3
OYesu akira oMusa
1 Kale boluganda omu Kurisito era abeeru abeyayeteire obwomi bwʼomwigulu, muteeke ebiseego byanywe ku Yesu omutume wa Kibbumba, era okabona akira obukulu owʼenjikirirya yaiswe.
2 Yabbaire mwesigwa eeri oKibbumba, eyamulondere okukola omulimo ogwo, dala ngʼoMusa oweyabbaire omwesigwa omu kuweererya abantu ba Kibbumba bonabona.
3-4 Atyanu, oKibbumba niiye eyakolere buli kimo okubba ngʼowekiri. Kintu kimanye kiti buli nyumba ebbaawo wabba waliwo eyagyombekere. Kale, ngʼomwombeki wʼenyumba owaabba nʼekitiisya ekikira ekyʼenyumba egyayombekere, nʼoYesu atyo webamutwala okubba asaaniire ekitiisya ekikiraku ekya Musa.
5 OMusa yabbaire mwesigwa ngʼomuweererya omu nyumba ya Kibbumba okumalaku, ngʼakakasa abantu baamu ebyo oKibbumba ebiyalitumula omu maiso eeyo.
6 NʼoKurisito yena atyo weyabbaire omwesigwa wazira ngʼoMwana akulira enyumba ya Kibbumba. Era, iswe niiswe enyumba ya Kibbumba nago, kasita twasigala buliijo nga tuli bacaati era nga tuli nʼosuubi oyo ogutwenyumirizaamu.
Okulabula okukwata oku kutaikirirya
7 Kale ngʼoMwoyo oMweru owaakoba,
“Olwatyanu, owemwawulira eigono lya Kibbumba,
8 timwakakanyalya emyoyo gyanywe
ngʼabazeiza baanywe owebakolere oku lunaku
oKibbumba oluyabagezeseirye omu kitera.
9 OKibbumba yakobere ati: ‘Eeyo, bankemere ni bangezesya,
waire nga babbaire baboine ebikulu ebinakolere
okumala emyanka 40.’
10 Kagira zena nanyiigire olwʼabantu abʼomulembe ogwo,
ni nkoba nti,
‘Emyoyo gyabwe gitamaatama ni gigota okunzwaku,
tibategeera enkola gyange egimbakoba okukoleraku.’
11 Nʼolwekyo, niiwo okunyiiga ni ntuuka nʼokwerima nti,
‘Tibalituuka kadi omu kifo omu nankabaweereire ekiwuumulo.’ ”
12 Kale, boluganda, aale mugenderere kaisi tiwaabbaawo kadi moiza kwinywe abba nʼomwoyo omubbimubbi era omukakanyali ogutaikirirya, nʼazwa oku Kibbumba onyere obwomi.
13 Wazira, buliijo mwiryanganengemu amaani kasita ni kubba nga kukaali “Lwatyanu,” kaisi waleke okubbaawo waire moiza kwinywe, ekibbikibbi ogukibbeyabbeya nʼakakanyalya omwoyogwe eeri oKibbumba.
14 Tusuuka bantu abali omu bumo nʼoKurisito singa twekalangula tutyo paka ku nkomerero omu bwesigwa obutwabbaire nabwo nga twankatandiikanga okwikirirya.
15 NgʼeKiwandiike owekikoba:
“Olwatyanu owemwawulira eigono lya Kibbumba,
timwakakanyalya emyoyo gyanywe,
ngʼabazeiza baanywe owebakolere.”
16 Atyanu, aale banaani abo abawuliire eigonolye neye ni bamutenguwa? Tibaabo bonabona oMusa abeyeekubbembeire okubatoola omu Misiri?
17 Era, aale banaani abo oKibbumba abeyasunguwaliire okumala emyanka 40? Tibabbaire baabo ababbengere omu maisoge, abo abafiire, emirambo gyabwe ni gisigala omu kitera?
18 Era, aale banaani abo abeyalayiriire ati tiyalibaganya okwema ekigere omu kifo ekiyabbaire abategekeire ati mubaliwuumulira? Tibaabo abamutenguwire?
19 Kale mwekyo tubona tuti bakayire okutuuka omu kifo oKibbumba ekiyabbaire abategekeire okuwuumuliramu, lwa kutaikirirya kwabwe.