1 Boeipa loh a thui bangla phaep nah, mamih taengah khaw, Israel aka uktaem laitloekkung taengah khaw, mamih manghai taengah khaw, mamih boeilu taengah khaw, Judah pilnam taengah khaw phaepnah te a khueh coeng. 2 Jerusalem kah a saii bangla vaan hmuiah phaepnah he a saii noek moenih. Te tah Moses kah olkhueng cabu dongkah a daek tarhing la om coeng. 3 Mamih khuikah hlang a ngen loh a ca kah a saa te a caak uh tih, a tloe rhoek loh a canu kah a saa te a caak uh. 4 Boeipa amih te mah kaepvai ram boeih taengah ongai-oeng la a khueh. Hlangkah a hnael ham neh, khaepdan pilnam taengah khopong la a khueh. Te lam te a mih a thaek coeng. 5 Amih te a suntlak sah tih a thoh voel moenih. Mamih namtu he Pathen Boeipa taenga n'tholh uh tih a ol te n'hnatun uh moenih. 6 Mamih kah Pathen Boeipa tah tang coeng. Tedae a mamih so neh a pa rhoek soah khaw tahae khohnin due yah a phen coeng. 7 Tekah citcai boeih neh Boeipa loh mamih soah a tlak sak coeng. 8 Te lalah khaw mamih khat rhip long he mamih thinko boethae poeknah lamloh longpuei maelh tih Boeipa kah kolonah n'tlap uh moenih.

9 Citcai he Boeipa loh oepsoeh la a khueh coeng dongah mamih soah a tlak sak coeng. Mamih loh saii ham n'uen vanbangla a bibi takuem dongah Boeipa ta tiktam yoeyah. 10 Te lalah a ol te n'ngai uh pawt tih mamih hmaiah a khueh a oltlueh dongah te m'pongpa uh pawh. 11 Tahae ah, Israel kah Pathen Boeipa aw, na pilnam he Egypt kho lamloh na tlungthang kut neh, miknoek neh, khobae rhambae neh, saithainah puei na, na ban yueng na khuen tih, tihnin due na ming te a ca la na khueh. 12 Ka tholh uh coeng, ka lailak uh coeng, ka lolh uh coeng, ka Boeipa Pathen aw, na olrhi te ka poe uh coeng. 13 Na kosi te kaimih taeng lamloh mael sak laeh, kamih he hlangmi ka yol uh coeng, kaimih na taekyaknah namtom rhoek taengah he. 14 Aw Boeipa kaimih kah thangthuinah neh ka huithuinah he hnatun lah. Namah hamla kaimih he n'tloeih sak lah. Kaimih saldong la aka khuen rhoek mikhmuh ah na kolonah han tueng sak lah. 15 Tedaengah nih namah te diklai loh kaimih kah Pathen Boeipa la na om khaw, Israel neh a cadil rhoek te na ming neh na khue khaw a ming eh. 16 O Boeipa na omnah hmuen cim lamloh ha so thuk lah lamtah kaimih he m'poek lah, o Boeipa na hna kaeng lamtah han ya lah. 17 O Boeipa na mik Dai lamtah han so lah, Saelkhui ka aka om hlang duek rhoek, a pum dong lamloh a mueihla vik a loh pa rhoek, Boeipa kah thangpomnah neh tiktamnah aka tae pawt rhoek te. 18 Tekah hlang rhoek tah a ko mat thae uh coeng, kunyun neh aka khawn la cet uh coeng, a mik hmang tih a hinglu khaw pongnaeng uh coeng, Boeipa nang kah na thangpomnah neh duengnah te phong uh van venim? 19 Boeipa ka Pathen aw, na mikhmuh ah rhennah bih ham ka thangthui uh he a pa rhoek neh ka manghai rhoek kah bibi a duengnah pakhatt ca dongah moenih. 20 Na thintoek neh na kosi te kaimih soah nan tueih coeng, na sal tonghma rhoek loh a thui tih a phong van bangla. 21 Te dongah Boeipa loh he ni a thui. Na laengpang te duen lamloh Babylon manghai hamla thotat uh. Na pa rhoek taengah ka paek khohmuen ah na om uh bitni. 22 Tedae Boeipa ol te na ngai pawt atah Babylon manghai kah sal na bi het mahpawt nim? 23 Judah khopuei lamkah khaw, Jerusalem kaepvai lamkah khaw, koyael ol neh kohoe ol, yulokung ol neh vasa ol khaw, ka paa sak ni. Khohmuen boeih te khosa om kolla khopong la om ni,” na ti. 24 Tedae Babylon manghai taengah thohtat ham khaw na ol ka ngai uh pawh. Te dongah nan phaepnah te nang khuen coeng. Te te na sal tonghma rhoek taengah na thui coeng dae ta. Ka manghai rhoek kah a rhuh khaw, a pa rhoek kah a rhuh khaw, a duemnah hmuen lamloh a khuen uh coeng. 25 Amih te khothun kah kholing neh khoyin kah buem loh a ngawn uh coeng. Amih te citcai neh, khokha neh, cunghang neh, duektahaw dongah muep milh uh coeng. 26 Na ming neh na khue im te khaw, Judah imkhui neh Israel imkhui kah halangnah dongah ni tihnin ah he tla a om. 27 Te cakhaw, ka Pathen Boeipa aw, na sitlohnah cungkuem neh, na thinphatnah a len neh kaimih taengah nan saii coeng. 28 Israel pilnam kah mikhmuh ah na olkhueng tarhit hamla na uennah hnin ah, na sal Moses rhangneh na thui bangla; 29 Ka ol he na hnatun pawt atah, pilnu hlangping he, amih ka taekyak nah namtom taengah, hlangmi a yol la poeh kuekluek ni. 30 Amih he a rhawn mungkung la om tih, ka ol ngai uh mahpawh tila ka ming. 31 Kai tah Boeipa Pathen la ka om tih, amih te olngainah thinko neh hnatunnah hna ka paek ham khaw ka ming. 32 A vangsawn khohmuen ah kai n'koeh uh vetih, ka ming a poek uh bitni. 33 Te vaengah a thinthnah lamkah khaw, boethae halangnah lamkah khaw mael bitni. Boeipa mikhmuh aka tholh a napa rhoek kah khosing te a poek uh bitni. 34 A napa Abraham, Isaak, Jakob taengah paek hamla ka toemngam tangtae khohmuen la amih te koep ka khuen ni. Te te amih loh a uktaem uh bitni. Amih te ka rhoeng sak vetih muei uh voel mahpawh. 35 Amih kah Pathen la om ham neh, amih khaw ka pilnam la om te a mih taengah dungyan kah paipi ka saii pah ni. Ka pilnam Israel he tah amih taengah ka paek tangtae khohmuen lamloh ka khoe voel mahpawh,” na ti.