35
1 Elihu loh koep a doo tih,
2 “ ‘Pathen lakah kamah duengnah ngai,’
na ti te tiktamnah la na poek a te?
3 ‘Ka tholhnah lamloh nang hamla
balae a hmaiben tih balae a hoeikhang,’ na ti.
4 Namah neh na taengkah
na hui rhoek kah olthui te ka thuung eh.
5 Vaan ke paelki lamtah hmu van lah.
Nang lakah aka sang khomong ke dan lah.
6 Na tholh koinih amah te metlam a ben eh?
Na boekoeknah pungtai koinih
amah taengah balae a saii eh.
7 Na tang atah amah taengah balae na paek?
Na kut lamloh balae a loh?
8 Nang bang, na halangnah khaw hlang ham tih
na duengnah khaw hlang capa ham ni.
9 Hnaemtaeknah cungkuem hmuiah
aka tlung bantha lamloh bomnah bih hamla pang uh.
10 Tedae, “Kai aka saii tih khoyin ah
laa aka pae Pathen te ta?
11 Diklai rhamsa lakah mamih n'cang puei tih
vaan kah vaa lakah mamih n'cueih sak,’ a ti moenih.
12 Pang uh pahoi cakhaw boethae rhoek kah
hoemdamnah hmai ah tah a doo moenih.
13 Pathen loh a poeyoek la hnatun pawt tih
Tlungthang long khaw a hmuhming moenih.
14 A hmuhming pawt tih na thui vaeng aisat,
dumlai pataeng amah mikhmuh ah
a pha dongah amah mah rhingda laeh.
15 Tedae a thintoek te cawh voel pawt oeh coeng tih
halangnah te khaw ming voel pawh.
16 Job loh a honghi la a ka a ang tih
mingnah om pawt ah a olthui yet,” a ti.