22
Lovina vaináwana manuna
1 E Yauwe tuwaina kana,
‘E avatau neta bulumakau tayamo o sipi tayamo ivainao go, ikaumate talaina ikaigimone, e bulumakauyana ana katumapu moe bulumakau ainima toni yoguyogu ivini. Go sipiyana ana katumapu moe sipi aivasi toni yoguyogu ivini.
2-4 Go neta yoguyoguyana iivainao nava maa yawoina nimana goi ikaaiyaka, nakona bulumakau o ase o sipi, e yoguyoguyana ana katumapu moe aiyuwo toni yoguyogu ivini.
E tovaináwana neta sabamgo goi imi vada isiu bego ivaináwana go, kogitebabane go, koláui ikámasa, e moe aumata geya, tuwo geya ami goyomo. Go neta níyala bogina ituko go, tovainawanayana isiu, koláui ikámasa, moe aumata, e bogina kogoyo.
E tovaináwana, neta koyoisi, itoboine toni kónana ikatumapu go, neta tauyana geya konanamo, tuwo koyōisi kokaigimōne bei tauyana paakonina go, manina toni kónana kovini.’
Lovina kónana manudi
5 E Yauwe tuwaina kana,
‘E avatau neta ina yoguyogu toinina ina limou tanuina goi o ina oine tanuina goi ikakáika go, yoguyoguyana itagone ina siyana ina tánuwo goi ikáika, e toni yoguyogu ina dibayoya dedevina toina bei ikatumapu, siyana ivini.
6 E avatau neta yeu idimili go, yeuyana taliboibo inínima ina siyana ina tánuwo witi gugunidi igabudi o neta witi nava geya sitalaidita go, igabudi, e moitamo amo tauyana bei ikatumapu.
7 E avatau neta ana mani o konana tayamo siyana ivini bego irugwausi go, tovaináwana ina ivainao, neta tovainawanayana koyoisi, e ana katumapu aiyuwo toni kónana ivini.
8 Go neta tovainawanayana geya koyoisiyeta, e torugwáuta kokābi kōme Yaubada yaina go, ilovina nakona tauyana toinina ivainao o geya.
9 Vaináwana liliudi goi nakona bulumakau o ase o sipi o kwama o ava kónana itagau, neta manudi toni kónana siyana konana igite toinina konana maisiyana, tuwo idigo kana, “Moe konagu”, e adi taiyuwo bei sina Yaubada matana goi. Avatau neta Yaubada itakino tovaináwana, e tovainawanayana bei ana katumapu moe kónana aiyuwo siyana ivini.
10 E avatau neta ina ase o ina bulumakau o ina sipi o ava yoguyogu siyana ivini bego irugwausi go, yoguyoguyana ikámasa o ivailai o itagau go, tomota geya sigiteyeta,
11 e adi taiyuwo bei sitaoya Yau Yauwe matagu goi go, torugwáuta ikanatamada kana,
“Yau yoguyoguyana geya abisikoneyeta.”
Tauna torugwautayana geya ikatumapuyeta, e nakae toni yoguyogu geya tuwaina iboboreta.
12 Go neta moitamo tomota ivainao, e torugwautayana bei ikatumapu toni yoguyoguyana yaina.
13 Go neta woiwoi sima yoguyoguyana sikamate, e torugwáuta yoguyoguyana kaamasina ikabi ime aba kinana manuna, tauna torugwautayana geya ikatumapuyeta.
14 E avatau neta siyana ina yoguyogu ikatoguye go, yoguyoguyana ikámasa o ivailai go, toni yoguyogu geya ikaiyaketa, e moitamo tokatoguyana itoboine bei toni yoguyoguyana iemaisi.
15 Go neta yoguyoguyana ikámasa o ivailai toni yoguyogu matana goi, e tokatoguyana geya ikatumapuyeta. Go neta siyana ina yoguyogu ina paisewa manuna iemaisi go, yoguyoguyana ikámasa o ivailai, e torugwáuta bogina iemaisi, tuwaina tuwo.’
Lovina masisi goyogoyoina manuna
16 E Yauwe tuwaina kana,
‘Neta vavina tayamo geya ana kanaotamo be nakae geya ana kamatakonamo go, koroto tayamo ina vavinayana iloidibi bego taiyao simasisi, e vavinayana osenao bei iemaisidi go, itoboine koroto be vavina sinai.
17 Go neta vavinayana tamana geya itagoneyeta sinai, e korotoyana bei iemáisa vavina buwona.’
Lovina sinapu aumata manuna
18 E Yauwe tuwaina kana,
‘Ava vavina iibowou, e amo tauyana taabu kootagōna maa yawoina ikaaiyaka.
19 Avatau neta yoguyogu taiyao simasisi goyogoyo, e amo tauyana kokaumateyāmo.
20 Avatau neta yoguyogu igabu ikasale ituli ta yaubada yaina go, Yau Yauwe agutava yaigu geya, e amo tauyana kokasāle yaigu aná mtula manuna.
Lovina toneneta manudi
21 Ogaoga taabu kobaagalīdi be nakae taabu koyogedeegedēdi. Neta konuwaisi, boi komi nakae ogaoga Itipita goi.
22 Kóbuya be gumalau liliudi taabu kokitaaitaiyēdi.
23 Neta kovaobudi go, situmadadegu, moitamo bei anovedi,
24 e magu egamogamogu imi kaleyayao nimadi goi bei akaumatemi, e bei monemiyao sikóbuya nakae natumiyao siegumalau.
25 E, neta kotagona bego tookaina tayamo komi guna bodao yaimi mani ikatoguye, e komi nakae toni rowaga tokainayana yaina ana katumapu taabu kokaailagāsi.
26 Neta siyami konami ikatoguye yaimi go, siyamiyana ina tanigo kokabi go, niga mainao igimitatete baige ikabimnei, e namliyeta níyala isaliu, e kōna ina tanigo kovinimnēi.
27 Bogina koyagoi. Moe nakona ina tanigo tayamo toito. Tauna manakaena bei imasisi? Neta itumadadegu, bei anove. Yau tonuwokapisi.
28 Yau Yaubada taabu kotagiiwoīgu be nakae taabu imi tolovinao kokatuboolatēdi.
29 Taabu kokaaimūmuna imi dibayoya witi be oine keuwokumgoidi adi vininabeso kokasaledi yaigu. Imi botomoyayao koroto bei kovinīgu.
30 E nakae imi bulumakauyao be imi sipiyao yaidi idi botomoyayao bolamo bei kovinīgu. Tutayana yoguyoguyadi sibíbina, maliyalina ainima aiyuwo goi bei sikaaiyaka sinadiyao taiyao. Go maliyalina ainima aitonina goi, kovinīgu.
31 Komi kimaasabaimi umagu, tauna neta woiwoi yoyowo goi yoguyogu tayamo sikamate sikalave, e taabu kokanikāni, go sem kokalāve. Moe weiniya avadi.’