60
Eeri akubbembera abembi. Okwabira okwigono, “EKimuli kyʼeNdagaano.” EZabbuli ya Dawudi. Yʼokwegesya. Amagono ga Dawudi oweyalwaniire nʼaBaalamu abazwire e Nakalayimu nʼabazwire e Zobba, oYowaabbu nʼakanga nʼaita aBeedomu 12,000 omu Kiinamo kya Cumbi.
Okusaba oKibbumba obuwanguli
1 Oo Kibbumba otulekeswire, era nʼotoolawo obukuumibwo egituli.
Otusunguwaliire, neye otwiriryemu.
2 Otengeeterye ekyalo nʼokyatyaga ni kyasaamirira.
Atyanu oigale enjatikira gyakyo egyo, olwʼokubba kiri kumulunguka.
3 Olekere abantubo ni bagada ino,
tugagaituka ooti bateemeere.
4 Neye abo abakutya, obasiiriirye ebbendera ngʼobalabula
kaisi bayezye okuwunuka okujigirika.
5 Otununule era otubbeere ngʼokolesya obwezyebwo,
kaisi abatakebo bayezye okuwunuka.
6 OKibbumba atumuliire omu Weemaye ati,
“Naligabulyagamu oSekemu nga njaagaana,
ni nsalasalamu ekiinamo oSukosi.
7 OGireyaadi kyalo kyange, nʼoManase kyange.
Efulaimu iye nkofiira yange eyʼekyoma,
oBuyudaaya iye mwigo gwange ogwʼobwakabaka.
8 OMowaabbu iye kalaayi omunnaabira.
Edomu iye gimmumaku engaito gyange;
era nceera olwʼokubba mpangwire ekyalo kyʼe Firisitiya.”
9 Naani eyalinnyingirya omu kibuga ekiriku olugaga?
Naani eyalineekubbembera okwingira omwEdomu?
10 Oo Kibbumba, dala otulekeswire?
Tokaali oyaba nʼamaje gaiswe omu lutalo?
11 Otuwe obubbeeri okulwanisya omulabe oyo,
olwʼokubba obubbeeri bwʼabantu tibugasa.
12 Nga tuli nʼoKibbumba twasunanga obuwanguli,
era niiye eyayemyagiranga ansi abalabe baiswe.