☰ 1 KORINTA 16
Da Korinta idi vininabeso manuna
16
(1 Korinta 16:1-4)
1 E imi lumadádana kidi Yaubada ina kimasabayao tookaidi adi mani ana lamgógana manuna alatuwokoimi. Kaga nakae boi Yaubada ana totugugunayao Galetiya goi alatuuwokoidi siguuinuwe, e komi nakae koguinūwe.† 2 Nakonakae Yaubada mani goi ivaaitemi, e komi tamo tamo imi mani toinimi imi vada goi koyatōidi. Go wiki tamo tamo ana maliyalina vakuumgoina‡ goi komemēdi kolamgōgo, govila bei ao, matagu goi imi mani kolamgogo.
3 E tutayana asowóduwo yaimi, ava korotova bogina kodovatusidi go, bogina kogitedi kidi kabikaaonidi nakae adi tagona adi leta koginidi, e moe tauyadi bei aetunedi imi vininabeso sinave Yerusalema goi. 4 Go neta itoboinegu yau nakae ana, e tauyadi bei sivakitaugu.
Paulo ina livala vaamliyaina
(1 Korinta 16:5-24)
Paulo ina losinapu ina koidádana manuna
5 E namliyeta ana Mesadoniya goi avaníbita, bei ao. Bogina koyagoi. Latuwogu mainao bei ana Mesadoniya.† 6 E nakona yaimi goi bei akaaiyaka mamanao o nakona akaaiyaka ana kadókana tula ana tuta ikavava bego niga itoboinemi bei kovakinaregu guna koidádana manuna, e bei ava dadava goi latuwogu, anonoina. 7 Moitamo. Geya latuwogu tuta kaakupina kaka taiyao takaaiyaka. Neta ida Tomoya itagona, alotuta bei yaimi goi tuta tupwana maanawena akaaiyaka. 8 Go ameko Epeso goi†a bei akaaiyaka ana kadókana Pentikosi†b ana tuta ikavava, namliyeta baige ao. 9 Ameko Yaubada ina kaleyayao badabadaidi sikaaiyaka go, tuwo totom bogina ikatupáeve bei itoboinegu Vala Dedevina atalavaite, e tomota sinumise.
10 E tutayana Timoti† iwo, kogitēmi bego tauyana ana gogo yaimi moe dedevina, e bei geya imatoiteta geya. Tauyana ida Tomoya ina paisewa iguuinuwe yau nakae. 11 Tauna geya vatau tayaamo tauyana ikaolilīve. E tutayana ikalavemi, mana tuboina be ma nimatoona koetūne ima yaigu. Tauyana be sedao maniyedi taiyao atuyaaosidi sima.
12 E siyada Apolosi† manuna kolumadádana, e bei alatuwokoimi. Tauyana bogina akatuliwoledoko bego sedao taiyao sikaluvila siwo yaimi go, geya latuwona ame tuta iwo. Go tutayana tuta ana toboine isowóduwo, e bei iwo.
Paulo ina lovina da Korinta ivinidi
13 Koyauyāusa. Vatulúkwana mooitamoina goi kotaoyaakavāta. Kokatepātu nakae kotogāga. 14 Kaga liliuna koguuinuwedi, mami matakoi koguuinuwēdi.
15 E Stepana† mana bodayauwo bogina koyagoidi bego tauyadi Yeisu ana togiminumisayao Akeya goi go, bogina toinidi sikasaledi kita Yaubada ina kimasabayao yaida goi bego sivaiteda. E tauna akatuliwolemi 16 bego komi nakae kokasalēmi tauyadi yaidi be nakae ava tovaita tauyadi nakae neta sipaaisewa o Yeisu manuna sipooisógana yaidi goi. 17 E Stepana be Potunatu be Akaiko bogina sima. Tauyadi komi imi katumapu sivaitegu, tauna tauyadi idi sowóduwo pasina auyáwana. 18 Komi be yau balomaida sikitogagedi. Tauna tomota amo tauyadi nakae kowowoinēdi.
Auyagu be yabobona da Korinta yaidi
19 Kidi Yeisu ana totugugunayao Esiya dadavina goi idi yabobona yaimi. Akuila be Pirisika† be nakae tauyadi idi vada goi sisaakululu, e imi spwagógana ida Tomoya taiyao pasina idi yabobona sietune iwo yaimi. 20 Sedao ameko goi idi yabobona yaimi. Sedao moeko goi koyoowoiīdi nakae komi kimaasabaimi Yaubada umana itoboinemi.
21 Ame guna yabobonayana yau Paulo toinigu nimagu goi agini. Yau nakae guna yabobona yaimi.
22 Avatauwa komi neta ida Tomoya geya komatakoiyeta, Yaubada itoboine ikatubolatemi.
Ima Tomoya, kūma!‡
23 Ida Tomoya Yeisu ina kanuwóiya bei ikaaiyaka yaimi goi.
24 Guna matakoi madabokimi yaimi ida spwagógana Guyau Yeisu taiyao pasina.
 
Yau Paulo be Sositeni
† 16:1 Gui 16:6; Rom 15:25-26. ‡ 16:2 Wiki tamo tamo ana maliyalina vakuumgoina: Ame Sande. † 16:5 Gui 19:21. †a 16:8 Gui 19:8-10. †b 16:8 Vin 23:15-21; Atu 16:9-11. † 16:10 Gui 16:1,3, 17:14-15, 18:5, 19:22, 20:4; Rom 16:21; 1Ko 4:17; 2Ko 1:19; Pil 2:19; 1Tk 3:2,6; 1Ti 6:20; Ibe 13:23. † 16:12 1Ko 16:12; Tai 3:13. † 16:15 1Ko 1:16. † 16:19 Gui 18:2,18,26; Rom 16:3,19; 2Ti 4:19. ‡ 16:22 Ima Tomoya, kūma: Da Giriki niyadi ameko kadi, ‘Marana tha.’ Moe aníyana yoina Arameika. Ana yagoina kada, ‘Ima Tomoya, kūma!’
☰