18
Okugwa okwa Bbabbulooni
1 Ebyo owebyawoire, ni mbona omalaika ogondi ngʼaika okuzwa omwigulu, ngʼali nʼobwezye bungi ino, era nʼokwaka okwamubbaireku ni kumoleka ekyalo.
2 Nʼabbookooka nʼeigono eryaminkirira ati:
“OBbabbulooni ekibuga ekinene kijigirikire!
Kisuukire ikumbaaniro eryʼebinyonyi byonabyona ebibbibibbi era ebyomuliko.
Era niikyo ekisito emizimu gyonagyona omu gikumbaanira.
3 Ekyo kityo olwakubba amawanga gonagona gateemeire omwenge ogwʼobulendi bwakyo
obwʼokusinza ebifaananyi.
Abakabaka abʼoku kyalo bayendere nakyo,
nʼabasuubuuzi abʼoku kyalo basuniire obusuni mu kucakala kwakyo okubitiriri.”
4 Tete ni mpulira eigono erindi erizwa omwigulu nga likoba liti,
“Abantu bange mbalabula, mukizwemu,
kaisi muwunuke okwingira omu bibbibibbi byʼabantu byakyo
era nʼokubatwalirya omu kugada kwakyo.
5 Ekyo kityo olwakubba ebibbibibbi byakyo bituukire omwigulu,
nʼoKibbumba asalirewo okubonereza okubbenga kwakyo.”
6 Era akoba abamalaika ati:
“Musasule oBbabbulooni ebintu ebibbibibbi ebiyakolere abandi.
Oku bikole ebyʼekibuga ekyo, inywe musingisyewo emirundi mibiri.
Obulumi obuyatuucirye oku bainaye
mubumutuuceku yena nga mukubbisyamu emirundi mibiri.
7 Egikyakomerye okwegulumalya nʼokwejalabya nywena gimubba mukomye
okukigadya era nʼokukikunja,
olwakubba kyewaana nga kikoba kiti:
‘Ntyaime ngʼokabaka, tindi namwandu
era tinalibbaaku mu kugada naire.’
8 Nʼolwekyo ebirulumo ebyalikigadya,
byalikiizira mu lunaku lumo, ni bireeta enzala, nʼokuyungubala, nʼokufa.
Era ekibuga ekyo balikyoca omusyo,
olwakubba oMusengwa oKibbumba iye wa bwezye akisingisya omusango.”
9 Abakabaka abʼoku kyalo abayendanga nakyo ni babba aamo nakyo omu byʼamasanyu owebalibona nga bakyoca kiduunya omwosi, balikuukulya ni bakikunga.
10 Balyemerera yala yala olwʼokutya okugada kwakyo, ni bakoba bati,
“Wobe! Wobe! Nga walaba iwe ekibuga ekinene!
Iwe ekibuga ekyʼamaani dala
bakujigiricirye omu saawa moiza yonkani!”
11 Abasuubuuzi abʼoku kyalo bona bakikunga ni beekondamira olwakubba ababbaire bagula ebintu byabwe bafiire bawoirewo.
12 Tiwakaali waliwo agula ezaabbu nʼefeeza, nʼamabbaale agʼebbeeyi, nʼago agebeeta luulu; amajoola amasa agʼebbeeyi eino, nʼebya liiri nʼebitukuliikiriri. Era, buli musaale ogwʼakaloosa, nabuli kintu ekyʼamasyanka. Era, buli kintu ekyʼomusaale ogwʼebbeeyi eino, nʼekya bbulonzi, nʼekyʼekyoma, nʼekyʼamabbaale amasa.
13 Era tiwakaali waliwo agula ebyakaloosa nʼebirungo ebya syodo, nʼobubbaani, nʼamafuta agʼakaloosa agebeeta miira, nʼenvumbo; omwenge ogwʼemizabbibbu, nʼamafuta; obusye obubakuŋuntire okusani eino, nʼengaano; ente nʼentaama, nʼembalaasi nʼebigaali; abagalama nʼabantu abebanyagire omu lutalo.
14 Abasuubuuzi balikikoba bati:
“Ebisa byonabyona ebiwegombanga okusuna, kibuga iwe,
bikufiire bityo.
Ebyobusuni byonabyona nʼebyʼekitiisya bikuwoireku,
era tokaali oirayo okubibonaku naire.”
15 Abasuubuuzi abʼebintu ebyo abekyagaigawairye, balyemerera yala yala olwʼokutya okugada kwakyo, ni bakunga era ni beekondamira,
16 ni bakoba bati:
“Wobe! Wobe! Nga walaba iwe ekibuga ekinene,
ekyazwalanga ebizwalo ebisa ebyebbeeyi eino, era ebitukuliikiriri nʼebitukuliki;
ni bakutimba okukujolija nʼezaabbu,
nʼamabbaale agʼebbeeyi, nʼaago agebeeta luulu!
17 Omu saawa moiza yonkani, obusuni obwo bwonabwona bujigirikire!”
Abavugi abʼamaato nʼamameeri bonabona, nʼabagatambuliramu bonabona, nʼabo bonabona abasuubuulira oku nyanza balyemerera yala yala.
18 Owebalibona omwosi gwakyo nga kiya, balyaminkirira nga bakoba bati, “Tiwabbangawo ekibuga ekyagaagana kinu obunene!”
19 Ni beesuka enkungu omu mitwe gyabwe, ni baasyamika nga bakuukulya era nga bawolooga, nga bakoba bati:
“Wobe! Wobe! Nga walaba iwe ekibuga ekinene,
ekyagaigawairye abanyere amaato agʼoku nyanza!
Omu saawa moiza yonkani bakujigiricirye!”
20 Ni wabbaawo eyakobere ati:
“Neye inywe omwigulu musangaale olwakubba bakijigiricirye!
Inywe abatuukirirye, na inywe abatume nʼabanaabbi musangaale,
olwakubba oKibbumba akisingisirye omusango
olwʼebyo ebikyakolere!”
21 Awo omalaika owʼamaani nʼasetula eibbaale eriri ooti gumengo ogunene, nʼagudyaka omu nyanza ngʼakoba ati:
“OBbabbulooni ekibuga ekinene balikudyaka batyo ansi nʼamaani amangi,
nandi nʼoirayo kubonekaku!
22 Enyembo egyʼabakubbi abʼamatongoli, nʼegyʼabembi, nʼegyʼabafuwa amakondeere,
tibyaliirayo kuwulikika mwiwe.
Timwalibba mukugu omu mulimo naabba gumo
eyaliirayo okuboneka mwiwe,
waire kuvuga okwʼemengo ngʼeesya
eyaliirayo okuwulikika mwiwe.
23 Ekitangaala ekyʼeitaala tikyaliirayo kuboneka mwiwe.
Waire eigono eryʼaleeta omukali omugole nʼeryʼaibaaye
tiryaliirayo okuwulikika mwiwe.
Abasuubuuzibo babbaire bakulu ino omu kyalo,
era obulogobwo bwabbeyabbeyere amawanga gonagona!
24 Mwikyo eisaaye eryʼabanaabbi nʼeryʼabatuukirirye,
nʼerya bonabona abebaitire oku kyalo, niimwo omu balyajiirye.”