5
Okulabula oku bulendi
1 Mwana wange, owulisisye amalabuki gange,
otege ekitwi eeri ebibono ebinkwegesya,
2 kaisi okolenge ebyʼamalabuki,
era ebibonobyo biragenge biti oli nʼokumanya.
3 Ebibono byʼomukali omulendi, binyuunyuula ooti mujenene,
era ebibonobye bikiraku amafuta gʼomuzaituuni okuweweerya,
4 neye oku nkomerero, aluluwa ooti ndulwe,
asala ooti mpiima yʼobwogi obubiri.
5 Akuserengetya mu kufa,
enziraye eyaba buterembereri magombe.
6 Tafaayo oku nzira yʼobwomi,
amanzirage macaamu neye takimaite!
7 Kale atyanu baana bange, mumpulisisye;
timwazwanga oku bibono ebintumula.
8 Omukali ngʼoyo, wamwewalenge,
era toigereranga oku mulyango gwʼenyumbaye.
9 Singa okikola, abandi balitwala ekitiisyakyo,
omuntu omukambwe nʼakwita ngʼokaali muvuvuka.
10 Demba abantu abʼe nza ni beetwalira ebyobusunibyo,
era ebiwateganiire ni bisuuka byʼomuntu gondi!
11 Oku nkomerero yʼobwomibwo,
ngʼoyondere osigaire magumba, walikenyera.
12 Walikoba oti, “Kale lwaki nacaawire okundaabbira?
Era lwaki omwoyo gwange gwanyoomere okugunenya?
13 Tinawulisisyanga abasomesya bange,
waire okutega ekitwi eeri abanjegesya.
14 Mbulireku katono okuswalira kimo ino
aakati omu bantu abakumbaine!”
15 Onywenge maizi gʼomwiruba eriryo,
ogabanenge okutakakwo nʼomukali owuwo yenkani.
16 Lwaki osukaania amaizi gʼomwirubalyo omu nguudo
ni weegaitanga nabuli mukali?
17 Amaizi gʼomwiruba eryo gabbenge gago wenkani
tiwagagabananga nʼabʼe nza.
18 Oleke omukaliwo abbenge nsulo yʼeisangaalolyo.
Era osangaalenge nʼomukali owʼomu mavuvukago.
19 Yeesiimisya era asangaalya ooti mboneka ya kisolo omutomuto.
Oleke amabeerege gakumalenge enaku gyonagyona,
bulijo okutakakwe kukusangaalisyenge.
20 Lwaki mwana wange, omukali omulendi akusendasenda,
Lwaki ogwa omu kifubba kyʼomukali wʼabananyere?
21 OMusengwa abona nabuli muntu ekyakola,
era yeetegereza amanzira gʼomuntu gonagona.
22 Ebibbibibbi byʼomuntu omubbimubbi bimusuukira mutego,
ebibbibibbibye ebyakola bimusuukira ooti miguwa egimusiba.
23 Yalifa olwʼokubba yagaine okwekuuma,
aliiba olwʼobusirusirubwe obubitiriri.