9
1 Era oYesu ni yeeyongera okubakoba ati, “Mbakobera amazima nti abamo oku bantu abali aanu, tibalifa nga bakaali okubonaku obwakabaka bwa Kibbumba nga buliwo nʼamaani.”
Okucuuka kwʼemboneka ya Yesu
(Mat 17:1-13; Luk 9:28-36)
2 Enaku mukaaga owegyabitirewo, oYesu nʼayaba nʼoPeetero, nʼoYaakobbo, nʼoYokaana nʼabeekubbembera, ni baniina olusozi oluwanvu ni babbaayo bonkani. Awo embonekaye nʼecuuka nga babona.
3 Ebizwalobye ni bimirikiinya, ni bitukula ino nga mpaawo kadi moiza oku kyalo ayezya okubitukulya paka atyo.
4 Ananyere awo Eriya nʼoMusa ni babeerukira nga batumula nʼoYesu.
5 Awo oPeetero nʼakoba oYesu ati, “Musomesya, kisa okubba aanu. Oleke tulukewo obusiisira busatu, akamo kako, akandi ka Musa, nʼakandi kʼEriya.”
6 OPeetero yakobere atyo, olwo-so ngʼebyokutumula bimugotere, olwakubba iye nʼabainaye, babbaire batiire ino.
7 Awo ekireri ni kiiza, ni kibabbuunaku nʼekiiriirye kyakyo, era eigono ni lizwera omu kireri ekyo nga likoba liti, “Onu niiye oMwana wange oguntaka eino, mumuwulisisye.”
8 Tete amangu ago baabire okulolyamika, nga tibabonaku muntu gondi aali nabo, okutoolaku oYesu yenkani.
9 Kaisi owebabbaire baniinuka oku lusozi, oYesu nʼabasisiitira ati, “Ekimuboine timukikoberangaku muntu yenayena paka oMwana wa Muntu ngʼamalire okuzuukira.”
10 Era bona ni bagondera ekyabakobere, neye ni beebuulyangana bati, “Ategeezere niki owaatumwire oku kuzuukira?”
11 Ananyere awo ni bamubuulya bati, “Lwaki abakugu omu byʼaMateeka ga Musa bakoba bati Eriya niiye ateekwa okusooka okwira kaisi oKurisito aize?”
12-13 OYesu nʼabairamu ati, “Kituuce, Eriya niiye aali nʼokusooka okwira okwirya emyoyo gyʼabantu obuyaaka. Neye mbakobera nti, omuntu aali ooti Eriya yaizire ira, ni bamukola ebintu byonabyona ebibatakire, ngʼeBiwandiike owebyamutumwireku.” Era nʼoMwana wa Muntu yena, bali nʼokumugadya eino, era nʼokumutalyanguka ngʼeBiwandiike owebimutumulaku.
OYesu alamya omwisuka owʼomuzimu
(Mat 17:14-21; Luk 9:37-43)
14 Kwolwo oYesu nʼabeegibe abasatu, owebazwire oku lusozi, ni baaja ekiziima kyʼabantu ekinene, nga kyeruguuliriirye abeegibe abandi, era ngʼabakugu omu byʼaMateeka ga Musa baakana nabo.
15 Abantu bonabona owebaboine oYesu, ni basiima ino, ni bairuka okwaba egyali, ni bamusangaalira.
16 Awo iye nʼabuulya abeegibe ati, “Niki ekimwakana nabo?”
17 Omoiza oku bantu abangi ababbairewo, nʼamwiramu ati, “Musomesya, nakuleeteire omutaane wange aliku omuzimu ogumugaana okutumula.
18 Buli owegumukwata, gumukubba ebigwo, nʼafuuja eifulo, nʼaluma amaino, era ni yeegolola nʼakala. Nsabire abeegibo okugumubbingaku neye ni bakaya.”
19 OYesu nʼabairamu ati, “Abantu inywe, abʼomulembe gunu ababula okwikirirya, nalimala na inywe kiseera kyenkana aina nga mbaguminkiriza? Ondeetere omwisuka nago.”
20 Batyo ni bamumuleetera.
Omuzimu owegwaboine oYesu, amangu ago ni gusukunsulya omwisuka, nʼagwa ansi, ni yeegalanzula, nga waafuuja eifulo.
21 OYesu nʼabuulya oiteeye wʼomwisuka ati, “Amalire ibbangaki kasooka omuzimu gunu gumukwata?” Iye nʼamwiramu ati, “Kuzwera nakimo mu butobuto.
22 Era emirundi mingi gumumuma omu musyo, ooba omu maizi, gumwite. Kale otukwatire ekisa, otubbeere, owoobba oyezya.”
23 OYesu nʼamwiramu ati, “Okobere oti, ‘Owoobba oyezya?’ Omanye oti byonabyona byezyeka, omuntu owaabba nʼokwikirirya.”
24 Amangu ago, oiteeye wʼomwisuka nʼairamu maaminkirira ati, “Njikirirya, neye era ombeere Musengwa, okwikirirya kwange kuweemu okubuusabuusa!”
25 OYesu oweyaboine abantu abandi bangi nga baiza bairuka, nʼakaawuukira omuzimu ati, “Iwe muzimu ogwa kutatumula, era ogwaigaire amatwi, nkulagira nti omwisuka oyo omuzweku, era tomwirangaku tete.”
26 Gutyo owegwamalire okwasyamika nʼokusukunsulya ino omwisuka, ni gumuzwaku, nʼawola ooti afiire. Era abakira obungi ni bakoba bati, “Afiire!”
27 Neye oYesu nʼamukwata oku ngalo, nʼamusetuca, era omwisuka nʼayemerera.
28 Oluzwanyuma, oYesu oweyakangire e ika, abeegibe ni bamubuulya bati, “Olwo lwaki iswe titwezyerye okugumubbingaku?”
29 Iye nʼabairamu ati, “Mpaawo kintu kindi ekimwezya okubbingisya omuzimu ogwʼengeri eenu oku muntu, okutoolaku okusaba oKibbumba.”
OYesu tete atumula oku kufaakwe
(Mat 17:22-23; Luk 9:43-45)
30 OYesu nʼabeegibe owebazwire awo, ni babita omu Galiraaya, oYesu nʼatataka abantu abandi bakimanye,
31 olwakubba yabbaire nʼabeegibe ngʼabeegesya ati, “OMwana wa Muntu baaba okumulyamu olukwe era bamuweeyo eeri abʼobwezye. Era balimwita, neye oku lunaku olwokusatu nga bamalire okumwita, yalizuukira.”
32 Neye ekiyabakobeire tibakitegeereku, kaisi tete ni batya okumubuulya.
Naani akira abainaye ekitiisya?
(Mat 18:1-5; Luk 9:46-48)
33 Batyo oYesu nʼabeegibe ni batuuka e Kaperenawumu. Owebamalire okwingira omu nyumba, oYesu nʼababuulya ati, “Mubbaire mwakana kuuki omu nzira?”
34 Neye ibo ni basirika olwakubba omu nzira babbaire baakana nga beebuulyangana bati naani akira ekitiisya mwibo?
35 Awo oYesu nʼatyama era nʼayeta abeegibe eikumi na babiri, ni baiza egyali. Nʼabakoba ati, “Buli ataka okubba omwekubbemberi, ateekwa kubba niiye asembayo mu bonabona, era nʼokubba muweererya wa bonabona.”
36 Ananyere awo nʼayeta omwana omutomuto, kaisi nʼamukoba okwemerera omu maiso gaabwe. Nʼamulera, kaisi nʼabakoba ati,
37 “Buli asangaalira omwana ooti yoonu okulwange, abba asangaaliire ninze. Era buli ansangaalira, abba tasangaaliire ninze, neye abba asangaalira yooyo eyantumire.”
Atatulwanisya tabba mulabe waiswe
(Luk 9:49-50)
38 Olundi oYokaana nʼakoba oYesu ati, “Musomesya, twaboine omuntu ngʼabbinga emizimu oku bantu ngʼakolesya eriinalyo, iswe ni tugezyaku okumuloberya olwakubba takusengererya aamo na iswe.”
39 OYesu nʼamwiramu ati, “Oyo timumuloberyanga, olwakubba buli akola ebyewunyo ngʼakolesya eriina lyange, tayezya kwanguya kuntumulaku obubbibubbi nga wankabitawo ekiseera ekitono kiti.
40 Buli atatulwanisya, oyo yena abba munaiswe.
41 Mbakobera amazima nti buli abawa inywe amaizi agʼokunywa olwakubba muli bantu ba Kurisito, anambula kubuusabuusa yalisuna empeeraye.”
Ebitendera abantu okukola ekibbikibbi
(Mat 18:6-9; Luk 17:1-2)
42 “Singa omuntu yenayena azweraku omoiza oku batobato abo abanjikiririryamu okukola ekibbikibbi, ekikiraku, omuntu oyo kumusiba ibbaale erizito omu mamiro, ni bamudyaka omu nyanza.
43 Era singa engaloyo ekuzweraku okukola ekikole ekibbikibbi, ogitemeku. Kisa osune obwomi obutawaawo ngʼoli muleme, okukiraku okusigalya engalo eibiri, neye ni bakumuma, omu geyeena, [
44 omuli omusyo ogutalikira, era omutawa nʼokuvunda].”
45 Ooba singa ekigerekyo kikuzweraku okukola ekikole ekibbikibbi, okitemeku. Kisa osune obwomi obutawaawo ngʼoli muleme, okukiraku okusigalya ebigere ebibiri, neye ni bakumuma omu geyeena, [
46 omuli omusyo ogutalikira, era omutawa nʼokuvunda.]
47 “Abba ngʼeriisolyo niiryo erikuzweraku okukola ekikole ekibbikibbi, olyokolemu. Kisa oingire obwakabaka bwa Kibbumba ngʼoli wʼeriiso limo, okukiraku okusigalya amaiso gonagona, neye ni bakumuma omu geyeena,
48 omuli omusyo ogutalikira, era omutawa nʼokuvunda.
49 “OKibbumba yalikengeiza buli mwikirirya okumusuuca omusa, ngʼosyodo owaabba omusa nga bamulungiiremu omuunyu.
50 Omuunyu omugaanike gwa mugaso, neye singa gusuuka mujaalaali, mwezya mutya okugwiryamu ensa? Mubbe nʼomuunyu omu mpisa gyanywe, era mubbe mwidembe nʼabantu.”