31
Tokatanaki adi kinava
1 E Yauwe ilatuwokoigu idigo kana,
2 ‘Kunōve. Kure, ma Yuda, natuna moe Urai, e tubuna moe Besaleli. Ame tauyana bogina akinave.
3 Tauyana bogina avakayaodei Yau Yaubada Balomaigu goi, tauna mana nanamsa be mana katanaki be nakae ana kaipata paisewa liliudi dedevidi iguinuwedi.
4 Tauyana ana kabitam goura be siriba be nakae kopwa adi paisewa goi.
5 Nakae gurewa esaaesaidi adi paisewa be nakae alova ana gínina bogina ana kaipata iguinuwedi.
6 E kunovēgu. Akisamaki ma Dani natuna yoina Oliyavi bogina akinave bei ipaisewa Besaleli taiyao. Guna katanaki topaisewa liliudi bogina avinidi bei tauyadi adi kaipata kaga liliuna alatuuwokoim simadagidi.
7 Dogoiyadi ame nakae: Guna Kaba Valoboda, aba vatulúkwana dedeogaina, aba núwala dedeogayana yatana, guna Kaba Valobodayana konanina liliudi.
8 Konaninayadi ame nakae: Teboro ma konanina, rampa adi kaba yata goura maavadaina ma konanina, insensi ana kaba kasala,
9 aba kasala vininabeso ana kaigabu manuna ma konanina, nokobaba ma kaena kopa,
10 Tonúwala Eroni ma natunao adi kwama dedevidi be kimaasabaidi adi paisewa manuna,
11 pútuma aba kaipaku be nakae insensi mainina dedevina Bateta Kimaasabaina manuna. Moe dogoiyadi bei simadagidi nakae bogina alovinaem.’
Vatulúkwana maliyalina aba waiwasi manuna
12 E Yauwe tuwaina ilatuwokoigu idigo kana,
13 ‘E kom Isileli tubunao kulatuwokōidi kudīgo kam,
“Yauwe ilovinaeda kana, ‘Yau guna maliyalina aba waiwasi ana lovina kokabiikaōne. Maliyalinayana aba kinana komi be Yau Yauwe yaida ame tuta be nakae tuta simamaima bei koyagoi bego Yau Yauwe bogina akimasabemi umagu.
14 Maliyalina aba waiwasiyana ana lovina kokabiikaōne. Ame maliyalinayana kimaasabaina yaimi. Avatau neta lovina ame ikapipilave, tauyana kokaumāte. Avatau neta amo maliyalinayana goi paisewa tayamo toito iguinuwe, tauyana geya guna boda geya, tauna yaimi goi kolivisīye go, kovatapīye.
15 Maliyalina ana badabada ainima tayamo goi imi paisewa koguuinuwēdi go, maliyalinayana ainima aiyuwoina moe aba waiwasi, paisewa goi kosayāta; moe kimaasabaina Yau Yauwe umagu. Avatau neta amo maliyalinayana goi ipaisewa, kokaumateyāmo.
16 Komi Isileli tubunao maliyalina aba waiwasi ana lovina kokabiikaōne tuta liliuna. Maliyalinayana moe guna kanasíuna ikaiyako vata yaimi goi. Tauna malamalágata tamo tamo simamaima bei sikabiikaone.
17 Ame aba kinanayana ikaiyako vata komi be Yau Yauwe yaida. Yau nakae. Maliyalina ainima tayamo goi yábana be poyapoya amadagidi go, maliyalina ainima aiyuwoina goi paisewa asayata bei awaiwasi.’ ” ’
18 E Koya Sainai yatana goi Yauwe ibóbwara ikavava, e gurewa aiyuwo paaevaidi ivinigu. Gurewayadi yatadi Yaubada toinina nimana goi ina kanasíuna ana kaba vatulúkwana bogina iginidi.