7
ABaisirairi 144,000 abaliku eraama
1 Ebyo owebyawoire, ni mbona abamalaika bana, nga beemereire omu njuyi eina egyʼekyalo. Babbaire bakwaite bakalangwire empunga egizwa omu njuyi eina egyʼekyalo, tiwaabbaawo mpunga afuwa oku kyalo, ooba oku nyanza, kadi oku musaale ogumo.
2 Kaisi tete ni mbona omalaika ogondi ngʼaniinaniina azwa e buzwaisana, ngʼakwaite ekintu ekikola eraama ya Kibbumba onyere obwomi. Nʼayeta nʼeigono eryaminkirira, ngʼayeta abamalaika abana abebalagiire okukola akabbikabbi oku kyalo nʼoku nyanza.
3 Nʼakoba ati, “Timwakola kabbikabbi oku kyalo, ooba oku nyanza, waire oku misaale, paka owetwalimala okuteeka eraama oku mpumi egyʼabaweererya aba Kibbumba waiswe okubakuuma!”
4 Awo ni mpulira obungi obwʼabo abebateekereku eraama. Babbaire 144,000, abazwa mu buli kika ekyʼabantu abʼe Isirairi.
5 Abʼomu kika ekya Yuda, abebateekereku eraama babbaire 12,000.
Abʼomu kika ekya Lubbeeni 12,000,
nʼabʼomu kika ekya Gaadi 12,000.
6 Abʼomu kika ekyʼAseri 12,000,
nʼabʼomu kika ekya Nafutaali 12,000,
nʼabʼomu kika ekya Manaase 12,000.
7 Abʼomu kika ekya Simyoni 12,000,
nʼabʼomu kika ekya Leevi 12,000,
nʼabʼomu kika ekya Isakaali 12,000.
8 Abʼomu kika ekya Zabbulooni 12,000,
nʼabʼomu kika ekya Yusufu 12,000,
nʼabʼomu ekya Bbenyamini 12,000.
Oguziima ogwʼabantu abʼebizwalo ebyeru
9 Ebyo owebyawoire, ni nningirira, ni mbona oguziima ogwʼabantu ogutabalika. Bazwire mu byalo byonabyona, nʼomu mawanga gonagona nʼomu bika byonabyona, nʼomu ntumu gyonagyona. Ni beemerera omu maiso agʼentebe eyʼobwakabaka, nʼomu maiso aga Ntaama oMutomuto wa Kibbumba oguyawaireyo ngʼesadaaka olwʼebibbibibbi byʼabantu. Abantu babbaire bazwaire ebizwalo ebyanviriri ebyeru, nga basangaala era bakwaite nʼamasaga agʼensansa.
10 Ni batumula nʼeigono eryaminkirira bati:
“Okulokola kuzwa giri Kibbumba waiswe
atyaime oku ntebe eyʼobwakabaka, era nʼoNtaama oMutomuto wa Kibbumba!”
11 Abamalaika bonabona babbaire beemereire, nga beeruguuliriirye entebe eyʼobwakabaka nʼabakaire badi 24 abʼekitiisya, nʼebibbumbe ebyomi ebina. Awo ni bakotama oku mazwi omu maiso gʼentebe eyʼobwakabaka, okuwa oKibbumba ekitiisya ni bamusinza,
12 nga webakoba bati:
“Amiina! Kibbumba waiswe
okuwuuja, nʼekitiisya, nʼokwebalya,
era amalabuki, nʼobwezye nʼamaani
bibyo emirembe nʼemirembe. Amiina.”
13 Awo omoiza oku bakaire nʼambuulya ati, “Aale iwe omaite abantu abo abazwaire ebizwalo ebyanviriri ebyeru waire egibazwa?”
14 Ni mmwiramu nti, “Musengwa, niiwe omaite.” Nʼankoba ati, “Abo niibo ababitire omu kugada okunene, era ni booza ebizwalo byabwe ebyʼomu mwoyo, niikwo okusuuka abeeru olwʼeisaaye eryasusukire omu kufa okwa Ntaama oMutomuto wa Kibbumba.
15 Nʼolwekyo,
‘bali omu maiso gʼentebe eya Kibbumba,
era baweererya omusana nʼobwire omu Yeekaaluye.
Era oyo atyaime oku ntebe eyʼobwakabaka,
yaabbanga nabo ngʼabalabirira.
16 Tibaliirayo kulumwa nzala nʼenyonta.
Eisana tiryalibooca, naabba ekyoca ekindi kyonakyona.
17 Ekyo kityo olwakubba oNtaama oMutomuto wa Kibbumba, oyo aali akati wʼentebe eyʼobwakabaka,
yabalabiriranga.
Era yalibatuuca oku miiga gyʼamaizi agʼobwomi ni banywa ni basuna obwomi obutawaawo.
Era oKibbumba yalibba atoirewo okugada kwabwe kwonakwona.’ ”