EBBALUWA EYOKUSATU
OYOKAANA
EGIYAWANDIIKIRE
Enyanjula
Ebbaluwa ya Yokaana eyokusatu, omutume oYokaana niiye eyagiwandiikire akati wʼomwanka gwa 50-100 nga bamalire okubyala oKurisito. OYokaana yawandikiire ebbaluwa eenu mwikirirya ogubeeta oGaayo. OYokaana tiyeetoolayo nga niiye omuwandiiki, wazira yeeyeta mukaire (1:1). Era ngʼowekiri omu bbaluwa esooka nʼeyokubiri, abantu bakiikirirya bati oYokaana niiye eyawandiikire ebbaluwa eenu nʼekitabo aMawuliro aMasa ngʼoYokaana oweyagawandiikire era ngʼali mwEfeeso.
Ekigendererwa kya Yokaana okuwandiika ebbaluwa eenu, kyabbaire kusisiitira Gaayo ogwayeta omukaagwawe, kubba musa eeri aboluganda abali omu lugendo nga babita omu kitundu ekyo ekiyabbairemu.
Engeri egibyecaanamu
1. Okweyanjula 1:1.
2. Okugumya oGaayo era nʼokumusisiitira okubitya kusani aboluganda 1:2-8.
3. Ebifa oku Diyotireefe nʼoDementoliyo 1:9-12.
4. Ebibono ebisembayo 1:13-14.
1
1 Ninze omukaire mpandiikira omunange omutake eino oGaayo, era iye oguntaka omu mazima.
2 Era mwinange omutake, nkusabira oKibbumba akubbeere obbe kusani mu byonabyona, era obbe mwomi omu mubiri, ngʼowooli mwomi omu bwomi bwʼomwoyo.
3 Dala nasangaire ino aboluganda owebaizire ni bankobera ngʼowooli oodi omwesigwa, era nʼengeri egiweyongera ngʼotambulira omu mazima ga Kibbumba.
4 Era mpaawo ekikiraku okunsangaalya ngʼokuwulira nti, abantu abali ooti baana bange baaba nga batambulira omu mazima ga Kibbumba.
OGaayo bamuwuuja
5 Dala mwinange omutake, oli mwesigwa olwʼomulimo ogwokola ogwʼokubbeera aboluganda omu Kurisito Yesu, nʼowebabba waire nga bageni egyoli.
6 Era abamo oku boluganda abo bakobeire eenu ekanisa bati mbu otaka ino aboluganda omu Kurisito oYesu. Kale nkusaba nti weeyongere okuwanga abantu abatyo abali omu nŋendo, obubbeeri omu ngeri esangaalya oKibbumba.
7 Ekyo kityo olwakubba babba nga baaba balaabba ku Kurisito, era mpaawo kintu ekibaikirirya okusuna okuzwa eeri abantu abataikiririrya omu Kurisito oYesu.
8 Nʼolwekyo aboluganda iswe abanyere tuli nʼokusuzanga nʼokuliisyanga abalaabbi abo, kaisi twezye okubba abantu abakolera aamo nabo omu kusasya amazima ga Kibbumba.
ODiyotireefe nʼoDementoliyo
9 Aale nawandikiire ekanisa, neye oDiyotireefe olwakubba ataka ino okubba mwekubbemberi waabwe, iye tawulisisya ebinkoba.
10 Kale owenaliiza eeyo nalimuvunaana olwʼebikole ebyo ebyakola, ngʼokututumulangaku ebyakalebule. Era ekyo kyonkani nga tikimumala, neye tete nʼagaananga nʼokugaana okwaniriza aboluganda abageni abalaabba oku Kurisito oYesu. Era tete aloberya aboluganda badi ibo abataka okwaniriza abalaabbi era nʼababbinga omu kanisa.
11 Aale atyanu mwinange omutake, wena tokolanga ooti Diyotireefe, neye okolenge bisa. Iye omuntu yenayena akola ekisa, oyo abba wa Kibbumba. Era nʼoyo yenayena akola ekikole ekibbikibbi abba akaali okutegeera oKibbumba.
12 Cooka iye oDementoliyo abantu bonabona abʼekanisa bamutumulaku bisa, era ebyakola biraga amazima ga Kibbumba. Kaisi era swena tumutumulaku bisa, aate era inywe mumaite nga iswe ebitumutumulaku ibyo bituuce.
Okuseebula
13 Cooka mbaire nʼebintu bingi ebinanditakire okukumanyikisya, neye tintaka okukikola mubbaluwa.
14 Wazira nsuubira okwiza eeyo mangu, era twalitumula maiso ku maiso.
15 Aale oKibbumba akuwe eidembe. Era abakaagwabo abali eenu bakusugiirye. Osugirye abakaagwa baiswe abali eeyo moiza ku moiza.