9
Yeisu ina tovatotowanayao yawou aiyuwo
adi lovina ivinidi ivamoleyedi sina sitalavaita tetelina
(Madiu 10:1,5-15; Maki 6:7-13)
1 E Yeisu ina tovatotowanayao yawou aiyuwo iduduwedi sima. Sima, togaga be lovina ivinidi bei itoboinedi dimoni liliudi sivatapiyedi be nakae tokatówana sikidedevinedi.
2 Ivinidi ikavava, ivatulukoidi namliyeta ietunedi sina Yaubada ina kalibúbuna valena sitalavaite be tokatówana sikidedevinedi.
3 Ina vatulukwanayana goi latuwona Yaubada sinumise, tauna idigo kana,
‘Imi vaníbita goi nima kaka kōna. Aituko geya, wasare geya, ami kinare geya, mani geya, kwama aiyuwoina geya.
4 Ava vada goi neta siuyaonemi, kosīu go, vadayana goi kokaaiyāka ana kadókana asayana kokalave.
5 Avatauwa neta geya siuyaonemita, asa amo kokalāve go, tutayana kosowóduwo asayana kaukauna aemi goi kokatumaumāui. Moe imi katumátala tauyadi yaidi bego Yaubada itavileiyedi.’
6 E tuwo sitaoya sina asa tamo tamo goi sivanibiníbita go, ava kasa goi sisiu, amoko goi Vala Dedevina sitaalavaite tomota yaidi be idi tokatowanayao sikidedeevinedi.
Erodi Yeisu itaainasiye tetelina
(Madiu 14:1-12; Maki 6:14-29)
7 E tolovina Erodi Yeisu ina guinuwa liliuna valena inove go, nukotona iwówana unana Yeisuyana manuna tomota maniyedi sidigodigo bego amo Iyoni go, tokámasa yaidi goi Yaubada bogina ikaitáoe.
8 E kidi go maniyedi sidigodigo bego Tauyana Eliyau, e bogina isowóduwo. E kidi go maniyedi sidigodigo bego Tauyana tokabivalavala nakae boi Yaubada ina tokabivalavalayao yaidi ámasa goi itaoyamna.
9 E tauna Erodiyana nukotona iwówana, tuwo idigo kana,
‘Boi yau guna lovina goi Iyoni nukotona sibobo. Go koroto amo ina guinuwa valena anovenove nakona avatau?’
Tuwo ipoikiki bego Yeisu igite.
Boda 5,000 Yeisu ivaakanidi tetelina
(Madiu 14:13-21; Maki 6:30-44; Iyoni 6:1-15)
10 Yeisu ina vamoleyanayao sikaluvilamna sima Tauyana yaina go, kaga liliuna idi vaníbita goi siguuinuwedi sivatétala adi kaibako. Tuwo Yeisu ikabidi, boda asa amo goi sikalavedi go, taudiva sina asa yoina Betesaida.
11 E kidi go bodayadi tutayana sinove Yeisu mana tovatotowanayao sina Betesaida, Galili Bwaena sivanibisi sisabokuliyedi. Sima, Yeisu iuyaonedi go, ivatowo Yaubada ina kalibúbuna manuna ivatulukoidi. Go avatauwa neta siikatówana ikidedevinedi.
12 E bogina lavilavi toina yawou aiyuwo sima Yeisu silatuwoko sidigo kadi,
‘Ame yoyowo go! Neta boda kuvalilivēdi bego sina asa maniyedi kikida goi vada be awoinu silusala.’
13 Go kina idigo kana,
‘Komi kovakanīdi.’
‘Manakaema? Kai ama beredi ainima, íyana aiyuwo taudi go! Manakae, kana boda ame go, giyaina kaeda avadi kagimona?’ kidi kaedi.
14 Moe moitamo. Boda gagaaina go, atuyáivina goi koroto kaka adi badabada moe 5,000! E Yeisu idigo kana,
‘Kōna boda kokiwotāidi go, gúguna tamo tamo moe 50 kolatuwokōidi situsobu.’
15 Tuwo nakae siguinuwe. Sina boda madabokidi silatuwokoidi situsobu.
16 E berediyadi ainima be iyanayadi aiyuwo Yeisu sivini ikabidi, ikandolaga yábana goi, manudi ikauyagu Yaubada yaina. Ikavava, beredi be íyana ikivisidi, ina tovatotowanayao ivinidi, e kidi sikabidi sina sikaiguyauyedi bodayadi yaidi.
17 Tuwo tomota madabokidi sikáika gamodi. Sikáika ikavava, ina tovatotowanayaoyadi valala sikatunokunokudi go, moe bayao yawou aiyuwo sikayaoda.
Pita ina kamoitamo Yeisu manuna
be nakae Yeisu ana sabokuli manuna
(Madiu 16:13-28; Maki 8:27-31,34-38)
18 Tuta tayamo Yeisu ina tuta awanoi goi ina tovatotowanayao taiyao sikaaiyaka, tuwo ilumadadedi idigo kana,
‘Boda sibobóbwara koonovedi manakaedi sinuuwonúwana yau manugu?’
19 ‘Tomota maniyedi sidigodigo bego kom Iyoni tosayóyova. Go maniyedi sidigodigo bego kom Eliyau. Go maniyedi sidigodigo bego kom Yaubada ina tokabivalavala tayamo boi nimatu ikaaiyaka go, ame ámasa goi bogina kutaoyamna’, tauyadi kaedi.
20 E Yeisu idigo kana,
‘Go komi manakaemi konuwonúwana yau manugu?’
E kina go Pita idigo kana,
‘Kom Guyau, Yaubada ana Vadámana!’
21 E Yeisu ikatumatalidi be nakae ilovinaedi idigo kana,
‘Moe geya vatau tayaamo kolaatuwōko.
22 Tomalatomota gedageda badabadaidi bei ibabanedi. Aiyuwoina tomoyamoya be Tonúwala Gagaidi be nakae Yaubada ina Katukeda ana tovatulukwanayao bei sikatae namliyeta sikaumate go, maliyalina aitonina goi Yaubada bei ikaitáoe.’
23 E tomota madabokidi ilatuwokoidi idigo kana,
‘Avatauwa komi neta latuwomi kosabokuuliyegu, toinimi yawoimi kokaasalēdi be nakae maliyalina tamo tamo goi toinimi imi kerose kokaavalēdi, namliyeta baige kōma kosabokuliyēgu.
24 Ame moitamo. Avatauwa bego yawoidi sivagagale, e nava yawoidi vau bei sitagau. Go avatauwa neta yau pasigu yawoidi sitagau, e nava yawoidi vata bei sibabane.
25 Guna nuwonúwana ataligei. Yawoimi moe dogoi gagaina. Nakae neta poyapoya esaesaina gagaina madabokina kokabi go, yawoimi sitagau vata, e bei kaga ana dedevina? Geya.
26 Moitamo. Avatauwa neta yau silawoiwoiyegu be nakae guna livala silawoiwoiyedi, nava tutayana Tomalatomota bei ima ana káeyana tomoeeyalina, Tamana ana káeyana tomoeeyalina be nakae ina aneroseyao kimaasabaidi adi káeyana tomoeeyalina ivagiitakoedi, e nakae bei ilawoiwoiyedi.
27 E ame abóbwara moitamo yaimi konōve: Tutayana Yaubada ina kalibúbuna ima ina bodao ikaliibubudi, e komi maniyemi ameko kootaoya nava bei maa yawoimi kogite.’
Yeisu ana kaigigita ikaanagavila tetelina
(Madiu 17:1-8; Maki 9:2-8)
28 E moe bobwarayadi sikavava, maliyalina ainima aito nakae mlidi Yeisu itaoya, Pita, Iyoni be Yemesa ikabidi, sina koya goi situko awanoi manuna.
29 Tuwo Yeisu ikaawanoi go, maisina ana kaigigita ituli. Ana kwama sivapopowou nakae sinamanámala.
30 Ago koroto adi taiyuwo sisowóduwo, Yeisu taiyao sibobóbwara. Korotoyadi moe Mosese be Eliyau.
31 Tauyadi madi káeyana tomoeeyalina sisowóduwo, Yeisu ina tuta poyapoya ame ikalave sivaateteli. Moe giyakainava Yerusalema goi bei iguinuwe.
32 E kina go Pitayana ma senao taiyao matadi simasisi nukotodi nava mamaina. E sikaliwoisa matadi silala, Yeisu ana káeyana tomoeeyalina sigite go, koroto adi taiyuwo nakae sigitedi Yeisu kikina siitaoya.
33 Korotoyadi Yeisu siikalave go, Pita Yeisu ilatuwoko idigo kana,
‘Guna Tomoya, ame dedevina kita ameko takaaiyaka. Manakae? Yoyou aito kayowóidi? Tayamo kom im yoyou, tayamo Mosese ina yoyou, tayamo Eliyau ina yoyou.’
Go Pitayana geya iyagoiyeta manakaena ibobóbwara.
34 E tauyana nava ibobóbwara go, gaota isowóduwo ima iumaidi. E tutayana iiumaidi, kidi simatoita.
35 Iumaidi go, gaotayana goi níyana tayamo sinove, idigo kana,
‘Ame Natugu, guna kinava. Tauyana konōve!’
36 Niyanayana ina bóbwara ikavava, Yeisu anetava ikaaiyaka. Ago kidi ina tovatotowanayaoyadi kaga kaga sisowóduwo sigitedi amo tutayana, geya vatau tayaamo yaina sitalavaitedi, go sem situgaumo.
Yeisu gómana naagovaina
ikideedevine tetelina
(Madiu 17:14-21; Maki 9:14-27)
37 E vanuwo itomo koyayana goi Yeisu mana tovatotowanayao sisou go, boda gagaina Yeisu sivalobode.
38 Ago koroto tayamo bodayadi sinaedi goi iduduwo idigo kana,
‘Tovatulúkwana, ame natugu koroto tayamo toito, tauna akawanoi makimaki yaim bego kugite.
39 Go kunōve. Dimoni ima ikinagove. Ikinagove, tuwo ipodeda ikapusi isou ikanagavigavila be nakae tobuna goi polu isowóduwo. Ago iyogedegede ana kadókana natugu wowona itameya toina baige nakona ikalave.
40 Maine kom geya, tuwo im tovatotowanayao yaidi akawanoi makimaki bego dimoniyana sivatapiye go, geya itoboinedita. Tauna akawanoi yaim bego natugu kugite.’
41 Go kina Yeisu idigo kana,
‘Komi tomota manakae? Komi numisa geya nakae dabami sikasa. Tuta maanawena taiyao bogina taakaiyaka go, ava tuta bei konumisedokoigu? Tuta maanawena imi dabakasa aatogage, tauna ava tuta bei konovegu?’
E korotoyana ilatuwoko idigo kana,
‘Tuwo natum kūme!’
42 E nava natunayana iimememe go, kina dimoniyana ikinagove, tuwo ikapusi isou poyapoya goi nakae itatátava. E Yeisu dimoniyana ilovinae idigo kana,
‘Dimoni, kusowōduwo!’
Tuwo gomanayana ikidedevine. Ikavava, ikabi tamana ivini.
43a E tomota liliudi nukotodi siwówana gagaina kadi,
‘Iyaa, Yaubada ina togaga uyana iyata!’
Yeisu ina kámasa aiyuwoina italavaitemnei tetelina
(Madiu 17:22-23; Maki 9:30-32)
43b E boda liliudi Yeisu ina guinuwa liliudi pasidi sikaiinaopa go, ina tovatotowanayao ilatuwokoidi kana,
44 ‘Guna vatulúkwana ame konuwokavatēdi: Nava bei tomota tayamo itaoya, Tomalatomota inuwotuluye tomota nimadi goi.’
45 Go ina livala geya siyagoiyeta unana ana yagoina Yaubada ivamoukoidi, govila bei siyagoi. Ago simatoita bego ina livalayadi manudi silumadade.
Avatau toolagaina
Yaubada ina kalibúbuna goi tetelina
(Madiu 18:1-6; Maki 9:33-37)
46 E Yeisu ina tovatotowanayaoyadi taudiva sikaumakimaki bego avatau yaidi goi toolagaina.
47 E kina go Yeisuyana idi nuwogau bogina iyagoi, tuwo gómana tayamo ikabi, kikina goi ivatáoe
48 go, ilatuwokoidi idigo kana,
‘Avatauwa neta toosobudi gómana ame nakae yau yoigu goi siiuyaone, e yau nakae siuyaaonegu. Go avatauwa neta yau siuyaaonegu, agu toetuna nakae siiuyaone. Ame moitamo. Avatauwa komi yaimi goi neta toosobuna, tauyana moe toolagaina.’
49 E Iyoni Yeisu ina livala inove, idigo kana,
‘Tomoya, koroto tayamo kagite kom yoim goi dimoni ivataapiyedi go, tauyana kita taiyao geya, tauna kapoikiki bego kasanabode.’
50 Go kina Yeisuyana idigo kana,
‘Taabu kosaanabōde. Avatau neta geya ivakaleyemita, e tauyana ivaitemi.’
Yeisu ituko inonoina Yerusalema tetelina
(Luke 9:51—19:27)
Tomota idi nuwonúwana Yeisu manuna
51 E Yeisu ina tuta bego Yaubada ikabi itukoe ina yábana giyakainava isowóduwo, tuwo ina nuwonúwana iyato bego inonoina Yerusalema manuna.
52 Inonoina ina tovatotowanayao taiyao go, lobutu adi tolokoina maniyedi ietunedi sivakumgo sina Samériya asaina goi bego sikatubayasi ina sowóduwo manuna.
53 Sima asayana goi go, toni kasa siyagoi Yeisu inonoina Yerusalema manuna, tauna geya siuyaoneyeta. Tuwo lobutu adi tolokoinayadi sikaluvilamna sima Yeisu yaina.
54 E tovatotowanayadi Yemesa be Iyoni sinove bego toni kasa Yeisu sikatae, tuwo kadi,
‘Tomoya, latuwom Yaubada kaduduwe bei yeu yábana goi ietune isou ina ivakasavedi?’
55 E kina itugavila ibowoidi idigo kana,
‘Moe nakae geya!’
56 Ibowoidi ikavava, sina ituli ta kasa.
Yeisu ana sabokuli ana moumou tetelina
(Madiu 8:18-22)
57 E enao goi siiketoiya go, tayamo koroto ima Yeisu ilatuwoko idigo kana,
‘Neta ava kasa goi kunonoina, bei asabokuliyem.’
58 Ago kina Yeisu idigo kana,
‘Weiniya woliwoli madi bobosiu, mánuwo madi vátala go, Tomalatomota geya ana kaba masisimo. Tauna neta kusabokuliyegu, e kom bei yau nakae.’
59 E Yeisu koroto aiyuwoina ilatuwoko idigo kana,
‘Kusabokuliyegu.’
Go korotoyana kana,
‘Tomoya, kutagonēgu mainao ana tamagu amatakavate ana kadókana ikámasa avaliwoge baige ama asabokuliyem.’
60 Go kina Yeisu idigo kana,
‘Tokámasa kwalavēdi bei toinidi idi tokamasayao sivaliiwogedi. E kom sem kūna Yaubada ina kalibúbuna kutalavāite tomota yaidi.’
61 E koroto aitonina ima idigo kana,
‘Tomoya, bei asabokuliyem. Go kutagonēgu nava mainao ana guna bodao idi tagona akabi namliyeta ao asabokuliyem.’
62 Go kina Yeisu idigo kana,
‘Avatauwa neta idi kaba távina bogina sikabidi, idi bulumakau goi sitavitávina go, sikaandovila, moe tauyadi geya itoboinedita Yaubada ina kalibúbuna manuna sipaisewa unana moe nakae sinaanayuwo.’