☰ 1 KORINTA 5
Da Korinta idi goyo manudi Paulo ibowoidi
5
(1 Korinta 5:1—6:20)
Toogoyoina yaimi goi kolivisīye
1 Vala anove woi masisi goyogoyoina yaimi goi ikaaiyaka ame nakae: Koroto tamana monena imasisiye go, goyo amo moe goyo gagaina toina. Kidi Totuyoyowo geya sinumiseta amo goyoyana geya siguinuweyeta!† 2 Goyoyana manuna konuuwatue go, manakae? Itoboine nuwomi imou? U nakae. Nuwomouyana pasina itoboine korotoyana kolivisiye! 3 Nakona yau geya maisigumo yaimi goi go, Baloma Kimaasabaina goi akaaiyaka yaimi. E tuwo korotoyana ina guinuwa pasina bogina atakino. Takinonayana ame nakae: 4 Tutayana ida Tomoya Yeisu yoina goi komi be yau balomaigu tatugúguna ida Tomoya Yeisu ina togaga taiyao, 5 e korotoyana tayato Kaleya nimana goi sakavaina ana tusáwala manuna bego tauyana balomaina ana yava ida Tomoya ana maliyalina goi ibabane. 6 Goyoyana yaimi manuna kouyawana gagágasa go, imi gagasayana geya itoboineyeta.†a
Komi manakae! Geya koyagoiyeta bego isti giyaina go, isiu ina parawa madabokiina goi isagayako?†b 7 Kokimavadēmi ame nakae: Korotoyana yaimi goi isti bogo nakae kokābi, kokalāve bei komi parawa vau nakae unana komi maavadaimi parawa geya ana istimo nakae. Moe itoboine. Guyau moe kita ida Basitáwana Aikanina ana lami bogina sikaumate sikasale,† tauna kita maavadaida. 8 Tauna aikayana mada uyáwana taguinūwe go, geya kada isti bogo goi nakae goyo istina goi geya, go sem beredi pokaka goi aikayana takāika.† Berediyana moe sinapu maavadaina nakae mooitamoina.
9 Ami leta bogina boi aetune iwo alatuwokoimi kagu,
‘Tomasisi goyogoyo taiyao taabu kokabiveekovēko.’
10 Guna livalayana maniyemi kotainasiye. Imi tainasiyana ame nakae: Tomotayadi aadigedi geya kada toogoyoidi tuyooyowoidi geya, nakae tomasisi goyogoyo o tomatakónana be továobuna o yaubada polapola adi tosakululu. Neta moe tauyadi bego kovakilisidi, komi itoboine poyapoya ana madabokiina kokalave bego kovasiyasiyaedi. 11 E moe geya guna nuwonúwana geya. Tuwo ame tuta guna nuwonúwana atalavaite. Avatau neta idigo kana, ‘Yau tonumisa tayamo’ go, neta masisi goyogoyoina iguuinuwe o imaatakónana o yaubada polapola yaidi isaakululu o iitagíwaya o oine inim ginagina o iiváobuna, e taiyao taabu kokabiveekovēko nakae taiyao taabu kokakāika. 12 Bogina koyagoi. Tomota moetala adi takínona moe geya kita ida polava geya, go sem tauyadi Yeisu ina kali goi neta goyo siguuinuwe tatakinōidi. 13 E tauyadi moetala goi Yaubada itakinoidi go, toogoyoina yaimi goi kolivisīye.†
† 5:1 Vin 18:8; Atu 22:30, 27:20. †a 5:6 Yem 4:6. †b 5:6 Gal 5:9. † 5:7 Tat 12:5. † 5:8 Tat 12:14-15; Atu 16:3. † 5:13 Atu 13:5, 17:7, 19:19, 22:21, 24, 24:7.
☰