11
Eeri akubbembera abembi. EZabbuli ya Dawudi.
Okwesiga oMusengwa
1 Nze njirukira eeri Musengwa okunkuuma,
mubba mutya okunkoba muti,
“Oguluke ooti nyonyi oyabe omu nsozi?”
2 Olwʼokubba ababbibabbi bategere obulaso bwabwe,
beebisire omu ndiikirya nʼobulaso bwabwe,
nga bataka okulasa
abalongoole omu myoyo.
3 Emisingi gyʼamateeka owegivunika,
kintuki omutuukirirye ekyayezya okukola?
4 OMusengwa ali omu Yeekaaluye entukulye,
oMusengwa ali oku ntebeye eyʼobwakabaka omwigulu.
Alingirira abantu bonabona,
era yeekeenenya ebibakola.
5 OMusengwa yeekeenenya ebikole byʼabatuukirirye,
neye acaawa ababbibabbi
abataka ebikole byʼobukambwe.
6 Ababbibabbi yabamagalicaaku
amakala gʼomusyo nʼomusyo gwa salufa,
nʼempewo yʼeibbugumu eribitiriri niibyo ebyabba omugabo gwabwe.
7 Ekyo kityo olwʼokubba oMusengwa mutuukirirye,
era ataka bikole ebyʼobutuukirirye.
Abalongoole omu myoyo balibba omumaisoge.