5
In dula man lulun le segel tele
1 Hidi kon auk ngat net Ama Lamtua Allah man daad se del in prenta ka dapa ka, kil in dula mes man lulun, se Un ima kanan na. In dula na, dulan halin-halin. Nol oen segel tele son nini segel itu.
2 Hidim auk ngat net ima-ii mes deng sorga man uhu isi, ketan nol fala mumuun noan, “Asii man muik hak le bok nuli segel nas le les in dula na la?”
3 Un ketan ela, mo oen haup atuli mes lo kon, ne sorga tam se apan-kloma ki, man muik hak le bok nal in dula na, le les un isin na. Se atuil in mateng ngas mana lu kon, muik lo.
4 Ngat net ela kon, auk lilu muun isi undeng muik tahan at mes lo kon, man muik hak le bok in dula na le les.
5 Hidi kon at mes deng tulu 24 nas aa nol auk noan, “Hoe kaka! Lilu deken. Ta laih Daud in hua-koet mes man muun isi, oen noken Un noan ‘Singa deng ngaal Yahuda’. Un late dudus totoang in daat tas son. Tiata, Un man muik hak le bok segel nas, le les in dula na isin na.”
6 Ming ela kon auk ngat net Lae-blai Ana mes dil se hmukit 4 in muun ising nas, nol tulu 24 man daad pukiu del in prenta ngas hlala. Lae-blai Ana na hnika ka el noan keo netan son. Un muik sulu itu, nol Un mata ka kon itu. Un mata iut nas, banansila el Koo in muik hngasa itu, man Ama Lamtua Allah niung maas son se papmes apan-kloma kia ka.
7 Hidim auk ngat tam Lae-blai Ana na lako bus el Ama Lamtua Allah, man daad se del in prenta ka dapa, le sium in dula man lul tele na deng Un ima kanan na.
8 Nikit Lae-Blai Ana na simun kon, hmukit 4 in muun ising nas nol tulu 24 tas, hai bukun nas le todan-lahing se Un sila ka. Oen mesa-mesam kil sa-saa in kuit-lii, el sasanu, nol mako lil-mea mes nisi kemenyan man oen tunun le un nus sa bui bingis. Kemenyan bui bingis na, mo Ama Lamtua atulin nas in kohe-kanas sa.
9 Hidim oen totoang tao dain balu mes elia:
“Eta Lae-blai Ana ni man sium in dula nia lam, toma.
Lae-blai Ana ni man muik hak le bok un segel las.
Ta Un tom in keo net son.
Hidim Ama Lamtua Allah pake Un dala ka,
le sui-nahat totoang atuil deng ngala-ngala lias nol bangsa-bangsa lias,
halin teng deng one la haup in daid Ama Lamtua atulin.
Nini ela lam, atuil deng totoang dasi-dasi lias nol negara-negara lias,
haup in daid Ama Lamtua nenan.
10 Lae-blai Ana ni tao nakbuan oen totoang son,
le daid lahi mes in prenta.
Lae-blai Ana ni huil nal oen son,
le daid Ama Lamtua atulins in dake.
Mam oen kil bandu se apan-kloma kia.
Mam oen daek taung Ama Lamtua se apan-kloma kia.”
11 Hidi kon, auk botas bong ngia lam auk ming fala muun deng hmukit 4 in muun ising nas nol tulu 24 tas, taplaeng nol Ama Lamtua ima-ii mamo isi deng sorga. Ima-ii nas mamon na juta-juta.
12 Oen totoang tao dain nol mumuun noan,
“Kaim nikit sakeng Lae-blai Ana man keo net son na ngala ka lapa-lapa,
Undeng Un sium kaim in naka kia lam toma!
Un in kuasa ka, tene dui hihidi.
Un hmukin nas mamo isi.
Un in nuting lalan na, tom baktetebes.
Un in muun-tes sa, muun isi.
Kaim nikit sakeng Un ngala ka lapa-lapa.
Kaim todan Una.
Kaim naka-naka Una.”
13 Hidi nam, auk ming dain didang mes pait. Deng totoang in nuli, se sorga, tam se apan nua, tam se apan-kloma kia, nol in se tasi dalen nuas kon, totoang nikit falan le tao dani. Atuil in ne maan hmate ku nguas kon, tao dain mudi. Oen totoang leo-leo tao dain noan,
“Kaim naka Ama Lamtua Allah man daad ne del in prenta ka.
Kaim kon nikit sakeng Lae-blai Ana ni ngala ka lapa-lapa.
Kaim todan-lahing One.
Undeng Oen man kil prenta hidi nutus taan lo!
Nol Oen in kuasa ka hidi nutus taan lo!”
14 Hidim hmukit 4 man muun ising nas siut tutungus noan, “Baktetebes ela!” Kon tulu 24 tas hai bukun nas pait, le todan-lahing se Ama Lamtua Allah nol Lae-blai Ana ka.