Tomoya ilatuwoko kana,
‘Kūma wowoina basekoina kakataigu goi kutusōbu
35 ana kadókana im kaleyayao avasobusoobuyedi
kulovinaedi.’ ”
Same 110:1
Ina Tomoyayana idigedige moe Yeisu.
36 Tauna komi Isileli tubunao madabokimi koyagoidōko bego ame Yeisuyana kerose goi kotupatuko, Yaubada bogina ivayoko kina Tomoya be nakae Guyau.’
37 E Pita ina bóbwara boda sinove, sivakúwana, tuwo Pitayana be nakae vamoleyanayaoyadi liliudi silatuwokoidi sidigo kadi,
‘Bogina kabágala! Semao, bei manakaema?’
38 E kina go Pitayana idigo kana,
‘Kotugavīla namliyeta komi tamo tamo kotagōna bego Yeisu Guyau yoina goi kasayoyoimi, e bei imi goyo inuwotaoidi be nakae Yaubada Baloma Kimaasabaina ivinibesoimi.
39 Moitamo. Boi Yaubada ikatótula Baloma Kimaasabaina manuna. Ame atotulayana moe komi manumi, natumiyao manudi be nakae kidi aduwanau goi manudi. Moe avatauwa neta Yauwe ida Yaubada iduduwedi toinina yaina.’
40 Pita livala tuwaina goi ikatumatalidi go, iliiwoledi idigo kana,
‘Kokawanōi Yaubada yaina bego Yeisu ana tokaoliliwoyao goyogoyoidi adi liuna goi iyavemi!’
41 Tuwo avatauwa neta Pita ina livala siuyaone, sisayóyova go, amo maliyalinayana goi Yeisu ana tonumisayao bogina ivaituwedi nakae adi badabada aito tausani (3,000) sisiukoidi.
42 E tuta liliuna sikaasaledi vamoleyanayao idi vatulúkwana goi be nakae abivekoveko goi, aba nuwokavata aikanina goi be nakae awanoi goi.
Yeisu ana tonumisayao idi sinapu
43 E Yeisu ina vamoleyanayaoyadi nimadi goi Yaubada aba kinana kainaaopaidi badabadaidi iguuinuwedi, e tomota liliudi sigitedi, madi matoita Yaubada siwoowoine.
44 E kidi go Yeisu ana tonumisayaoyadi liliudi taiyao sikaaiyaka, e idi sinapu ame nakae: Konadi tayamo, avadi tayamo, adi kwama tayamo, e ame konadiyadi madabokina sikasaledi tomota yaidi.
45 Idi poyapoya maniyena be nakae konadi maniyedi sikaigimonedi go, maisadi sikabidi, avatauwa neta geya konadimo, yaidi goi sikaiguyauyedi.
46 Maliyalina tamo tamo sina Yaubada ina Vada Kimaasabaina goi nuwodi tayamo sisaakululu be nakae idi vada goi aba nuwokavata aikanina siguuinuwe go, madi uyáwana be madi kasala avadi sikaiguyauye tomota liliudi yaidi goi, e taiyao sikakáika.
47 Ago Yaubada siyaapaliye, e kidi boda madabokina sikanuwoiyedi. E kina go Tomoya maliyalina tamo tamo goi maniyena tomota iyavedi, e tauna ina tonumisayao ivaituwedi.