2
1 Malè a sila k ap fè plan inikite yo,
k ap manevre mechanste sou kabann yo!
Lè maten rive, yo pratike li,
paske sa nan pouvwa a men yo.
2 Yo lanvi chan a lòt, epi konsa yo sezi yo,
kay yo, e konsa yo pran yo.
Yo oprimen yon nonm ak kay li,
Yon nonm ak tout eritaj li.
3 Pou sa, pale SENYÈ a:
“Gade byen, Mwen ap fè yon plan kont pèp sa a,
yon malè k ap fè nou p ap ka retire kou nou;
ni nou p ap ka mache ak awogans,
paske sa se yon move tan.
4 Nan jou sa a, yo va fè leve kont nou yon pawòl;
mokè yo va kriye ak yon lamantasyon tris.
Yo va di: ‘Nou fin detwi nèt!
Li divize eritaj a pèp mwen an.
A la retire, Li retire l nan men mwen!
Li bay moun trèt yo! Li divize bay chan nou yo!’ ”
5 Akoz sa, nou p ap gen pèsòn ki va tann lign mezi
pou fè tiraj osò nan asanble SENYÈ a.
6 “Pa pwofetize”!—yo pwofetize—
“Pa pwofetize de bagay de sila yo.
Repwòch sa yo p ap janm rive nou.”
7 Èske sa dwe pale, O Lakay Jacob?
“Èske Lespri SENYÈ a pa an kolè?
Èske bagay sa yo se zèv pa Li?
Èske pawòl Mwen yo pa fè byen
pou sila k ap mache dwat la?”
8 Men koulye a, pèp Mwen an leve tankou yon ènmi.
Nou chire retire manto ak abiman
de sila k ap pase pa aza yo;
moun k ap retounen, soti nan lagè.
9 Fanm a pèp Mwen yo, nou chase yo deyò
pou soti kite bèl ti kay yo.
Nan men jèn pitit yo, nou rache retire
tout benediksyon Mwen, jis pou tout tan.
10 Leve ale!
Se pa isit ou ap jwenn repo;
li plen ak sa ki pa pwòp, sa kab detwi,
menm avèk yon destriksyon byen grav.
11 Si yon nonm ap mache nan yon
lespri manti pou l di:
“Mwen va pale avèk nou konsènan
diven ak bwason fò,”
li ta kapab menm vin pwofèt a pèp sa a.
12 Anverite, Mwen va rasanble nou tout, O Jacob!
Anverite, Mwen va ranmase retay Israël yo.
Mwen va mete yo ansanm tankou mouton nan pak;
tankou yon bann mouton nan mitan patiraj yo.
Y ap plenn ak moun.
13 Sila k ap ouvri kraze chemen a va ale devan yo.
Yo kraze pòtay la pou soti.
Se wa yo ki pase devan yo,
ak SENYÈ la a latèt yo.