54
Israel kah Hmailong
1 Caya nu loh tamhoe laeh,
aka cun noek pawt long khaw
tamlung neh rhong saeh,
aka vawn pawt khaw hlampan saeh.
BOEIPA loh, “Rhukom kah a ca rhoek lakah
aka pong kah a ca ping ngai coeng,” a ti.
2 Na dap hmuen te aek lamtah
na dungtlungim kah himbaiyan khaw yueng dae.
Na liva hlawt ham khaw tuemsoem boel lamtah
na hlingcong te caang sak.
3 Banvoei bantang la na pungtai vetih
na tiingan loh namtom te a pang ni.
Te vaengah khopuei
aka pong ah khaw kho a sak uh ni.
4 Rhih boeh, yah na pok mahpawh.
Hmaithae na lo pawt vetih na hmai tal mahpawh.
Na cacawn vaengkah yahpohnah na hnilh bitni.
Na nuhmai vaengkah kokhahnah khaw
na poek voel mahpawh.
5 Nang aka yuu nah tih nang aka saii kah
a ming tah caempuei BOEIPA ni.
Nang aka tlan, Israel kah a cim tah
diklai pum kah Pathen la a khue.
6 A hnoo uh dongah mueihla ngaihlih nu bangla
nang te BOEIPA loh ng'khue ni.
Te dongah na camoe kah na Pathen loh,
“Na yuu te khaw a hnawt,” a ti.
7 Mikhaptok ca nang kan hnoo dae
haidamnah neh a tanglue la nang kan coi bitni.
8 “Thinhul tuiphul vaengah tah
ka maelhmai he nang taeng lamloh
mikhaptok ah ka thuh coeng dae
kumhal kah sitlohnah neh nang kan haidam,”
tila nang aka tlan Yahovah loh a thui.
9 Kai ham tah tahae kah he Noah kah tui van pawn ni.
Noah tui loh a khuk vaengah diklai ham ka toemngam te
nang taengkah ka thintoek ah ni
ka toemngam tih nang kan tluung.
10 “Tlang rhoek te nong uh tih som rhoek ke tuen uh cakhaw
kai kah sitlohnah he nang taeng lamloh nong mahpawh.
Kai kah rhoepnah paipi tah tuen mahpawh,” tila
nang aka haidam BOEIPA loh a thui.
11 Mangdaeng loh a thikthuek khaw damti pawh.
Kai loh namah kah canglung lungto neh
kan kol sak dongah minhum dongah nang kan hol bitni.
12 Na puthue te aithilung,
na vongka te hmaihli lungto neh,
na khorhi boeih te danngaih lungto neh kan saii ni.
13 Na ca rhoek te BOEIPA loh boeih a lolmang thil vetih
na ca rhoek kah rhoepnah khaw ping ni.
14 Duengnah dongah n'cikngae sak vetih,
hnaemtaeknah lamloh na lakhla pawn ni.
Na rhih voel pawt vetih porhaknah khaw
nang taengla ha pawk voel mahpawh.
15 A mae la aka mae te khaw kai lamkah moenih he.
Nang aka mae te khaw namah taengah cungku bitni.
16 Hmaisa-aek hmai aka hmut kutthai khaw
kamah long ni ka suen ne.
A bisai te hnopai la a poeh sak akhaw
laikoi sak ham kutcaihnah khaw
kai loh ka suen pah coeng.
17 Hnopai tom te nang taengah hlinsai cakhaw
thaihtak mahpawh.
Laitloeknah dongah ol cungkuem loh
nang n'tlai thil cakhaw na boe mahpawh.
BOEIPA kah olphong dongah tah
tahae kah he BOEIPA sal rhoek kah
rho neh kamah taeng lamkah duengnah la om.