136
Obwezye obwa Musengwa
1 Mwebalye oMusengwa olwʼokubba musa,
Okutakakwe okutakoma kubbeerererawo emirembe gyonagyona.
2 Mwebalye oKibbumba afuga abakibbumba,
Okutakakwe okutakoma kubbeerererawo emirembe gyonagyona.
3 Mwebalye oMusengwa wʼabasengwa,
Okutakakwe okutakoma kubbeerererawo emirembe gyonagyona.
4 Mumwebalye iye yenkani akola ebyamagero ebyʼamaani,
Okutakakwe okutakoma kubbeerererawo emirembe gyonagyona.
5 Iye oyo eyakolere eigulu nʼamalabukige,
Okutakakwe okutakoma kubbeerererawo emirembe gyonagyona.
6 Iye oyo eyaalire ekyalo oku maizi,
Okutakakwe okutakoma kubbeerererawo emirembe gyonagyona.
7 Iye oyo eyakolere ebyaka ebinene,
Okutakakwe okutakoma kubbeerererawo emirembe gyonagyona.
8 Iye oyo eyakolere eisana okufuganga omusana,
Okutakakwe okutakoma kubbeerererawo emirembe gyonagyona.
9 Iye oyo eyakolere omweri nʼenkota bifugenge obwire,
Okutakakwe okutakoma kubbeerererawo emirembe gyonagyona.
10 Iye oyo eyaitire ebibere ebyʼe Misiri,
Okutakakwe okutakoma kubbeerererawo emirembe gyonagyona.
11 Era iye oyo eyatoiryemu aBaisirairi omu Bamisiri,
Okutakakwe okutakoma kubbeerererawo emirembe gyonagyona.
12 Iye oyo eyakoleserye obwezyebwe,
Okutakakwe okutakoma kubbeerererawo emirembe gyonagyona.
13 Iye oyo eyayawiiremu eNyanza eNtukuliki aakati,
Okutakakwe okutakoma kubbeerererawo emirembe gyonagyona.
14 Era nʼabitya aBaisirairi aakati waayo,
Okutakakwe okutakoma kubbeerererawo emirembe gyonagyona.
15 Neye iye nʼasaanyawo oFalaawo nʼamajeege omu Nyanza eyo eNtukuliki.
Okutakakwe okutakoma kubbeerererawo emirembe gyonagyona.
16 Iye oyo yakubbembeire abantube okubabitya omwidungu.
Okutakakwe okutakoma kubbeerererawo emirembe gyonagyona.
17 Iye oyo eyaitire abakabaka abʼamaani,
Okutakakwe okutakoma kubbeerererawo emirembe gyonagyona.
18 Iye oyo eyaitire abakabaka abatutumuki,
Okutakakwe okutakoma kubbeerererawo emirembe gyonagyona.
19 Eyaitire oSikoni okabaka wʼaBamooli,
okutakakwe okutakoma kubbeerererawo emirembe gyonagyona,
20 nʼOgi okabaka wa Bbasani,
okutakakwe okutakoma kubbeerererawo emirembe gyonagyona.
21 Nʼekyalo kyabwe nʼakiwaayo ngʼobusika,
okutakakwe okutakoma kubbeerererawo emirembe gyonagyona,
22 nʼakiwa oIsirairi omuweereryawe.
Okutakakwe okutakoma kubbeerererawo emirembe gyonagyona.
23 Iye oyo eyatwebukiirye nga tuli omu bunafu,
Okutakakwe okutakoma kubbeerererawo emirembe gyonagyona,
24 nʼatununula eeri abalabe baiswe.
Okutakakwe okutakoma kubbeerererawo emirembe gyonagyona.
25 Iye oyo awa ebibbumbe byonabyona ebyomi ebyokulya.
Okutakakwe okutakoma kubbeerererawo emirembe gyonagyona.
26 Mwebalye oKibbumba owʼomwigulu.
Okutakakwe okutakoma kubbeerererawo emirembe gyonagyona.