45
Eeri akubbembera abembi. Olwembo olubaabiire ku kuwooya “kwʼebimuli.” EZabbuli yʼabʼeibyaire lya Koola.
Olwembo lwʼobugole bwa kabaka
1 Omwoyo gwange gwizwire ebibono ebisa
nga nnyembera okabaka olwembo olunjiyire.
Olulumi lwange lutomboolya ebibono ooti kalaamu yʼomuwandiiki omukugu.
2 Oli muŋoono okukiraku abasaiza bonabona,
era oli mutumuli omusa,
olwʼokubba oKibbumba akuwaire enkabi egyʼenkalaakalira.
3 Weesibe empiimayo omu nkende iwe omulwani owʼamaani.
Oli wʼekitiisya era oli mukulu.
4 Omu kitiisyakyo ngʼoli oku mbalaasi owangulenge
olwʼokulwanirira amazima, nʼobuwombeeki nʼobutuukirirye.
Oleke engaloyo endiiro, ekole ebyewunyisya.
5 Obulasobwo obwogi busumute emyoyo gyʼabalabebo,
Owangule abanamawanga babbe ansi wʼobwezyebwo.
6 Obwakabaka oKibbumba obwakuwaire bwakubbaawo emirembe nʼemirembe.
Okufugakwo omu bwakabakabwo kutambulira ku bwenkanya.
7 Otaka ebikole byʼobutuukirirye nʼocaawa obubbibubbi.
Kagira nze oKibbumba, oyo oKibbumbawo, nkusukireku amafuta
ni nkuwa eisangaalo erikira eryʼabandi bonabona.
8 Amaganduula gaanywe gonagona gafunya okalifuwa ogubeeta omiira, nʼogondi bati alowe, nʼokaisiya.
Ebivuga byʼenkosi ebibakubba bikusangaalisya
ngʼoli omu mbirigyo egibajolijirye nʼamasyanka.
9 Omu bakali abʼekitiisya abakuweererya mulimu abambeiza,
omugolewo ali oku lubba olwʼengaloyo endiiro azwaire ebyʼamajolobero ebyʼezaabbu yʼOfiri.
10 Mumbeiza, ontegere ekitwi, owulisisye era otwale ebinkukoba;
weerabire abantu bʼewaanywe nʼabʼekikaakyo.
11 Obusiipoonobwo bwasikirizanga okabaka.
Omugonderenge olwʼokubba niiye omusengwawo.
12 Abantu bʼe Tiiro balikuleetera ebirabo,
abasuni balikwegudyera.
13 Omumbeiza ali omu Lubiri, omu kitiisyakye
ekizwalokye bakijolijirye nʼewuuzi egyʼezaabbu.
14 Azwaire ekizwalo ekibatungire omu wuuzi gyʼerangi egyʼenjawulo, bamutwala eeri okabaka,
ngʼemperya enguna
gimuzwaku e nyuma.
15 Babatwala nga bali omwisangaalo nʼokujaagaana
ni baingira omu lubiri lwa kabaka.
16 Abaanabo balibba bakabaka ngʼabazeiza baabwe,
walibasuuca bakabaka omu kyalo kyonakyona.
17 Abantu beebukiryanga eriinalyo emirembe gyonagyona olwʼolwembo lwange.
Era abantu bakuwuujanga emirembe nʼemirembe.