1 Ka capa te yulueinah imkhui la a kun vaengah hmawk cungku tih duek. 2 Te vaengah ka mae poeng coe tih ka imben boeih loh kai n'hloep hamla cai uh. A hnin bae hlaem due olmueh la ka om. 3 Tedae amih loh kan hloep ham neh, kai duem om ham n'thaphoh ham boeih paa uh. Khoyin ah tah ka thoo tih ka yong dongah nan hmuh bangla he khohmuen he kam pha. 4 Te dongah kamh kho la mael ham khaw ka caii voel moenih. Ka ca pawt vetih ka o voel mahpawh. Ka nguek vetih ka duek hil phat ka yaeh pawn ni,” a ti.

5 Te vaengah ka moeh tih ka thuep bangli te pat ka toeng. Anih te thintoek neh ka doo tih, 6 “Manu na ang tangkik coeng, mamih kah nguekcoinah na hmu pawt nim, mamih taengah balae aka om? 7 Mamih boeih kah a manu Zion tah kosi dung tih lungnat khaw tlo. 8 Te ham na nguekcoi laeh te bahoeng rhoep. Kaimih boeih ka nguekcoi uh coeng. Kothae ham a khaw boeih ka kothae uh. Na capa khat bueng ham na rhah mai te, kamih tah lunglai pum neh mamih manu ham ka kothae uh ta. 9 Diklai ke dawt lah saw nang hamla a thui bitni. Te khaw amah long nih a sokah aka om boeih taengah ngueknah a thoeng sak. 10 A tongcuek lamloh amah kah a cun boeih tih, a tloe rhoek halo bal pueng ni. Thuinah te boeih khum tom coeng ke, amih khuikah hlang ping tah a boe ham om coeng. 11 Te dongah uh lae muep aka nguek tueng? Muep aka hma ham a? nang pakhat bueng aka hma ham a? 12 Kai taengah, ‘Ka lungnat he diklai kah neh vai uh pawh, ka bungko thaihtae te ka hlong coeng, te khaw patang nen la ka yom tih, kothae nen la ka ka cun dae dae. 13 Tedae diklai kah khosing bangla diklai ah om van, hlangping khaw ha thoeng van bangla cet van coeng,’ na ti mai ni. 14 Namah taengah khaw kan thui van lah eh, “Kothae la na thoeng van bangla, te khaw dilai loh a tongcuek lamkah ni a thaih la m'paek coeng. Hlanghing he khaw diklai loh amah aka saii Pathen ham ni a khueh. 15 Te dongah na kothae te khoem laeh, nang sola aka pai ngaihmangnah te thinom la ueh laeh. 16 Pathen kah oltloeknah he a tiktam la om tila na ming koinih, a tue loh a pha vaengah na capa te koep na dang vetih, huta lakli ah koeh la na om ni. 17 Te dongah na va kho la cet laeh,” ka ti nah.

18 Anih loh kai taengah, “Ka saii mah pawh, khopuei la ka cet mah pawh, He ah ka duek eh,” a ti

19 Anih koep ka voek tih, 20 “Te tlam te saii boeh, namah te hloep uh, Zion kah a patangnah meyet a lo? Jerusalem kah kothae dongah namah khaw rhaemhal laeh. 21 Mamih kah rhokso te naat la a voeih uh coeng, hmueihtuk khaw a palet uh coeng, bawkim khaw a phae uh coeng. 22 mamih kah rhotoeng khaw lai ah yalh coeng, mamih kah laa ol khaw duem coeng, mamih kah omngaihnah khaw paa coeng, mamih kah hmaivang hmai tung khaw a khoe uh coeng, paipi thingkawng te a koengloeng uh coeng, hnocim khaw boeih a mawt uh coeng, a ming n'khue uh te khaw yip a poeih uh coeng, ca rhoek khaw patang uh coeng, khosoih khaw a dueknah ham la a hoeh coeng, Levi rhoek khaw vangsawn la a khuen coeng, tongpang oila khaw a soek a yak uh coeng, mamih yuu rhoek khaw a tholh puei uh coeng, hlang dueng rhoek khaw a khueh coeng, tatloel rhoek khaw boeih a vai uh coeng, cadong te sal a bi sak tih, hlang rhalh te a hong la a khueh coeng. 23 A thae koek la Zion kah thangpomnah te boeih a phae tih te te mamih ak thinah kut dongla a paek coeng. 24 Te dongah na kothaenah boeih te khoek lamtah na ngaihmangnah boeih khaw rhoe laeh. Te daengah ni Tloengkhoelh loh nang koep n'rhen vetih, Khohni loh duemnah m'paek eh. Na ngaihmang te hnawt laeh,” ka ti nah.

25 Anih ka voek li vaengah a maelhmai te phaeng a hlam tarha. A hmaikhueh te kho-aa bangla aa. Te dongah a taengla ka yoeih ham khaw bahoeng ka rhih tih ka thinko ah thuen. He kawng ne ka kilkul li vaengah, 26 anih a ol khueh boeih te a rhihom cakue la pang. A pang ol dongah diklai khaw tuen. 27 Ka sawt vaengah tah manu te kai taengah tueng voel pawh. Tedae khuipuei a sak uh li tih a hmuen khaw ka, a khoengim khaw amah la tueng. Ka rhih dongah ol a lenla ka pang. 28 “Puengcawn Uriel melam a om? Anih la kai taengah aka lo lamhma. Anih kai he, hekah tlungluen omthang la n'khuen. Ka hnuktloih khaw pocinah, ka thangthuinah khaw kokhahnah la poeh,” ka ti.

29 Hekah ol he ka thui li vaengah lahma kah kai taengla aka loh puencawn te kai taengla ha pawk tih kai n'sawt. 30 Te vaengah a rhok la yalh tih ka mae khaw boeih hma. Anih loh kai n'sambai tih kai te m'moem. Ka kho dongah m'pai sak tih, 31 “Na khuiah mebang dumlai nim aka om? Balae tih a ngai a hmang? Na lungbuei kah yakimngnah neh na lungpoek khaw balae tih a limlum?” a ti.

32 “Kai he nan hno sut coeng he. Nan thuinuet bangla ka saii tih khosoek la ka cet. Hmuh tangtae ni ka hmuh tih ka hmuh thai pueng he. Ka thuicaih thai voel pawh,” ka ti nah.

33 Ka taengah te, “Tongpa bangla pai lamtah, nang kan thuinuet eh,” a ti.

34 “Ka Boeipa thui lah, kai he bueng he n'hnoo boeh. Te daengah ni kamah tue khuiah tah ka hing he. 35 Ka ming pawt te khaw ka hmuh tih, ka yakming pawt khaw ka yaak. 36 Ka lungbuei nim a vuelvaek tih ka hinglu kah mueimang nim aka om? 37 He mingpawt mangthui kah thuicaihnah te na sal taengah nan paek ham ni kan bih coeng,” ka ti nah.

38 Anih loh kan n'doo tih, “Ka ol hnatun lamtah nang kan thuituen eh. Na rhihnah hno kawng te nang taengah kan thui eh. Khohni loh nang taengah olhuep muep n'tueng coeng. 39 Na khoboe a duengnah khaw, na pilnam khaw na kothae phueih te khaw, Zion soah muep na nguekcoi te khaw a hmuh coeng. 40 Te dongah mangthui kah thuingaihnah tah he coeng ni. 41 Paekca ah nang taengah manu ha pha lah ko. A nguekcoi te na hmuh tih koe na hloep te. 42 Manu kah a suisak khaw na hmuh voel pawt tih, khopuei a sak uh li ni nang taengah aka tueng coeng he. 43 Anih loh a capa kah yoethaenah khaw nang taengah a thui. A thuicaihnah khaw he pawn ni. 44 Manu na hmuh te tah Zion ni. Te ni khopuei a sak li va na hmuh. 45 Kum sawmthum cakol la ka om a ti tih nang taengah a thui bangla, khum tangtae kum thawngthum vaengah, diklai ah nawnnah pakhat khaw a nawn uh hlan kah a kawng ni a thui. 46 Kum thawngthum phoeiah Solomon loh khopuei a sak tih nawnnah khaw a nawn. Te tah cakol nu loh capa a cun la om. 47 Na taengah a thui bangla ngaithuen halue la a khut hang te khaw, Jerusalem kah khosaknah tue la om. 48 Nang taengah, ‘Ka capa loh ylueinah imkhui la a kun vaengah duek,’ a ti van bangla anih te yoethaenah loh a tlak thil. He khaw Jerusalem tim tih a cungkunah la om. 49 Anih phek lam ni na hmuh coeng. A capa ham metlam a nguekcoinah tih aka thoeng hno dongah anih koe na suem la ko. 50 Khohni loh kodo thido la na nguekcoi tih, Zion ham ngaihuenah na khueh te a hmuh dongah a thangpomnah rhuepom te khaw, a sakthen ngaihom te khaw n'tueng coeng. 51 Te dongah im a saknah hlan khohmuen aka om pueng te kan tueng. 52 Khohni loh nang tueng hamla a ngaih te khaw ka ming. 53 Te dongah khohmuen la cet laeh ka ti. Te ah te im pakhat pataeng khoengim om hlan lah ko. 54 Hlang kah kutci imsak he Khohni kah khopuei hmuen ah tah a kuei moenih ti khaw tueng pawn ni.

55 Te dongah rhih boehy, na thinko te thuen sak boeh. Cet lamtah imsak kah a rhuepomnah neh a hmueka te khaw hmu van lah. Na mik loh a sawt thai kuiah so lah. 56 Na hna loh a yaak thai khuah tah na yaak bal bitni. 57 A yet lakah na yoethen ngai coeng, nang tah yol mai cakhaw Khohni neh om hamla n'khue coeng. 58 Tedae thangvuen hlaemah khaw heah he rhaeh mai dae. 59 Khohni loh mangthui neh n'tueng bal pueng ni. Te mangthui bangla Khohni loh a hnukkhueng khohnin ah tah diklai khosa rhoek taengah a tueng sak ni,” a ti.

Te dongah a thui bangla hlaem neh a vuen hnin at te pahoi ka ip.