JOBA
(The Book of Job)
Job Cabu Kawng
Job cabu dongah he hlanghing kah patangnah kawng he a thui. Patangnah he tholhnah lamloh ha thoeng tih tholhnah phu ni Pathen loh hlang a patang sak. Cabu dongah he khat neh oldawtnah, hlatnah boeih te hlohlailung la a tael. Olkhueh Rhuem dongah tah Job cabu he olcueih ol la om. Job kah cil te a thui, anih hlang then la om tih Pathen a hinyahnah, boethae saii ham ngaih pawh. Te dae anih te a pumdongah puencakanh, patangnah neh a noemcai. Pathen kah tiktamnah te a dawt tih a laitloeknah khaw a coel, patang a bawtnah ham a bih. Job kah a hui rhoek long khaw amamih kah hmuhnah neh puet a thui uh van. Boeipa loh a thui taktak vaengah tah Pathen kah kopoekrhai neh a longpuei he hlang kah yakmingnah voelah ni a om, patangnah khuiah khaw Pathen thum tite a ming. Job he Boeipa kah yoethennah thai a dang tih camoe thai muep a cun, a khueh tawn khaw a pueh la yet. Joba cabu he 400b.c tluk vaengah tael coini.
Sawt Yoeinah
I. Olrhannah: Joba noemcainah 1.1—2.13
II. Joba a hui rhoek loh a hloep3—31)
A. Olthui neh hlatnah a pacuek3—14)
B. Olthui neh hlatnah a pabae15—21)
C. Olthui neh hlatnah a pathum 22—31)
III. Elihu kah olthui rhoek32—37)
A. Patangnah kah mangtaengnah32—33)
B. Pathen kah cim nah34)
C. Hingcimanh35)
D. Pathen kah lennah36—37)
IV. Pathen kah hlatnah38.1—42.6)
A. Pathen loh suennah kawng a thui38.1—40.5)
B. Pathen lennah neh hlanghing vawtthoeknah40.6—42.6)
V. Olbawtnah 42.7—42.17)
1
Job neh A Imkhui
1 Hlang pakhat, a ming ah Job tah Uz khohmuen ah om. Tekah hlang tah cuemthuek neh a thuem la, Pathen aka rhih tih boethae lamloh aka nong la om.
2 Anih te capa parhih neh canu pathum a sak.
3 Anih kah boiva he boiva thawng rhih, kalauk thawng thum, vaito rhoi ya nga, laak ya nga om. Imkhut khaw muep ping tih khothoeng koca boeih lakah hlang len la om.
4 A ca rhoek khaw cet uh tih amah khohnin vaengah amah im kah buhkoknah rhip a saii uh. Te vaengah a ngannu pathum te a tah uh tih a khue uh. A ngannu rhoek khaw amih neh a caak a ok uh.
5 Buhkoknah khohnin a poeng van neh Job loh amih te a tah tih a ciim. Job loh, “Ka ca rhoek he tholh uh mai khaming, tedae a thinko ah Pathen uem mai saeh,” a ti. Te dongah amih boeih kah a tarhing la mincang ah thoo tih hmueihhlutnah a nawn. Te tlam te Job loh hnin takuem a saii.
Satan Loh A Noemcai
6 Hnin at ah Pathen ca rhoek te cet uh tih BOEIPA taengah pai. Te vaengah Satan khaw amih lakli ah cet.
7 BOEIPA loh Satan te, “Me lamkah lae na pawk,” a ti nah.
Te vaengah Satan loh BOEIPA te doo tih, “Diklai ah ka van thikthuek tih a khuiah ka pongpa coeng,” a ti nah.
8 Te dongah BOEIPA loh Satan te, “Ka sal Job ke na lungbuei ah na khueh a? Anih bangla a cuemthuek neh aka thuem, Pathen aka rhih tih boethae lamloh aka nong hlang he diklai ah om pawh,” a ti nah.
9 Satan loh BOEIPA te a doo tih, “Lunglilungla mai la Job loh Pathen a rhih tang nim?
10 Namah loh anih ham neh a imkhui ham khaw, a taengkah boeih ham khaw vong na buk pah moenih a? A kut dongkah bibi te yoe na then sak tih a boiva loh diklai ah pungtai.
11 Tedae na kut na hlah lamtah anih hut te boeih ben lah, na mikhmuh ah nang n'uem tang mahpawh,” a ti nah.
12 BOEIPA loh Satan te, “A taengkah boeih ke na kut ah om ne. Tedae amah soah tah na kut hlah boeh,” a ti nah. Te phoeiah Satan te BOEIPA mikhmuh lamloh khoe uh.
13 Hnin at vaengah a capa rhoek neh a canu rhoek loh a maya caming im ah buh a caak uh tih misurtui a ok uh.
14 Te vaengah Job taengla puencawn ha pawk tih, “Vaito te olmueh la om tih a hmatoeng ah laak luem.
15 Tedae Sheba tah capit uh tih te rhoek te a mawt coeng. Camoe rhoek te khaw cunghang ha neh a ngawn uh. Kai kamah bueng he nang taengah aka puen la dawk ka loeih,” a ti nah.
16 Te te a thui li vaengah pakhat ha pawk tih, “Pathen hmai tah vaan lamloh tla tih boiva te a toih coeng. Camoe rhoek te khaw a hlawp coeng. Kai kamah bueng he nang taengah aka puen la dawk ka loeih,” a ti nah.
17 Te te thui li vaengah pakhat ha pawk tih, “Khalden rhoek hlop thum la yolh uh tih kalauk dongla capit uh. Te rhoek te a khuen phoeiah camoe rhoek te cunghang ha neh a ngawn. Kai kamah bueng he nang taengah aka puen la dawk ka loeih,” a ti nah.
18 Te te a thui vaengah pakhat a pawk pah tih, “Na capa rhoek neh na canu rhoek loh buh a caak uh tih a maya caming im ah misurtui a ok uh.
19 Te vaengah rhalvang khosoek lamloh khohli puei tarha cu tih im kil pali te a nen. Te dongah camoe rhoek a cungku thil tih duek uh. Kai kamah bueng he nang taengah aka puen la dawk ka loeih,” a ti nah.
20 Te vaengah Job thoo tih a hnikul te a phen. A lu te a vok. Diklai la khup tih bakop.
21 Te phoeiah, “A nu bungko lamloh ka thoeng vaengah, pumtling la ka thoeng tih pumtling la ka mael ni. BOEIPA loh a paek tih BOEIPA loh a loh dongah, BOEIPA ming tah yoethen la om pai saeh,” a ti.
22 A cungkuem dongah he Job tholh pawt tih Pathen taengah khaw a hohap a paek moenih.