☰ MADIU 12
12
Yeisu Sabati ana Tomoya
(Maki 2:23-28; Luke 6:1-5)
1 Tuta amo Yeisu kai ina tovatotowanayao taiyao tánuwo sinaena kaaketoiya Sabati goi. Kaaketoiya go, kai tovatotowanayama loga kakámasa. Tuwo kavatowo witi keuwoidi kaguwedi kakakáika.† 2 E kidi go Parisi sigitema, tuwo Yeisu silatuwoko sidigo kadi,
‘Iyaa! Im tovatotowanayao manakae siguuinuwa kaga Sabati ana lovina geya itagonedeta taguinuwe?’
3 E kina Yeisuyana kana,
‘Manakae? Kaga Devida boi iguuinuwe tetelina geya kokatuyaiviyeta ae? Boi tutayana ma senao loga sikámasa go, geya avadimo. 4 Tuwo kina Devidayana Yaubada ina Vada goi isiu, Tonúwala yaina ikawanoi awoinu manuna. Tuwo Tonuwalayana beredi kaasalaidi†a ikabidi, Devida ivini ikáika. Ikáika ikavava, senao nakae ivinidi sikáika go, kidi Devida ma senao geya adi tagonamo berediyadi sikáika. Moe kidi Tonúwala taudiva madi tagona sikáika.†b 5 Aiyuwoina Tonúwala Vada Kimaasabaina goi sisiusiu Sabati goi sipaaisewa. Moe nakae Sabati ana lovina sikapipilave go, kidi geya adi pikwanamo. Manakae? Yaubada ina Katukeda goi ame geya kokatuyaiviyeta ae?† 6 E ame alatuuwokoimi konōve: Tayamo tomota ameni gagaina namliyeta Vada Kimaasabaina. 7 E Gínina Kimaasabaina goi Yaubada idigo kana,
 
“Latuwogu yoguyogu kokasaledi yau yaigu,
go sem latuwogu toina moe konuwokapisi.Ӡ
Oseya 6:6
 
Neta ame talavaitayana ana yagoina koyagoi, e tauyadi geya adi pikwanamo geya kotakinoidita kidi toogoyoidi. 8 Moitamo. Tomalatomota moe Sabati ana Tomoya, e ilovina kaga itoboine Sabati goi tomota siguinuwe, tauna guna tovatotowanayao geya adi pikwanamo.’
Sabati goi Yeisu koroto nimana
napanapaina ikideedevine tetelina
(Maki 3:1-6; Luke 6:6-11)
9 Yeisu itaoya, tanuwoyana ikalave go, ina Diyuu idi kaba tugúguna goi isiu. 10 Koroto tayamo amoko goi ikaaiyaka, nimana napanapaina go, kaamasina. Kidi Parisi nakae sikaaiyaka; latuwodi bego Yeisu sikamamaetali Sabati ana lovina ana tokapipilova, tuwo silumadade sidigo kadi,
‘Manakae? Yaubada ina Katukeda itagoneda Sabati goi tomota takidedevinedi gea geya?’
11 Go kina Yeisuyana idigo kana,
‘Neta Sabati go, komi vatauwa neta imi sipi tayamo bobosiu goi isouye, manakae? Bei kobulagasi, gea geya? Geya, bei kobulagasi.† 12 Go sipi kaga? Dogoi giyaina ae? Go tomota kónana gagaina. Tauna neta itoboineda Sabati goi sipi tavaite, e itoboineda Sabati goi tomota nakae tavaitedi.’
13 Tuwo itugavila korotoyana ilatuwoko idigo kana,
‘Siyagu, nimam kuyosāle!’
Tuwo moitamo nimana iyosale go, bogina idedevina, nimana aiyuwoina nakae. 14 E kidi Parisiyadi sitaoya, aba tugugunayana goi sisowóduwo sina taudiva silosinapu manakaedi bei Yeisu sikaumate.
15 E kina go Yeisuyana bogina iyagoi kaga amo tauyadi sinuwonuwone, tuwo ikabima amo dadavayana kakalave. Ago boda gagaina Yeisu sisabokuliye. Tomotayadi yaidi goi maniyedi sikatówana go, madabokidi ikidedevinedi. 16 Ikavava, ilovinaedi idigo kana,
‘Taabu kotaalavāita bego yau avatau.’
17 Moeko goi kaga boi nimatu Yaubada ina tokabivalavala Aiseya idigedige, imalatomotamna. Tauyana Yaubada ina livala italavaite idigo kana,
 
18 ‘Konōve! Guna kitom goame.
Bogina akinave.
Tauyana amatakoiye
be nakae ategu iuyaone gagaina.
Yaina goi bei Balomaigu ayato.
Yau guna takínona vavasa bei italavaite Totuyoyowo yaidi.
19 Tauyana geya ikaumakimaki.
Geya iboubou.
Nakae niyana geya vatau tayaamo moteo goi
inove bego ibobóbwara.
20 Geya vatau tayaamo neenetaina
duriduri taguuyalina nakae
o rampa ana wiki kaakupina nakae ikatae,
go sem inuwokapisiyedi.
Nakae bei iguinuwe
ana kadókana Yaubada ina takínona vavasa
amo lavayana bei ikaiwoduwedoko.
21 Ago kidi Totuyoyowo bei Tauyana silotutae.’
Aiseya 42:1-4
Parisi Yeisu siwowoko bego
Beyelisebuli ina togaga goi tomota ikidedevinedi
(Maki 3:20-30; Luke 11:14-23, 6:43-45)
22 E niga koroto tayamo tomota sime Yeisu yaina. Korotoyana naagovaina go, matana kebokeboina be nakae maena moumouna. E sime go, Yeisu ikidedevine, tauna korotoyana itoboine ibóbwara be nakae igita. 23 Ago tomota sikaaiyaka Yeisu ina guinuwa sigite, madabokidi nukotodi siwówana nakae sidigo kadi,
‘Manakae? Amo tauyana nakona Devida tubuna gea geya?’
24 E kidi go Parisiyadi nakae sikaaiyaka, tomota idi livala sinovedi, sidigo kadi,
‘Ame tauyana dimoni ivataapiyedi go, moe dimoni idi tolovina Beyelisebuli ina togaga kaka goi ivataapiyedi siisowóduwo.’†
25 Go tauyadi idi nuwonúwana Yeisu bogina iyagoidi, tuwo ilatuwokoidi idigo kana,
‘Aba lovina liliudi neta sinaedi tomota siilivisi, aba lovinayadi bei sisou. Asa o bodayauwo liliudi nakae. Neta sinaedi tomota siilivisi, tomotayadi geya sitaoyakavateta, go sem bei sisapa.
26 Ida Kaleya nakae. Neta toinina ina bodao ivatapiyedi, moe nakae ilivisidi. Go moe kaga ana dedevina? Ina lovinayana manakaena bei itogaga? Geya! Neta toinina ina bodao ilivisidi, ina lovinayana bei ikavava. 27 Yau nakae. Neta yau Beyelisebuli ina togaga goi dimoni avataapiyedi, e komi toinimi imi bodao nakae, tauyana ina togaga goi dimoni sivataapiyedi. Go moe nakae geya ae? Moe pasina nava bei toinimi imi bodao sitakinoimi komi tobágala. 28 Go Yau Yaubada Balomaina ina togaga goi dimoni avataapiyedi, tauna ina kalibúbuna bogina imaiyaba yaimi. 29 Yau dimoni avataapiyedi go, geya kada tauyana ina togaga goi avataapiyedi. Aba gita tayamo aguinuwe bei koyagoi Yaubada Balomaina goi dimoni avataapiyedi. Ida Kaleya koroto toogilúluna nakae. Avatau itoboine togilulunayana ina vada goi isiumo go, konana ivainaoidi? Geya ae? Go koroto tayamo neta togilulunayana ina vada goi isiu go, mainao ivasobusobuye namliyeta baige nimana aena iyowóidi, e itoboine bei konana ivainaoidi. E yau nakae. Ida Kaleya bogina avasobusobuye, tauna itoboinegu ina dimoni avatapiyedi. 30 Geya konanayuwoita yau manugu. Avatau neta yau taiyao geya kaspwagogoneta, tauyana guna kaleya.† Avatau neta tomota geya italigogoidita yau taiyao, e tomotayadi ikausapesapedi.
31 Tauna imi wowokanayana pasina ame alatuuwokoimi konōve: Tomota idi goyo liliudi be idi tagíwaya liliudi sivaatoidi, adi nuwotao bei sibabane, go sem avatauwa neta Baloma Kimaasabaina sitagiwoi, e adi nuwotao geya sibabaneyeta ame tuta be nakae tuta simamaima. 32 Avatauwa neta Tomalatomota sitagiwoi, e adi nuwotao bei sibabane. Go avatauwa neta Baloma Kimaasabaina sitagiwoi, e adi nuwotao geya sibabaneyeta, ame tuta be nakae tuta imamaima.†
33 Komi kodovatusidokōigu. Neta alova tayamo dedevina, e keuwoina nakae dedevina. Neta alova tayamo igoyo, e keuwoina nakae igoyo. Moitamo. Alova keuwoidi goi takinanedi, nakona dedevidi o sigoyo. Tauna yau nakonakae?† 34 Komi moteta nakae! Manakae? Komi toogoyoimi itoboinemi bóbwara dedevidi kovatoidi gea geya? Geya!†a Bogina koyagoi. Kaga neta nuwoda ivakayaodei, e sopada nakae sivatoi.†b 35 Tomota nuwodi goi idi esaesa sikanukulidi. Tuwo tomota dedevina ina esaesayadi dedevidi goi dogoi dedevidi ikaiwoduwedi. Ago tomota goyogoyoina ina esaesa goyogoyoidi goi dogoi goyogoyoidi ikaiwoduwedi.
36 E ame alatuuwokoimi konōve: Takínona ana maliyalina goi tomota idi livala besobeso liliudi sivaatoidi bei Yaubada yaina sitalaseyanedi. 37 Moe moitamo. Imi livala pasidi Yaubada bei ivayokoimi komi kiboobosimi, e nakae imi livala pasidi Yaubada bei itakinoimi komi toogoyoimi.’
Iyona aba kinana Yeisu manuna
(Maki 8:11-12; Luke 11:29-32)
38 Tuwo Yaubada ina Katukeda ana tovatulukwanayao maniyedi be nakae Parisi maniyedi Yeisu ina vatulúkwana sinove, sidigo kadi,
‘Tovatulúkwana, latuwoma aba kinana tayamo kuvatulukoima kagite bei kayagoi kom moitamo Yaubada goi kuma.’†
39 Go kina Yeisuyana idigo kana,
‘Tomota neta goyo sinadi be nakae Yaubada situgavile, e aba kinana siiyaledi. Ago Yaubada aba kinana tayamo toito bei ivinidi go, tuwaina geya. Aba kinanayana moe tokabivalavala Iyona.† 40 Moitamo. Iyona íyana sinaena goi ikaaiyaka maliyalina aito be sabamgo aito,† e nakae Tomalatomota poyapoya sinaena goi bei ikaiyaka maliyalina aito be nakae sabamgo aito. 41 Boi Iyonayana ina talavaita da Ninivei sinove, e situgavila. Go konōve. Tomota tayamo toolagaina ameni namliyeta Iyona go, ame togoyoidiyadi nava geya situgavileta. Tauna takínona ana tuta goi da Ninivei bei sitaoya, ame togoyoidiyadi idi goyo bei sitalaledi.† 42 Aiyuwoina giyovila tayamo Totuyoyowo go, ina kaba lovina moe Siba youya dadavina goi. Tauyana boi aduwanau goi ima† Solomoni ina nanamsa inove. Go konōve. Tomota tayamo toolagaina ameni namliyeta baige Solomoni. Go ame togoyoidiyadi nanamsa gagaina bogina sinove go, nava geya situgavileta. Tauna takínona ana tuta goi giyovilayana bei itaoya kidi taiyao go, idi goyo bei italaledi.
43 E nakona dimoni tomota tayamo ikinagove go, tutayana dimoniyana sivatapiye bogina isowóduwo, e ina asa yoyowo goi aba waiwasi iilusala. Iilusala go, geya tayaamo ibabane. 44 Tuwo idigo kana,
“Bei akaluvilamna ana vadayana boi aakalave goi.”
Ago ima, tomotayana ibabane vada nakae bogina daakakaina be kaidiiyoyaina be nakae katubaayasina. 45 E tuwo dimoniyana ina ituli ta dimoni adi badabada ainima aiyuwo ikabidi imedi. Tauyadi goyogoyoidi toina, nakae dimoniyana ina goyo sikaalisave. Ikabidi, imedi vadayana sisiu sikaaiyaka. Amo korotoyana ina kaiyaka boi tupwana igoyo go, ame igoyo toina. Tauna nakae bei isowóduwo togoyoimiyami yaimi.’
Yeisu sinana be senao toidi
moe ina livala ana tokabikawanayao
(Maki 3:31-35; Luke 8:19-21)
46 Yeisu nava boda ilatuuwokoidi go, sinana be senao sima moetala goi siitaoya; latuwodi bego Tauyana silatuwoko. 47 E tomota tayamo idigo kana,
‘Gwa! Sinam be semowo moetala goi siitaoya; latuwodi kom kunovedi.’
48 Go kina Yeisu idigo kana,
‘Sinagu avatau? Segowo avatauwa?’
49 Nimana kai ina tovatotowanayao ivasakikinakoima, idigo kana,
‘Sinagu be segowo goamedi! 50 Moitamo. Avatauwa neta Tamagu guma yábana ina nuwonúwana siguuinuwe, e moe tauyadi segowo nakae niugowo nakae sinagowo.’
† 12:1 Atu 23:25. †a 12:4 Tat 35:13. †b 12:4 Vin 24:9; 1Sa 21:1-6. † 12:5 Yoy 28:9-10. † 12:7 Mad 9:13. † 12:11 Luk 14:5. † 12:24 Mad 9:34, 10:25. † 12:30 Mak 9:40; Luk 9:50. † 12:32 Luk 12:10. † 12:33 Mad 7:18-20; Luk 4:43-44. †a 12:34 Mad 3:7, 23:33; Luk 3:7. †b 12:34 Mad 15:18. † 12:38 Mad 16:1; Luk 11:16; Iyo 2:18, 6:30; 1Ko 1:22. † 12:39 Mad 16:4. † 12:40 Iyo 1:17. † 12:41 Iyn 3:5. † 12:42 1To 10:1-10; 2Te 9:1-12.
☰