☰ GALETIYA 3
Da Galetiya bogina Yaubada ina bodao
mooitamoidi idi numisa pasina
3
(3:1—4:31)
Baloma Kimaasabaina
ina paisewa da Galetiya yaidi goi
1 Iyaa! Komi da Galetiya yaaluwoimi! Ami kaigigita nakona tomota tayamo ibolatemi, e nuwomi ikiwowonidi! Kaga unana tovatulukwana polapola koonovedi? Boi Yeisu Guyau ina kámasa kerose goi ana yagoina bogina ataligeidoko yaimi, e bogina koyagoidoko ina kámasa goi manakaena ivaiteda. 2 Dogoi tayamo toito latuwogu kolatuwokoigu bei ayagoi. Dogoiyana ame: Yaubada ina Katukedayana ana guinuwa‡ pasina Baloma Kimaasabaina kobabane, gea Vala Dedevina ana talavaita konove konumise pasina kobabane? Valayana ana numisa pasina ae? 3 Moitamo komi yaaluwoimi! Iyaa! Imi numisa ana kaba vatowo Baloma Kimaasabaina ina togaga goi kooketoiya go, manakae? Bego toinimi sakavaimi ana guinuwa goi imi numisayana kokimatuwe ae? 4 Manakae? Kaga liliuna dedevidi siisowóduwo yaimi sisowoduwo beso? Anuwonúwana geya. 5 E tauna ame nakae: Yaubada Balomaina ikaiguyauye yaimi be nakae yaimi goi guinuwa toogagaidi iguuinuwedi go, kaga pasina amo dogoiyadi iguuinuwedi? Ina Katukedayana ana guinuwa pasina gea Vala Dedevinayana ana talavaita konove konumise pasina? Valayana ana numisa pasina ae?
Da Galetiya idi numisa
Eberamo ina numisa nakae
6 Eberamo nakae. Buki Kimaasabaina idigo kana,
 
‘Eberamo inumisa Yaubada yaina, e ina numisayana Yaubada igite, ikamoitamoe bego kina Eberamoyana moe Yaubada nuwona ana tokibóbwata.’†
Aba Vatowo 15:6
 
7 Tauna latuwogu koyagoi bego kidi numisa tomotaidi, e moe tauyadi Eberamo ina bodao mooitamoidi.‡† 8 E boi nimatu Yaubada bogina igimilovina bego Totuyoyowo idi numisa pasina bei ivayokoidi kidi kiboobosidi ina kanasíuna manuna. Tauna Yeisu nava geya imaita go, Yaubada Gínina Kimaasabaina goi Vala Dedevina igimitalavaite Eberamo yaina idigo kana,
 
‘Totuyoyowo liliudi poyapoya ame goi bei siyagoi kom goi akaipakuyedi.’†
Aba Vatowo 12:3
 
9 Tauna avatauwa neta numisa tomotaidi, e aipakuyana boi Eberamo numisa korotoina iibabane kidi nakae sibabane. Tauna guinuwa pasina geya.
10 Moe moitamo. Yaubada ina Katukeda ana guinuwa tomotaidi liliudi Yaubada ina takínona moumouna goi sikaaiyaka, tauna geya itoboinedita Tauyana ina kaipaku sibabane. Gínina Kimaasabaina nakae idige kana,
 
‘Avatauwa neta lovina liliudi Yaubada ina Katukeda bukina goi‡ geya siyoisikavatedita nakae geya siguinuwedita, tauyadi Yaubada ina takínona moumouna goi sikaaiyaka.’
Atukeda 27:26
 
11 E Atukedayana ana guinuwa pasina geya vatau tayaamo Yaubada ivayoko kina kiboobosina ina kanasíuna manuna geya, tauna ame bogina imavada unana Gínina Kimaasabaina idigo kana,
 
‘E kina tokibóbwata numisa goi iiketoiya.’†
Abekuki 2:4
 
12 E Yaubada ina Katukedayana ana kenao ituli. Atukedayana unana moe numisa geya, go sem unanayana moe guinuwa. Moe nakae Gínina Kimaasabaina idige kana,
 
‘Avatau Yaubada ina Katukeda ina lovina iguinuwedi, bei ina guinuwayadi goi iketoiya.’
Vininabeso 18:5
 
13 E kina go Guyauyana ima Yaubada ina Katukeda ana mou goi itateteda ame nakae: Itoboineda mouyana tababane go, kina Guyauyana itagona kerose goi situpatuko ikámasa, kita ada katumapu. Moeko goi kina mouyana ibabane go, kita geya. Moitamo mouyana ibabane nakae Gínina Kimaasabaina itaalavaite, idigo kana,
 
‘Avatau neta alova goi sikosaine, e tauyana Yaubada ina takínona moumouna goi ikaaiyaka.’
Atukeda 21:23
 
14 Itateteda bego Yaubada ina kaipakuyana boi ikaatotule Eberamo yaina kidi Totuyoyowo nakae bei sibabane idi spwagógana Guyau Yeisu taiyao pasina.† Moe bego Baloma Kimaasabaina boi Yaubada ikaatotule kita ida numisa goi tababane.
Yauwe ina kanasíuna
Eberamo yaina goi ikaiyako vata
15 Segowo, aba gita tayamo aguinuwe. Aba gitayana moe kita tomota ada dadava goi. Neta boda aiyuwo taiyao tomota matadi goi sikanasíuna, e anasiunayana aiyako vaatayaina, tauna geya vatau tayaamo itoboine anasiunayana iligei o ikatusavi geya, go sem ikaiyako vata nakae mainao sikanasíuna. E aba gitayana moe kita tomota ida sinapu anasíuna manuna go, Yaubada ina kanasíuna Eberamo yaina nakae. 16 E ina kanasiunayana goi ikatótula go, ina katotulayadi moe Eberamo mana boda yaidi. Ago geya idigoita bodao; moe ana yagoina badabadaidi, go sem kana, ‘Ina boda.’ Moe ana yagoina tayamo go, ame tayamoyana moe Guyau.‡† 17 E ame guna masi adigedige: Mainao Yaubada mana katótula igimikanasíuna Eberamo yaina; anasiunayana moe aiyako vaatayaina. Go tala ana badabada 430 sikavava,† Yaubada ina Katukeda Mosese ivini go, Atukedayana geya itoboineyeta anasiuna bogo iligei bei ana katotulayadi dogoi besobeso. 18 Moe moitamo. Kaga Yaubada ikaatotule bego ivinibesoida geya ivinideta ina Katukeda ana guinuwa pasina geya, go sem ivinibesoida ina katótula pasina. Eberamo nakae. Tayagoi kaga boi Yaubada ikaatotule tauyana yaina ivinibeso unana ikatotule.†
19 Nakona komi konuwonúwana kami,
‘Neta nakae ina katotulayana pasina ivinibesoida, kaga pasina Yaubada ina kanasíuna ikatusavi, e ina Katukeda Mosese ivini?’
Apipilova pasina bego tayagoi nako apipilova. Go Atukedayana Mosese ivini bei ipaisewa ana kadókana bodayana ima. Bodayana moe Guyau boi Yaubada ikatotule Eberamo yaina.‡ Yaubada ina Katukeda anerose ivinidi go, kidi Mosese sivini; tauyana tomota adi togúdala. 20 Go tauyana geya Yaubada ina boda tayamo ana togúdala geya. E kina go Yaubada tayamo, tauna ina boda tayamo, Diyuu be Totuyoyowo taiyao.
21 Tauna nakona maniyemi konuwonúwana Yaubada ina Katukeda be ina katótula sivakaleya. Geya, geya toina! Ina Katukeda be ina katótula idi paisewa ituli ituli. Neta Yaubada boi lovina tayamo ivinida, e takabikaone bego yawoida vau tababane, e lovinayana ana kabikáwana pasina moitamo woi kita anasíuna ana tokibobwatayao. 22 Go moe nakae geya iguinuweyeta, go sem Gínina Kimaasabaina‡a tomota liliudi poyapoya goi ikaukabolidi, goyo ina togaga ogalaoina goi sikaaiyaka bego Yeisu Guyau ina kabikáwana aba numisa‡b pasina kaga Yaubada boi ikaatotule Eberamo yaina ivinida kita ina tonumisayao.
23 E tutayana tokabikáwana‡ nava geya imaita, Yaubada ina Katukeda ikaaiyaka kai Diyuu ikaukabolima; kai deri ana tokaiyakayao nakae iyaausima ana kadókana Yaubada tokabikawanayana ikaiwoduwe. 24 Tauna Yaubada ina Katukedayana kai ama tokabigómana nakae go, ilovinaema ana kadókana Guyau ima bego numisa pasina Yaubada ivayokoima kai kiboobosima ina kanasíuna manuna. 25 E Tokabikawanayana bogina ima, tauna ama tokabigomanayana geya tuwaina itoboine ilovinaema unana ina tuta bogina ikavava. 26 Moitamo. Imi spwagógana Guyau Yeisu taiyao pasina komi liliumi imi numisa goi Yaubada natunao. 27 Bogina koyagoi. Tutayana liliumi sisayoyoimi, Guyau taiyao kospwagógana, tauna Tauyana yawoina kwama nakae bogina kokote. 28 Tomota liliuda tavavasa be nakae geya tayaamo aliupa ikaaiyaka bego ilivisida ta boda be ta boda. Aliupayadi nakae Diyuu be Totuyoyowo, kidi paakonidi be kidi taliigavidi, koroto be vevina. Ame aliupayadi bogina sikavava unana madabokida ida spwagógana Guyau Yeisu taiyao pasina bogina taeboda tayamo. 29 E komi moitamo Tauyana ina bodao, tauna komi moitamo toina Eberamo ina boda. Moeko goi kaga Yaubada ikaatotule Eberamo yaina komi nakae bei kobabane.†
‡ 3:2 Yaubada ina Katukedayana ana guinuwa: Ame nakona ava lovinava Atukedayana goi neta imavada bego Diyuu boda ituli, e Totuyoyowo ituli. Lovinayadi moe sakava ana kúpwana, áika ana lovina, abivekoveko ana lovina be nakae lovina maliyalina maniyedi manudi nakae Sabati. † 3:6 Rom 4:3,9,22; Yem 2:23. ‡ 3:7 Eberamo ina bodao: Da Giriki niyadi kadi, ‘Eberamo natunao’ go, amo ana yagoina ‘Eberamo ina bodao’ unana ida numisa tauyana nakae. Neta kita Eberamo natunao nakonakae boi Yaubada ikatótula tauyana yaina, e moe nakae ikatótula kita yaida. † 3:7 Rom 4:16. † 3:8 Abv 18:18, 22:18, 26:4, 28:14; Gui 3:25. ‡ 3:10 Yaubada ina Katukeda bukina: Ame Aba Vatowo, Tateta, Vininabeso be Atukeda. Amo bukiyadi Mosese iginidi. † 3:11 Rom 1:17; Ibe 10:38. † 3:14 Abv 12:3, 18:18, 22:18, 26:4-5, 28:14. ‡ 3:16 Ame tayamoyana moe Guyau: Ameko Paulo ina nuwonúwana bego boda tayamo moe Yeisu mana tonumisayao. † 3:16 Abv 12:3,7, 13:15, 17:7, 22:18, 26:4, 28:14. † 3:17 Abv 15:13-14; Tat 12:40; Gui 7:6. † 3:18 Rom 4:14. ‡ 3:19 Aba Vatowo 12:3 goi Yaubada Eberamo ilatuwoko idigo kana, ‘Boda liliudi poyapoya goi bei siyagoi kom goi akaipakuyedi.’ Yaubada manakaena bei ikaipakuyedi? Ame Yeisu idigedige, tauna Yeisu goi tomota liliudi ikaipakuyedi. ‡a 3:22 Gínina Kimaasabaina: Ame nakona Yaubada ina Katukeda idigedige. ‡b 3:22 Yeisu Guyau ina kabikáwana aba numisa: Enao aiyuwo sikaaiyaka bego da Giriki niyadi takaigavile. Tayamo mae nakae. Go aiyuwoina itoboineda takaigavile kada, ‘Ida numisa Yeisu Guyau yaina.’ ‡ 3:23 Tokabikáwana: Da Giriki niyadi ame livalayana ana yagoina aiyuwo. Tayamo itoboineda kada, ‘Tokabikáwana’ go, aiyuwoina itoboineda kada, ‘Numisa.’ Neta ana yagoina moe Tokabikáwana, e ame Yeisu idigedige. Go neta ana yagoina moe numisa, e moe ana yagoina numisa ana kenao bego Yaubada ivayokoida kita tokibóbwata. † 3:29 Rom 4:13, 8:17.
☰