EBBALUWA EERI
ABʼEBBULANIYA
Enyanjula
Ebbaluwa eeri abʼEbbulaniya, bagiwandikiire mu kibuga kyʼe Looma (13:24) era kyezyeka okubba nga bagisalaanirye omu makanisa ageeraku. Mpaawo amaite eyawandiikire ebbaluwa eenu ooba ebiseera ebibagiwandiikiramu. Abakugu omu byʼeBbaibbuli bateeserera ku mutume oPawulo, nʼoLuuka, ooba oBbalunaba. Era abakira obungi, baikirirya bati bagiwandiikire ngʼomwanka gwa 70 gukaali okubitawo nga bamalire okubyala oKurisito.
Ebbaluwa eenu bagiwandiikire ooti isomo, era ekigendererwa kyayo kyabbaire kyʼokwiryamu Bayudaaya abaikirirya maani. Ebbaluwa eenu, eraga ngʼoYesu oweyatuukirirye obunaabbi obweraku obwʼeNdagaano eNkaire. Ekyo oYesu yakikolere, oweyeewaireyo okubba niiye esadaaka yʼebikole ebibbibibbi omulundi ogumo lumala, era ngʼekola ekiseera kyonakyona. Ebbaluwa eenu eijulira eBiwandiike byʼomu Ndagaano eNkaire ooti 60. Era eBiwandiike ebyo biraga engeri oYesu egiyatuukirirye obunaabbi nʼobuvunaanyizibwa bwa kabona akira obukulu owʼeKiyudaaya.
Abaikirirya omu kiseera kinu, beezya bona okwajirya ekibairyamu amaani omu bbaluwa eenu ni basigala nga basengererya oKurisito Yesu nga niiye atwezyesya iswe okwesiga oKibbumba naiye (12:2).
Engeri egibyecaanamu
1. OYesu akiraku abanaabbi ba Kibbumba nʼabamalaika 1:1–4:13.
2. OYesu akiraku abakabona abaweererya omu Yeekaalu ya Kibbumba omu Yerusaalemi 4:14–7:28.
3. Obuweererya bwa Yesu bukiraku obwʼeNdagaano eNkaire 8:1–10:31.
4. Ebibono ebyokulungamya 10:32–13:17.
5. Ebibono ebisembayo 13:18-25.
1
OKibbumba atumwire kubitira mu Mwanawe
1 Eira, oKibbumba yatumulanga nʼabazeiza baiswe emirundi nʼemirundi era omu ngeri enyingi ngʼabitira mu banaabbi.
2 Neye omu biseera ebyaiswe binu ebyʼenkomerero atumwire na iswe kubitira mu Mwanawe, oguyalondere okuwa obusika bwa buli kimo, era oguyabitiiremu okubbumba ekyalo.
3 Mwiye niimwo okwasya kwʼekitiisya kya Kibbumba omu kweraga, era mwiye mutubonera enfaanana ya Kibbumba enanyere. Niiye abbesyawo buli kimo nʼamaani gʼekibonokye. Oweyamalire okutunaabyaku ebibbibibbi byaiswe, nʼatyama omwigulu nʼoKibbumba onyere oBwezye omu kifo kyʼekitiisya eino.
OMwana akira abamalaika ekitiisya
4 OMwana oyo ekitegeeza, oKibbumba yamusuucirye owʼamaani eino okukiraku abamalaika omu ngeri nti, ekitiisya ekiyamuwaire ekyʼokubba oMwanawe kikira ekyabwe.
5 Aale naani oku bamalaika oKibbumba oguyabbaire akobereku ati:
“Oli Mwana wange,
olwatyanu nnangirira nti ndi Iteewo?”
Ooba ati:
“Nalibba ninze oIteeye,
yena nʼabba Mwana wange?”
6 Kaisi tete era, oKibbumba oweyabbaire yatira okusindika oMwanawe omubere oku kyalo, yakobere ati:
“Abamalaika ba Kibbumba bonabona bamusinzenge.”
7 Owaabba atumula ku bamalaika, oKibbumba akoba ati:
“Asuuca abamalaikabe ooti mpewo,
era abaweereryabe ooti ndimi gya musyo.”
8 Neye owekituuka oku Mwanawe, oKibbumba akoba ati:
“Oli Kibbumba, era obwakabakabwo bwakubbaawo emirembe nʼemirembe.
Okufugakwo omu bwakabakabwo kutambulira ku bwenkanya.
9 Otaka ebikole byʼobutuukirirye, nʼocaawa obubbibubbi.
Kagira, nze oKibbumbawo, nkusukireku amafuta
ni nkuwa eisangaalo eryʼekitiisya ekikira ekyʼabandi bonabona.”
10 Era oKibbumba yakobere ati:
“Iwe Musengwa niiwe omu ntandiika eedi eyakomekere omusingi ekyalo oku kyemereire,
era nʼeigulu niiwe onyere eyalibbumbireyo.
11 Ebyo ibyo byalijigirika ni biwaawo, neye iwe oli wa kubbaawo emirembe nʼemirembe.
Byonabyona byalikairira ni biwaamu ngʼekizwalo.
12 Walibiringaku ngʼowebalingaku eijoola,
era byalicucuka ni bicuuka ooti kizwalo ekikaire owekicucuka.
Neye iwe osigala kyekimo, era tocuukaku,
era nʼobwomibwo tibwalikoma.”
13 Neye aale naani oku bamalaika oKibbumba ogwakobangaku ati:
“Otyame ngʼondiraine oku lubba lwange olwʼengalo endiiro,
paka owenaligondya abalabebo
ni mbasuuca mukonkolo gwa kuwuumuliryaku ebigerebyo?”
14 Neso abamalaika nago niikyo eniki? Aale tiniigyo emyoyo gyonagyona egiweererya oKibbumba, egyo egyatuma okubbeera abo abalisuna okubalokola?