110
EZabbuli ya Dawudi.
OMusengwa asuubiza okabaka obuwanguli
1 OMusengwa yakobere oMusengwa wange ati,
“Otyame ngʼondiraine, oku lubba lwange olwʼengalo endiiro,
paka owenaligondya abalabebo
ni mbasuuca mukonkolo gwʼokuwuumuliryaku ebigerebyo.”
2 OMusengwa yaligalamya obwakabakabwo okuzwera omu Sayuuni;
walifuga abalabebo abakweruguuliriirye.
3 Oku lunaku olwʼokulwanisiryaku abalabebo
amajeego galyewaayo ni gakwegaitaku.
Abavuvukabo baliiza e gyoli,
oku nsozi entukulye okukubbeera, ni bakwiryamu amaani
ngʼolume lwʼamakeezi oweruwolya eitakali.
4 OMusengwa yalayiire era tiyalicuusa
ekiyalayiire ati,
“Oli kabona owʼemirembe nʼemirembe,
okufaananaku nʼoMerikizedeki ngʼoweyabbaire kabona.”
5 OMusengwa ali oku lubbaalwo olwʼengaloyo endiiro okukukuuma,
oweyalisunguwala, yalisasaigula abakabaka.
6 Yaliramula amawanga, ekyalo ni kiizula emirambo,
era yalisasaigula abafugi oku kyalo kyonakyona.
7 Neye iye okabaka yalinywa okwiruba eriri oku nzira,
era yaliiramu amaani olwakuwangula abalabebe.