9
Lamtua Yesus nutus un ima-ii at hngul dua kas
(Matius 10:5-15; Markus 6:7-13)
1 Oe mesan na, Yesus haman nakbua Un ima-ii at hngul dua kas, hidim Un bel oen kuasa le nulut nal uikjale, nol tao banan nal atuli las deng oen ili koed-ngasing ngas.
2 Un nutus one, le laok tek atuli las deng Ama Lamtua Allah in kil prenta ka. Un kon nutus oen le tao banan atuil ili las se ola-ola.
3 Mo Un tek oen noan, “Nangan babanan! Mi boel kil sa-saa se lalan deken. Laok nol kaod in se mi apan na ngas tuun. Kil hnikan deken, tas deken, in kaa se lalan deken, nol duit deken. Kaod in silu kon kil deken!
4 Eta mi tamam se ingu mes le muik atuli tade in sium mia kam, laok daad nolas se oen uma. Boel huil um deken. Daad se lam, didiin mi bok lakom deng iung na.
5 Eta mi taam lakom se ingu mesa, mo atuli-atuil in se la ngas sium mi lo, nol dai hii-ming se mi lo kam, haung bokam le nang one. Eta mi putim deng na lam, tao muid hadat ta, le sii soleng auh in se mi iin na ngas. Tek oen noan, ‘Mi dai ming lo, ta nang le mi lepa-haal mi in situ-tala ka esan!’ ”
6 Hidi na kon ima-ii nas laok deng ingu mes laok ingu mesa. Oen tek atuli las deng Ama Lamtua Allah Dehet Banan na. Hidim oen kon tao banan atuil in ili ngas.
Lahing Herodes sa nangan haup deng Lamtua Yesus apa ka lo
(Matius 14:1-12; Markus 6:14-29)
7 Dedeng na, lahing Herodes Antipas kon ming haup dehet bili-ngala deng Yesus. Kon un nangan hapun lo, undeng muik atuli at ila lo tek noan, “Yesus na mo, Yuhanis in Sarain Atuli ka, un nuli pait son na.”
8 Muik teng pait tek noan, “Un na mo, upung Elia man nuli pait son na.”
Tenga las pait tam tek noan, “Un nam mo at mes deng Ama Lamtua mee-baah hmuna-hmunan nua ngas.”
9 Mo Herodes nangan noan, “Dedeng na, auk tadu le dait nutus Yuhanis leo ka son. Mo un nuli pait son nia tam saa ke? Hidim at mes ni pait, asii nia le?” Kon un nuting lalan le tutnaal Yesus sil nol sila.
Lamtua Yesus nalo atuli lihu lima
(Matius 14:13-21; Markus 6:30-44; Yuhanis 6:1-14)
10 Oe mesan na kon, ima-ii man Yesus in nutus sas pait le nakbuan pait nol Una. Oen tek Un deng totoang asa man oen in daek nal son nas. Hidim Yesus nol Un ima-ii las ete-ete le lakos se mana mesa, dani nol iung Betsaida, halin oen teen in kae se las.
11 Mo atuil hut mamo kas ming haup noan, Yesus le lako bus el ola ka, ta oen laok muid Una. Kon Yesus sium oen nol babanan, hidim Un tao banan atuil in ili ngas totoang, nol Un dehet bel oen deng Ama Lamtua Allah in kil prenta ka.
12 Lelo-hat son kon, Yesus ima-ii at hngul dua kas laok tek Un elia, “Banan dui ka, Paap tadu atuil nias le lakos se ingu-iung in dadani deng maan ni ngias, halin nuting oen in kaa esan. Nol nang le oen laok nuting maan taung oen in nini. Ta maan ni atuli ase elia lam, taon elol le oen haup in kaa kia?”
13-14 Mo Yesus situs noan, “Elia! Nang le mi man bel oen in kaa!”
Mo oen kaen noan, “Auu! Paap le! Hapun se ola la? Atuil nias lihu lim lisi! Na suma biklobe las siis, kaih bihata las nol tana-ana ngas lo bii! Hidim kaim ruti bua lim siis. Nol ikan kon teb dua siis. Eta Paap koma ka le kaim man nalo atuil unus tene nias sam, taon elol le kaim sos nal in kaa mamamo bel one la?!”
Kon Yesus tadu oen noan, “Tek atuil nias le daad buan-buan, buan mesa lam at buk lima.”
15 Kon nam oen daek muid ela.
16 Nikit atuli las totoang daad son kon, Yesus kat ruti bua lim nas nol ikan dua nas. Un ngada lako el apan nua le kohe-kanas nodan mamo. Hidim Un bilas-bilas ruti nol ikan nas, le doong bel Un ima-ii las halin laok bating bel atuli las.
17 Oen totoang kaa didiin silis. Hidi nam ima-ii las kat nakbuan in kaa lisin nas sam, inu fuli hngul dua.
Petrus mulai nataka taan noan Lamtua Yesus nam, Kristus, Atuling man Ama Lamtua Allah in hid meman son, deng lolo hmunan nua ka
(Matius 16:13-19; Markus 8:27-29)
18 Oe mesan na, Yesus sii kohe-kanas se mana mesa. Kon Un ima-ii las lakos nakbua nol Una. Kohe-kanas hidi kon, Un ketan oen noan, “Mi ming-ming ngam atuli las tek le Auk nia mo asii la?”
19 Oen siut noan, “Muik in tek noan Paap nia mo, Yuhanis in Sarain Atuil ka. Tenga las pait tek noan, bet Paap niam, upung Elia. Eta lo kam, at mes deng Ama Lamtua Allah mee-baah hmuna-hmunan nuas man nuli pait son nia.”
20 Kon Yesus keket oen pait noan, “Eta muid mia lam, Auk nia mo asii la?”
Kon Petrus siut noan, “Paap nia mo Kristus, na Atuling man Ama Lamtua Allah tulu meman son deng lolo hmunan nua ka!”
21 Kon nam Yesus kaing one, le boel tek asii deen kon, noan Un na mo Kristus.
Lamtua Yesus aa deng Un in mate ka nol Un in nuli pait ta
(Matius 16:21-28; Markus 8:31—9:1)
22 Hidi kon Yesus aa taplaeng pait noan, “Auk niam Atuling Baktetebes sa. Auk musti lepa-haal in susa-daat bili-ngala. Mam blalan-blalan hadat atuil Yahudi las, tulu agama las tene-tenen nas, nol guru-guru agama las dai sium noan, Auk nia mo Kristus lo. Hidim mam oen keo tele Au. Meman Auk mateng mo bingin dua ka lam, Auk nuling pait!”
23 Hidi nam Un tek atuil hut mamo kas noan, “Asii man kom le muid Au lam, un musti tahang le muid napiut lelo-lelon. Un musti sao soleng un in koma-koma ngas esan. Eta atuli tao un dadaat didiin keo tele kon, un musti muid napiut, tuladang el atuli haal un kai sangsuli la, le lako maan in mate kua.
24 Ta atuil in tade le mate undeng muid Au, taon elola kon mam un haup in nuli napiut nol Ama Lamtua Allah. Mo atuil man suma kom le nuli taung un apa ka sii ka, mam bakisan katang deng Ama Lamtua Allah.
25 Eta atuli li haup apan-kloma ki isin nias totoang, mo Ama Lamtua Allah hutun soleng una lam, un ontong ngi saa la?
26 Auk nia mo Atuling Baktetebes sa. Tiata atuil in mae le muid Au, nol mae kil Auk in tui ngias sa, mam Auk kon mae in hao un se Ama Lamtua Allah sila, se oras Auk in pait maang deng sorga nga. Ta mam Auk niung maang nol Auk Amang ngu kuasa in muun isi ka, leo-leo nol Un ima-ii las deng sorga.
27 Auk tek mi baktetebes. At il deng mi in mo nia ngias, mam net nol matan esan deng Ama Lamtua in kil prenta ka, hidi halas-sam oen mates.”
Lamtua Yesus hnika-tuladang nga daid kisa se leten dapa
(Matius 17:1-8; Markus 9:2-8)
28 Hidi nal lelo paul kon, Yesus haman nal Petrus, Yuhanis nol Yakobus le oen leo-leo saek lakos se leten mes dapas halin kohe-kanas.
29 Yesus kohe-kanas mamaus kon, Un hnika-tuladang nga daid kisaꞌ nol Un kai-batu las kon daid muti kaloeꞌ.
30 Nahkiut tuun nam, atuli at dua puit maas. At dua nas, upung Musa nol upung Elia. Oen dehet nol Yesus.
31 Oen kon hnika-tuladang ngas muun isi. Oen tilus aa deng mam Yesus in maet se Yerusalem ma.
32 Oras na, Petrus nol un tapan at dua las matan tede isi, didiin oen niin nalas. Oen tilus nahkitus kon, oen ngat net Yesus dil nol atuli at dua. Oen kon ngat tam Yesus apa ka kaloe le langa isi.
33 Ti upung Musa nol upung Elia mana le lakos kon, Petrus nangan taan le tao elola ka lo. Tiata un aa dadahut tuun noan, “Tuang! Se nia lam kaim nataka kam leok isi! Tiata banan dui ka kaim koet hlepe tiul se nia. Mes bel Tuang, mes bel upung Musa, nol mesan na pait bel upung Elia.”
34 Mo un aa mamaus ela lam, nopen mes niu maa kabut one. Kon nam Petrus nol un tapan nas lii isi.
35 Hidim oen ming haup fala mes deng nopen na dalen tek noan,
“Ni Auk Anang man Auk in huil meman son na!
Un aa kam, hii babanan se Una!”
36 Aa ela hidi kon, Petrus nol un tapan nas ngat net Yesus sii son. Hidi nam, oen tilus ete tuun le dehet bel asii-asii lo, deng asa man oen in net son na. Nesa-nesang halas-sam oen bok bahan nas le dehet bel atuil didang.
Lamtua Yesus tao banan tana-ana in tom uikjale mesa
(Matius 17:14-18; Markus 9:14-27)
37 Ola ka, Yesus nol Petrus nol un tapan nas nius deng leten na lam, atuli hut mamo maas tutnaal Yesus.
38 Muik atuli mes haman tek Un noan, “Paap Guru! Tulung maa ngat bel auk anang bikloeb siing ngi le!
39 Ta uikjale taan in kil una si-sii, le tao un ahan nahkekeka nol peko-peko un didiin kapen bulat puit deng un baha ka. Uikjale na kon diku-puang una, nol kus un tutungus.
40 Auk nodan tulung Paap anan nias son le nulut puting uikjale na, mo oen nulut puting nalan lo!”
41 Ming ela kon Yesus baet oen totoang le tekas noan, “Hoe! Mi parsai noan Ama Lamtua tao banan nal atuil lo ke? Mi niam meman atuil man in nuil muid lalan lolo ka lo ngas! Auk musti tahang le leo-leo nol mi didiin bling pait halas-sam mi parsai se Au la? Auk musti keeh nol mi didiin bling pait ta?”
Hidim Un bali le aa nol blalan biklobeng na noan, “Kil nol ku anam ma maa se ni tia!”
42 Nikit oen kil nol tana na laok bel Yesus kon, uikjale ka late laok se dale ka, nol peko un apa ka, ta un hukun muun isi. Mo Yesus prenta uikjale na le puit nodat tana na, kon tana na banan meman. Hidi kon Yesus sao lako bel un ama ka.
43a Totoang atuil in net Ama Lamtua in kuasa man muun isi na, herang-herang.
Lamtua Yesus tek pait deng Un in mate ka
(Matius 17:22-23; Markus 9:30-32)
43b Oras atuli las dehet apa nabael deng tada-taad herang man Yesus in tao ngas sam, Un tek Un ima-ii las noan,
44 “Mi taad Auk in aa ni babanan! Nesang lo ka kam, atuli le hee soleng Au, Atuling Baktetebes nia. Hidim oen sao Auk lakong bel atuil didang.”
45 Mo Un ima-ii las nangan hapun lo tetetas. Oen nangan taan Un in aa na nahin na lo. Oen kon lii in ketan un nahin na.
Asii man daid atuil hmunan na?
(Matius 18:1-5; Markus 9:33-37)
46 Oe mesan na, Yesus ima-ii las kaen apa deng asii man daid atuil hmunan na.
47 Mo Yesus taan oen in kaen apa na. Kon Un haman tana-ana blutu mesa, hidim tadu le dil se Un halin na.
48 Hidim Un tek atuli las noan, “Hii babanan ne! Atuil in tade le lii-lau atuil ana el tana-ana nia ki, nahin na noan, atuling na kon lii-lau Au. Nol un kon lii-lau Auk Amang in ne sorga kua, man nutus Auk maang se apan-kloma kia. Muik atuli mamo man kom in ngat kabaul one. Tuladang el atuil kasiang, atuil in susa, atuil banan lo, atuil in nahi tom daat, nol atuil ana ngas. Atuil man kom le lii-lau atuil tuladang ela ngas, man Ama Lamtua Allah noken noan, un nam atuil in muun dui.”
Asii man labang nol kit lo kam, un nam mo kit tapan
(Markus 9:38-40)
49 Hidim Yuhanis tek Yesus noan, “Papa! Oe mesan na, kaim net atuli mes nulut puting uikjale le busun nini Paap ngala ka. Tiata kaim kaing una le busun-busun nini Paap ngala ka deken, undeng un na mo, kit atulin lo.”
50 Mo Yesus situn noan, “Ela deken! Ta atuil man labang nol kit lo ka, nahin na noan, un nam mo kit tapans.”
Atuli ingu mes se Samaria sium Lamtua Yesus lo
51 Yesus taan noan Un lelon in saek lako sorga ka dadani son. Kon Un nutus le bok lako kota Yerusalem.
52 Un nutus atuil le lakos muna deng one, halin nam mana in kaa-ninu. Kon atuil in nutus nas taam lakos ingu mesa, se propinsi Samaria, le nuting maan in teen tahang.
53 Mo atuil Samaria las dai sium Yesus nol Un ima-ii las lo, undeng Un le lako todan-lahing Ama Lamtua Allah se kota Yerusalem.
54 Nikit Yakobus nol Yuhanis ming haup atuil Samaria las in dai sium oen lo ka kon, oen hanet Yesus noan, “Tuang! Elola, tam kit nodan Ama Lamtua Allah le niung ai maa deng apan nua, halin loe nuli oen tuun tia la?”
55 Mo Yesus bali saol oen duas le kaing oen noan, “Boel nangan ela deken.”
56 Hidim oen lakos napiut bus el iung didang.
Atorang in muid Lamtua Yesus
(Matius 8:19-22)
57 Oras oen in laok mamasu ka, muik atuli mes aa nol Yesus noan, “Papa! Paap laok elol tuun kon, auk le muid napiut Papa!”
58 Mo Yesus situn noan, “Banan kon! Mo nangan le ta: Totoang atuli li nol hmukit ti muik oen mana esa. Ngot huin pait lako un bolo. Tilu-kee pait lako un hno. Mo Au, Atuling Baktetebes nia, muik Un uma esa le pait lako se na lo. Maan in tian bon kon ase.”
59 Oe mesan na, Yesus haman atuil didang mes pait noan, “Maa le muid Au halin daid Auk atulin.”
Atuling na siut noan, “Hao! Mo elia Tuang. Tahang le auk pait laok doha-tinang blalan nuas muna. Le eta auk papa mate son, halas-sam auk mudi.”
60 Mo Yesus tekan noan, “Elia! Nang le atuil man kom le muid Auk lo ngas, mana-koet oen atulin in mate ngas. Mo mi man parsai se Ama Lamtua nol kom le muid Au ngas, mi osa la laok tek atuli li deng Ama Lamtua Allah in kil prenta ka.”
61 Muik atuli mes pait tek noan, “Banan kon, Tuang! Auk tade le muid Tuang tutungus. Mo bel auk dola le auk laok liki mo seon auk nenan nuas muna le, halas-sam auk pait maa le muid Tuang.”
62 Mo Yesus tekan noan, “Elia! Eta atuli li bali dale, hidim kukaum nol in daek os didang, didiin nadidingun soleng in hai kam, un klapa la daid lo. Ela kon nol atuil in nutus le muid Au, mo nangan un in nuli hmunan nu tutungus sa. Atuil tuladang ela ka, muik ambak in daek se Ama Lamtua Allah sonaf fa lo.”