47
Eeri akubbembera abembi. EZabbuli yʼabʼeibyaire lya Koola.
OKibumba niiye afuga ekyalo kyonakyona
1 Mukubbe omu ngalo bantu inywe abʼamawanga gonagona,
Mubbookooke enyembo gyʼeisangaalo nga muwuuja oKibbumba,
2 olwʼokubba oMusengwa oNambulaku aMwagaagana wʼentiisya.
Niiye oKabaka omukulu afuga ekyalo kyonakyona.
3 Yatuwanguliire abʼamawanga,
nʼatwezyesya okufuga amawanga ago.
4 Yatulondeire ekyalo ekitulimu okubba obusika bwaiswe,
ekitwesiimisya iswe eibyaire lya Yaakobbo abaasiima.
5 OKibbumba ayabire e ngulu ngʼabantu webaceera olwʼeisangaalo.
OMusengwa ayabire e ngulu ngʼabantu webafuwa amakondeere.
6 Mwembe okuwuuja oKibbumba, mwembe okumuwuuja.
Mwembe okuwuuja oKabaka waiswe, mwembe okumuwuuja.
7 Olwʼokubba oKibbumba niiye oKabaka wʼekyalo kyonakyona,
mumwembere enyembo egimuwuuja.
8 OKibbumba afuga amawanga gonagona,
ngʼatyaime oku ntebeye eyʼobwakabaka entukulye.
9 Abafugi bʼamawanga bakumbaine nʼabantu ba Kibbumba wa Ibbulaimu.
Olwʼokubba oKibbumba niiye afuga
abʼekubemberi bʼoku kyalo,
oKibbumba bamugulumalyenge ino.