15
Okusangaalya abandi
1 Iswe abacaati omu kwikirirya tusaaniire okubbeera abo abanafu, nga titwefa ku niiswe swenkani.
2 Nabuli moiza mwiswe aseegenge ku busa bwa muntu omwinaye, kaisi awo ayezye okumwemereryawo omu kwikirirya.
3 NʼoKurisito tiyeeseegangaku niiye onyere yenkani, wazira, ngʼowebakiwandiikire bati, “Abantu ebibakuduulanga byairire ku ninze.”
4 Byonabyona eBiwandiike eira babiwandiikire kutwegesya, kaisi oolwo tubbenge nʼosuubi olwʼokuguminkiriza nʼolwʼamaani eBiwandiike agebituwa.
5 Era oKibbumba onanzwa wʼokuguminkiriza era nʼamaani, abawe okubbanga nʼenseega emoiza ngʼoKurisito Yesu owaataka,
6 kaisi awo muwuujenge oKibbumba, oIteeye wa Musengwa waiswe oYesu Kurisito, nʼomwoyo gumo nʼeigono limo.
AMawuliro aMasa eeri aBatali Bayudaaya
7 Mwanirizanganenge ngʼoKurisito oweyabaanirizire inywe, oKibbumba kaisi bamuwenge ekitiisya.
8 Nkoba nti oKurisito yasuukire omuweererya wʼabakomole, okulaga ngʼoKibbumba owaali omwesigwa, nʼokutuukirirya ebyo oKibbumba ebiyasuubizire abazeiza baiswe;
9 era nʼokwezyesya aBatali Bayudaaya okuwuuja oKibbumba olwʼokusaasirakwe, ngʼowebakiwandiikire bati:
“Nʼolwekyo nakuwuujanga omu Batali Bayudaaya,
era ni nnyemba nga mpuuja eriinalyo.”
10 Era ekindi kikoba kiti:
“Inywe aBatali Bayudaaya,
musangaalirenge aamo nʼabantube.”
11 Era kiti:
“Nywenanywena aBatali Bayudaaya muwuujenge oMusengwa.
Era abantu bonabona bamuwuujenge.”
12 Era nʼoIsaaya akoba ati:
“Omwizukulu wa Yese yaliiza,
era nʼazwayo okufuga aBatali Bayudaaya.
Era mwiye niimwo omwalibba eisuubi lyabwe.”
13 OKibbumba onanzwa wʼokusuubira, abaizulye inywe eisangaalo lyonalyona nʼeidembe olwʼokumwikirirya, kaisi oolwo mweyongerenge okubba nʼosuubi olwʼamaani ga Mwoyo oMweru.
Ensonga ewandiikisya oPawulo nʼobukanu
14 Baganda bange, zena onyere nkakasira nakimo nti inywe mwizwire empisa ensa, muli nʼokumanya okwizulye, era mwezya okweraabbirangana.
15 Neye omu bitundu ebimo ebyʼebbaluwa eenu, mbawandikiire nʼobukanu, nga ndiku nʼebimbeewukirya. Ekyo nkikolere, olwakubba oKibbumba yankwatiire ekisa,
16 nʼampa okubba omuweererya wa Kurisito oYesu nga nkolera mu bantu aBatali Bayudaaya. Nkola omulimo ogwʼobwakabona, nga ndaabba eeri abantu aMawuliro aMasa agazwa egiri oKibbumba, aBatali Bayudaaya kaisi babbe ekirabo oKibbumba ekyasiima, ngʼakitukwirye nʼoMwoyo oMweru.
17 Nʼolwekyo omu Kurisito oYesu njezya okwenyumiriza olwʼomulimo ogunkoleire oKibbumba.
18 Ekyo kityo olwakubba tinjabira oku kutumula oku kintu waire kimo, okutoolaku kwebyo oKurisito ebiyakolere mu nze, nʼasuuca aBatali Bayudaaya abawulisisya oKibbumba, ngʼabitira mwebyo ebinatumwire nʼebinakolere,
19 omu maani gʼebyewunyo nʼebyamagero, nʼomu maani ga Mwoyo oMweru. Ntyo okuzwera nakimo e Yerusaalemi okweruguulya paka okutuuka omwIririko, nʼalaabbire eeri abantu aMawuliro aMasa agafa oku Kurisito.
20 Ekinnuwirira buliijo, niikwo okulaabba eeri abantu aMawuliro aMasa omu bifo ebyo eriina lya Kurisito egibakaali kuliwulirangaku, kaisi awo mbe nga tinnyombeka ku musingi gwa muntu gondi.
21 Wazira ngʼowebakiwandiikire bati:
“Abo abebakaali kumanyikisya ebimufaaku balimubona,
nʼabatawulirangaku ebimufaaku balimutegeera.”
22 Ekyo niikyo ekyandobesereirye emirundi emingi okwiza egimuli.
OPawulo ategeka okucaalira abʼe Looma
23 Neye atyanu ngʼowemmaliriirye omulimo gwange omu bitundu ebyo, era ngʼowemmalire emyanka emingi nga ntaka okwiza okubabona,
24 owenalibba njaba omu Supeini, nsuubira okubitiraku eeyo e waanywe mbaboneku okumala enaku egyeraku. Owenalimala okunyumirwa okubbaaku aamo na inywe, ntaka mumbeere okutuuka omu Supeini.
25 Owentumulira aanu njaba Yerusaalemi okutwalira abatuukirirye obubbeeri.
26 Abʼe Makedooniya nʼabʼAkaya basiimire okuwaayo oku byabwe, okubbeera abatuukirirye abadoobi, abali e Yerusaalemi.
27 Ekyo niibo abakyesiimiire okukikola. Neye ngʼera bali nʼeibbanja okubbeera abadoobi abo, olwakubba aBatali Bayudaaya bagabanire oku bisa ebyʼomwoyo ebyʼaBayudaaya, nʼolwekyo basaaniire bona okubbeera aBayudaaya omu byʼomubiri.
28 Kale owenalimaliirirya omulimo ogwo, nga mmalire okubakwatisya byonabyona ebibabaweereirye ibo, nalizwayo ni mbitira e waanywe, nga njaba e Supeini.
29 Mmaite nti owenaliiza egimuli, naliiza nʼenkabi gya Kurisito enjizulye.
30 Boluganda, mbegairiire omu liina lya Musengwa waiswe oYesu Kurisito, nʼolwʼokutaka kwa Mwoyo oMweru, mwefudeku aamo na nze okunsabira eeri oKibbumba.
31 Munsabire mpunuke abo abataikirirya abali omu Buyudaaya, era nʼabatuukirirye abali omu Yerusaalemi, basiime ebimbatwalira.
32 Kaisi oolwo ngʼoKibbumba atakire, naliiza egimuli nga njizwire eisangaalo, mpuumuleku nga ndi aamo na inywe.
33 OKibbumba agaba eidembe abbenge na inywe nywenanywena. Amiina.