13
Obuweererya oKibbumba obwasiima
1 Mwongere okutakangananga ngʼaboluganda omu Kurisito.
2 Timwerabiranga okusangaalira abageni, olwakubba omu kukola ekyo, eeriyo abasangaaliire abamalaika nga tibakimaite bati niibo.
3 Mwewukiryenge okubbeera abali omu mabbuusu olwʼokubba baikirirya ba Yesu, nga muli ngʼabebasibiire aamo nabo. Era mwewukiryenge abo abebagadya olwakubba abaikirirya ba Yesu, olwakubba nywena muli oku kyalo kunu, era ekinyere ekyo kyezya okubatuukaku.
4 Obufumbo abantu bonabona babuteekengemu ekitiisya, era babukuumenge nga butukulye, olwakubba abalendi, oKibbumba yalibasingisya omusango.
5 Mulekenge okubba abalulunkanira empiiya, era mukitwalenge muti ebintu ebimuli nabyo bimala, olwakubba oKibbumba yakobere ati:
“Tinalyaba okubazwaku,
era tinalibalekawo kadi katyayi kati.”
6 Niikyo ekigira ni tutumula nʼobugumu tuti,
“OMusengwa niiye omubbeeri wange, tinaatyenge.
Omuntu-obuntu ayezya kunkola niki?”
7 Museegenge oku beekubbemberi baanywe, abo ababakobeire ekibono kya Kibbumba. Mwetegereze ebyo ebibabitiremu omu bwomi bwabwe, era musengererye okwikirirya kwabwe omu Yesu Kurisito.
8 OYesu Kurisito tacuuka, ngʼoweyabbaire eizo, waali nʼatyanu, era atyo weyalibba emirembe nʼemirembe.
Mulondewo Yesu ooba sadaaka gyʼomu Mateeka
9 Timwaganyanga ni babagotesyagotesya nʼenjegesya egitali gimo endiibi, egitaabirana nʼamazima ga Kibbumba. Kisa obugumu bwa kwikirirya, omu myoyo gyaiswe, ni bwemerera ku kumanya kisa oKibbumba ekiyatulagire, neye tikubulombolombo bwa byakulya, obutagasa nʼokugasa abo ababusengererya.
10 Abaikirirya ba Yesu tuli nʼekika kyʼekyoto nga niiye abo abaweererya omu nkola enkaire eyʼekiyudaaya, ekolera oku Mateeka ga Musa, egibabula obwezye okuliiraku.
11 Okabona akira obukulu atwala eisaaye lyʼebisolo omu Kifo eKyeru, nʼaliwaayo olwʼebibbibibbi, neye ibyo ebinanyere ni babyocerya nza wʼekigo abantu egibagonangamu.
12 Era nʼoYesu yagadiire e nza wʼolukita lwʼekibuga, kaisi atukulye obwomi bwʼabantu nʼeisaayerye.
13 Kale tuzwe omu manzira agandi gonagona agʼokuweererya oKibbumba, twabe eeri oYesu e nza wʼekigo, era twikirirye okubita omu kuswalira eeyo okululwe.
14 Ekyo kityo olwakubba oku kyalo kunu tubulaku kibuga kyʼemirembe nʼemirembe, wazira tunoonia kiikyo ekyaba okwiza ekyʼomwigulu.
15 Kale tuwengeyo eeri oKibbumba esadaaka eyʼokumuwuuja, nga tugibitya mu Yesu, nga buliijo tubbutula tuti oKibbumba niiye oMusengwa.
16 Era timwerabiranga okukola ebintu ebisa, nʼokubbeerangana ngʼabaikirirya ba Yesu. Ebyo niibyo esadaaka egisangaalya oKibbumba.
17 Muwulisisyenge abeekubbemberi baanywe, era mubagonderenge, olwakubba niibo abalabirira emyoyo gyanywe, ngʼabantu oKibbumba ababuulya ebifa oku myoyo egyo. Mubeezyesye okukikolanga nʼeisangaalo, neye tina mwoyo wa nakolantya, olwakubba ekyo mpaawo kyʼekibagasa inywe.
18 Mutusabirenge, olwakubba tumaite tuti tituwulira musango omu myoyo gyaiswe era buliijo tutaka okukola kusani mu buli kimo.
19 Era mbegairira okunsabiranga eino, kaisi njezye okwira mangu egimuli.
20 Kale nsaba nti oKibbumba oyo atuwa eidembe, eyazuukizire oMusengwa waiswe oYesu, oMuliisya wʼentaama omukulu, nʼakakasa endagaano eyʼemirembe nʼemirembe, nʼeisaayerye,
21 abawe buli kisa kyonakyona ekimwetaaga okukolanga ebyataka. OKibbumba oyo akolere mwiswe byonabyona ebyasiima, ngʼabitira omu Yesu Kurisito, awomeire okumuwanga ekitiisya emirembe nʼemirembe. Amiina.
22 Boluganda, mbasaba muguminkirize ebimbalaabbiire, olwakubba ebbaluwa eenu ngibawandikiire mu bumpi.
23 Mbakobera nti owoluganda oTemuseewo bamuteereire okuzwa omu mabbuusu. Era oweyaliiza mangu, twaliiza swenaswena okubabona.
24 Munsugirirye abeekubbemberi baanywe bonabona, nʼabatuukirirye bonabona. Aboluganda abazwa omu kyalo kyʼe Itale babasugiirye.
25 OKibbumba abakwatirenge ekisa inywe nywenanywena. Amiina.