14
OYesu alamya omuntu oku Saabbaato
1 Lwabbaire lumo oku Saabbaato, oYesu nʼayaba omu nyumba yʼomoiza oku beekubbemberi bʼaBafalisaayo okulya. Neye abantu abamo babbaire bali kumwekalikicanga okusuna onanzwa wa kumuvunaana.
2 Ekyo kyabbaire kityo olwakubba omwa Mufalisaayo oomwo mwabbairemu omuntu eyabbaire abbimbisaine ebigere nʼamangalo.
3 Awo oYesu nʼabuulya abakugu omu byʼaMateeka ga Musa nʼaBafalisaayo ati, “Bakiikirirya omu mateeka okulamya abantu oku Saabbaato, ooba bbe?”
4 Neye owebagaine okumwiramu, awo oYesu nʼakwata oku mulwaire nago era nʼamulamya, kaisi nʼamuseebula.
5 Awo oluzwanyuma nʼababuulya ati, “Singa omutaanewo ooba okisolowo owaagwa omu kiruba oku Saabbaato, toyalamuka mangumangu okumutoolamu?”
6 Era nʼekyo kyona tibamwiriremu.
Empisa oku mukolo
7 Kale oYesu oweyaboine ananyere awo ngʼabageni abeete beesaanizire ebifo ebyʼabantu abʼekitiisya oku menza, nʼabagerera olugero ati,
8 “Omuntu owakwetanga oku mbaga eyʼobugole, totyamanga mu kifo ekyʼabantu abʼekitiisya, amo nobba ooti oli awo ni wabbaawo ogondi ogubeetere akukiraku ekitiisya.
9 Singa kibba kityo, iye oodi eyabeetere mwembi, yaliiza nʼakukoba ati, ‘Ozwerewo onu omu kifo ekyo,’ oolwo walyaba okutyama omu kifo ekisembayo okubba ekyʼekitiisya ngʼoswaire.
10 Neye owebakwetanga oku mukolo, oyabanga nʼotyama mu kifo kyʼabantu bʼeidaala lyʼansi omu kitiisya, kaisi oodi abacaazire owaiza nʼakukoba ati, ‘Munange, iwe osembereku yaadi awasaku,’ oolwo kaisi nʼosuna ekitiisya omu maiso gʼabageni abainawo.
11 Ekyo kityo olwakubba buli eyegulumalya, balimwica; neye iye oyo eyewombeeka, balimugulumalya.”
12 Kaisi nʼakoba nʼoodi eyabbaire amucaazire ati, “Owoosumbanga ekyamusana ooba ekyeigolo, toyetanga bakaagwabo ooba bagandabo, ooba bʼekikaakyo, ooba baliranwabo abasuni olwakubba bona balikweta, omu ngeri eyo ni bakusasula.
13 Neye owoosumbanga embaga, oyetanga badoobi, abanialuuki, abaleme, nʼaboofu,
14 era waire nga tibeezya kukusasula neye iye oKibbumba yalikusasula omukuzuukira kwabatuukirirye.”
Olugero lwʼembaga eyʼamaani
(Mat 22:1-10)
15 Awo omoiza oku babbaire balya oku menza nʼoYesu oweyawuliire ebyo, nʼakoba oYesu ati, “Nga wʼenkabi iye oyo eyalirya oku mbaga omu bwakabaka bwa Kibbumba!”
16 Neye oYesu nʼamwiramu mu lugero ati, “Wabbairewo omuntu eyategekere embaga eyʼamaani, kaisi nʼayeta abantu bangi.
17 Era omu saawa enanyerenyeere eyʼembaga, nʼatuma omugalamawe okukoba abagenibe abeete ati, ‘Mwize olwakubba ebintu byonabyona atyanu bitegeke.’
18 “Neye bonabona nga bali ooti balaagaanire, ni batandiika kwewozyaku. Eyasookere yakobere ati, ‘Nankugula ekigona, era nteekwa okwaba okukirambuula, kale nkwegairiire onsoniye.’
19 “Kaisi iye ogondi nʼakoba ati, ‘Nankagula ente endaawo egirima ikumi, era njaba kugigezesya. Kale nkwegairiire onsoniye.’
20 “Era nʼogondi iye nʼakoba ati, ‘Nkaali ndi mugole, nʼolwekyo timpezya kwiza.’
21 “Awo omugalama nʼakanga, era nʼakobera omusengwawe ebyo ebibakobere. Omusengwawe nʼanyiiga, era nʼalagira tete omugalamawe ati, ‘Oyabe mangu, osalaagalye omu nguudo nʼomu bisinde byʼekibuga, era ondeetere aanu ibo abadoobi nʼabanialuuki nʼaboofu nʼabaleme.’
22 “Awo omugalama oyo oweyamalire ekyo kaisi nʼaiza egiri omusengwawe okumukoba ati, ‘Musengwa mmalire, neye era wakaali waliwo ekifo.’
23 “Kale omusengwa nʼakoba omugalamawe ati, ‘Oyabe, osalaagalye omu nguudo nʼomu bisinde, okobe abantu baize kaisi enyumba yange eizule.’
24 Awo oYesu nʼakoba ati, ‘Mbakobera nti oku bantu badi abenabbaire njetere omu kusooka, mpaawo eyaliryaku kadi akatyayi kati oku mbaga yange.’ ”
Okwefiiriza kwʼomwegi wa Kurisito
(Mat 10:37-38)
25 Olundi oYesu yabbaire atambula nʼekiyindi kyʼabantu kaisi nʼabakoba ati,
26 “Singa omuntu aiza egyendi, kaisi nʼataka oiteeye ooba omaaye, ooba omukaliwe, ooba abaanabe, ooba abagandabe, ooba aboonyokobe, mazima waire obwomibwe obunyere okukiraku ngʼowantaka, tayezya okubba mwegi wange.
27 Kale buli etiyeetiika omusalabbagwe gwʼokugada olwʼobwakabaka bwa Kibbumba era nʼansengererya, tayezya okubba mwegi wange.
28 “Aale singa omoiza kwinywe abba ataka okwombeka okalina, tasooka kutyama nʼabalirira ebyetaagisya okwezya okubona ooba ngʼali nʼempiiya egimumala?
29 Ekyo kityo olwakubba singa ayezya kumala musingi gwonkani empiiya ni gimuwaaku, abantu balimusekerera,
30 nga bakoba bati, ‘Onu yatandiikire okwombeka kaisi nʼakaya okumaliirirya!’
31 “Ooba singa okabaka abba yatira okwaba okulwanisya okabaka ogondi omu lutalo, tasooka kutyama nʼaseega nga iye ali nʼamaje gʼabaisulukale 10,000 ooba ngʼayezya okuyinga oodi amulwanisya nʼabaisulukale 20,000?
32 Aale owaabba nga tayezya, atuma abakwenda ngʼoodi akaali ali yala, nʼamusaba ekyataka basyanie.
33 Kale, nʼomu ngeri enanyere eyo omuntu yenayena ansengererya ateekwa okusooka okuseega oku kyʼokwefiiriza byonabyona ebyalinabyo, kaisi nʼabba mwegi wange.”
34 Awo oYesu era nʼakoba ati, “Omuunyu omugaanike gwa mugaso omu byokulya, neye singa gusuuka mujaalaali, bagwiryamu batya ensa?
35 Gubba tigukaali gugasa kadi waire mwitakali, waire egibabbiirya okavundikirya, kale bagudyaka-budyaki eedi. Aale omuntu aliku amatwi agawulira, awulisisye era ategeere ekintumula.”