5
1 I A la, mele aku la o Debora laua o Baraka, ke keiki a Abinoama, i ka i ana,
2 No ke alakai koa ana o na'lii iloko o ka Iseraela,
No ka
hooikaika nui ana o na kanaka,
E hoomaikai ia Iehova.
3 E hoolohe mai, e na'lii,
E haliu mai i pepeiao, e na mea nani;
Owau, ia Iehova no wau e mele aku ai:
E oli aku au ia Iehova i ke Akua o ka Iseraela.
4 E Iehova, i kou puka ana iwaho o Seira,
I kou hele ana aku, mai ka papu aku o Edoma,
Naue ae la ka honua, kulu ka lani,
Nakulukulu no hoi na ao i ka wai.
5 Hehee iho la na mauna imua o Iehova,
O Sinai nei imua o Iehova, ke Akua o ka Iseraela.
6 I na la o Samegara, ke keiki a Anata,
I na la o Iaela, oki loa iho la na huakai hele,
O ka poe i hele i ke alanui, hele lakou ma na ala malu
7 Oki iho la na luna,
Oki lakou iloko o ka Iseraela,
A ku iluna au, o Debora nei,
Ku mai la au, he makuwahine iloko o ka Iseraela.
8 Olioli lakou i na'kua hou,
Alaila, he kaua ma na puka o ka pa;
Ua ikea anei ka palekaua, a me ka pololu,
I waena o na kanaha tausani o ka Iseraela?
9 Aia no ko'u naau me na luna o ka Iseraela,
Me ka poe i hooikaika wale iwaena o na kanaka.
E hoomaikai ia Iehova.
10 E, ka poe holo ma na hoki keokeo,
Ka poe noho e hooponopono ana,
Na mea hele ma na alanui,
E noonoo oukou.
11 Me ka uwalaau ole o ka poe e puunaue ana i ka waiwai pio ma
na holowaawai,
Ilaila, e hookani lakou i na lanakila ana o Iehova;
Na lanakila ana o kona poe luna maloko o ka Iseraela:
Alaila, e iho no na kanaka o Iehova, i na puka o ka pa.
12 E ala, e ala, e Debora,
E ala, e ala, e oli i ka oli:
E ku mai, e Baraka, e alakai pio aku i kou poe pio, e ke keiki
a Abinoama.
13 O ka mea i pakele, ua hoolanakila mai kela ia ia maluna o na
mea kiekie o kanaka:
Ua hoolanakila mai o Iehova ia ia, maluna o ka poe koa.
14 Mawaena mai o Eperaima, ke kumu i ku e i ko Ameleka;
Mahope ou, e Beniamina, maloko o kou poe kanaka;
Mai Makira mai i iho mai ai na luna,
A mai Zebuluna mai ka poe i paa ai ka ihe o ka alihikaua.
15 Me Debora no na'lii o Isakara,
O Isakara no, a pela no o Baraka.
Ma kona wawae ia i hoounaia'ku ai i ke awawa.
Ma na kahawai o Reubena, nui loa ka noonoo ana o ka naau.
16 No ke aha la oe i noho ai ma na pa holoholona,
E hoolohe aku i ka uwe ana o na hipa?
Ma na kahawai o Reubena, nui loa ka huli ana o ka naau.
17 Noho aku la ko Gileada mao aku o Ioredane.
No ke aha la i noho ai ka Dana ma na moku?
Noho no ka Asera ma kahakai,
Ma kona awa lulu kona noho ana.
18 He poe kanaka ka Zebuluna, i hoowahawaha i ko lakou ola i ka make,
O ka Napetali kekahi, ma na puu o ke kula.
19 Hele mai na'lii, a kaua,
Alaila, kaua na'lii o Kanaana
Ma Taanaka, ma na wai o Megido;
Aole lakou i lawe i ke kala i mea waiwai.
20 Kaua mai ko ka lani,
Kaua mai na hoku ma ko lakou kuamoo, ia Sisera.
21 Na ka muliwai o Kisona lakou i lawe aku,
O ka muliwai kahiko, ka muliwai o Kisona.
E kuu uhane, ua hele oe me ka ikaika nui.
22 Alaila, hehi iho na manea o na lio,
No ka wikiwiki, ka wikiwiki o ko lakou alii.
23 E hoino aku ia Meroza,
Wahi a ka anela o Iehova,
Me ka hoino nui e hoiuo ai i ka poe i noho ilaila;
No ka mea, aole lakou i hele e kokua mamuli o Iehova,
E kokua ia Iehova imua o ka poe ikaika,
24 Mamua o na wahine, e pomaikai ana o Iaela,
Ka wahine a Hebera no ko Kena;
E pomaikai ana ia mamua o na wahine iloko o na halelewa.
25 Nonoi mai o [Sisera] i ka wai,
Haawi aku oia i ka waiu;
O ka waiu paa kana i lawe mai ai ma ka ipu nani.
26 Kau aku la oia i kona lima ma ke kui,
O kona lima akau hoi ma ka hamare o ka mea paahana.
Hahau ae la ia Sisera, hahau io no i kona poo,
Kui aku la oia, a hou aku no i kona maha.
27 Mawaena o kona mau wawae ia i kulou ai,
Hina no ia a moe iho la ilalo;
Mawaena o kona mau wawae ia i kulou ai, a hina iho la;
Ma kahi ana i kulou ai, malaila ia i hina make ai.
28 Ma ka puka makani i hakapono aku ai ka makuwahine o Sisera,
Ma ka puka olu oia i hea aku ai,
No ke aha la i hookaulua kona kaakaua ke hele mai?
Ua lohi na pokaka o kona mau kaakaua i ke aha?
29 I mai la na'lii wahine akamai,
Nana no i hai mai ia ia iho;
30 Aole anei i loaa ia lakou?
Aole anei lakou i puunaue i ka waiwai pio?
Pakahi, papalua paha na ke kane ke kaikamahine?
No Sisera ka waiwai pio onionio,
Ka waiwai pio onionio i humuia,
Ka mea i humu onionio ia no na a-i o ka poe lanakila?
31 Pela e make ai kou poe enemi a pau, e Iehova,
Aka, o ka poe aloha ia oe, e like ae lakou me ka la e puka ana ma kona ikaika. Hoomaha iho la ka aina, i hookahi kanaha makahiki.